ກະຊວງສາທາລະນະສຸກລີບັງໄດ້ອອກຖະແຫຼງການໃນຕອນຄ່ໍາວັນທີ 23 ກັນຍານີ້ວ່າ: ອິດສະຣາແອນໄດ້ໂຈມຕີທາງອາກາດຕໍ່ຫຼາຍທ້ອງຖິ່ນຂອງລີບັງຢ່າງຕໍ່ເນື່ອງ ເຮັດໃຫ້ມີຜູ້ເສຍຊີວິດເຖິງ 492 ຄົນ ແລະ ບາດເຈັບ 1.645 ຄົນ.

   ຖະແຫຼງການສະບັບດັ່ງກ່າວລະບຸວ່າ: ການໂຈມຕີແມ່ນແນໃສ່ຕົວເມືອງ ແລະ ຊົນນະບົດຢູ່ທາງພາກໃຕ້ ແລະ ພາກຕາເວັນອອກຂອງລີບັງ, ໃນຈໍານວນຜູ້ເສຍຊີວິດແມ່ນມີເດັກນ້ອຍ 35 ຄົນ ແລະ ແມ່ຍິງ 58 ຄົນ. ພ້ອມດຽວກັນນີ້, ໃນຕອນຄໍ່າຂອງວັນທີ 23 ກັນຍານີ້, ໂຄສົກກອງທັບອິດສະຣາແອນຢືນຢັນວ່າ: ໃນຮອບ 24 ຊົ່ວໂມງຜ່ານມາ, ກອງທັບອິດສະຣາແອນໄດ້ໂຈມຕີທາງອາກາດຄັ້ງໃຫຍ່ຕໍ່ “ເປົ້າໝາຍຂອງພັກຮີສໂບນລາລີບັງ” ໂດຍໄດ້ໂຈມຕີ “ເປົ້າໝາຍຂອງພັກຮີສໂບນລາ” ຫຼາຍກວ່າ 1.300 ແຫ່ງ.