ວັນທີ 23 ກັນຍານີ້, ກະຊວງການຄ້າອາເມຣິກາໄດ້ສະເໜີຈະຫ້າມບໍ່ໃຫ້ລົດທີ່ເຊື່ອມຕໍ່ອິນເຕີເນັດ ແລະ ລົດທີ່ບໍ່ມີຄົນຂັບຢູ່ຕາມຖະໜົນຫົນທາງຂອງອາເມຣິການັ້ນ ນຳໃຊ້ຊອບແວ ແລະ ຮາດແວທີ່ຜະລິດໂດຍຈີນ ເຊິ່ງໄດ້ຖືກຫາງສຽງສາກົນສົງໄສ ແລະ ຕຳໜິຂຶ້ນມາທັນທີ.

ປັດຈຸບັນ, ຮາດແວລົດທີ່ຈີນສົ່ງອອກໄປສູ່ອາເມຣິກາ ຕົ້ນຕໍແມ່ນຢາງລົດ, ດຸມລໍ້ລົດ ແລະ ເຄື່ອງອາໄຫຼ່ອື່ນໆ, ສ່ວນຊອບແວສ່ວນຫຼາຍແມ່ນກ່ຽວຂ້ອງກັບລະບົບຂັບລົດແບບອັດຕະໂນມັດ, ແຕ່ປະລິມານການສົ່ງອອກໄປສູ່ອາເມຣິກາແມ່ນມີຈຳນວນໜ້ອຍທີ່ສຸດ. “ຄຳສັ່ງເກືອດຫ້າມ” ສະບັບໃໝ່ຂອງອາເມຣິກາແມ່ນມີຄວາມຜິດພາດຢ່າງຮ້າຍ, ທີ່ຈິງແລ້ວແມ່ນເພື່ອປະຕິບັດການ “ຕັດສາຍພົວພັນດ້ານການຄ້າ” ກັບຈີນຕື່ມອີກ ເຊິ່ງຈະນຳເອົາຄວາມບໍ່ແນ່ນອນມາໃຫ້ແກ່ອຸດສາຫະກຳຜະລິດລົດທົ່ວໂລກຫຼາຍກວ່າເກົ່າ.

ໃນໜຶ່ງປີຜ່ານມາ, ອາເມຣິກາໄດ້ປະຕິບັດມາດຕະການທີ່ແນໃສ່ອຸດສາຫະກຳຜະລິດລົດຂອງຈີນເລື້ອຍໆ. ໃນເດືອນກຸມພາປີນີ້, ລັດຖະບານອາເມຣິກາໄດ້ປະກາດເນັ້ນໃສ່ການສືບສວນອັນທີ່ເອີ້ນວ່າ “ຄວາມສ່ຽງດ້ານອິນເຕີເນັດ” ທີ່ນຳເອົາມາໂດຍລົດທີ່ເຊື່ອມຕໍ່ອິນເຕີເນັດຂອງຈີນດ້ວຍຂໍ້ອ້າງອັນທີ່ເອີ້ນວ່າ “ຄວາມໝັ້ນຄົງແຫ່ງຊາດ” ໂດຍມີເຈດຈຳນົງຈະຫ້າມບໍ່ໃຫ້ລົດທີ່ຈຳໜ່າຍຢູ່ອາເມຣິການຳໃຊ້ລະບົບຊອບແວ ແລະ ຮາດແວທີ່ຜະລິດໂດຍຈີນ; ນາງຈີນາ ໄຣມອນໂດ ລັດຖະມົນຕີກະຊວງການຄ້າອາເມຣິກາ ແລະ ເຈົ້າໜ້າທີ່ຫຼາຍຄົນຂອງອາເມຣິກາ ໄດ້ປັ້ນແຕ່ງຂ່າວລື ໂດຍໃສ່ຮ້າຍປ້າຍສີວ່າ ວິສາຫະກິດຜະລິດລົດຂອງຈີນກຳລັງເກັບກຳຂໍ້ມູນບຸກຄົນຢູ່ອາເມຣິກາ ເຊິ່ງເປັນ “ຄວາມສ່ຽງຢ່າງຊັດເຈນ”; ໃນອາທິດທີ່ຜ່ານມາ, ລັດຖະບານອາເມຣິກາຍັງໄດ້ຕົກລົງຈະເພີ່ມການເກັບພາສີ 100% ຕໍ່ລົດໃຊ້ພະລັງງານໄຟຟ້າຂອງຈີນ ເພື່ອກີດກັ້ນການພັດທະນາຂອງອຸດສາຫະກຳຜະລິດລົດຂອງຈີນ.

ພວກເຮົາສາມາດສັງເກດເຫັນໄດ້ງ່າຍໆວ່າ: ຢູ່ເບື້ອງຫຼັງຂອງເລື່ອງນີ້ຍັງມີ ເຈດຈຳນົງດ້ານການເມືອງ. ເອົາການເຄື່ອນໄຫວປົກກະຕິດ້ານເສດຖະກິດຍັດໃສ່ກະຕ່າ “ຄວາມໝັ້ນຄົງແຫ່ງຊາດ” ເປັນການກະທຳທີ່ນັກການເມືອງອາເມຣິກາມັກນຳໃຊ້ໃນຊຸມປີທີ່ຜ່ານມາ ເພື່ອກີດກັ້ນ ແລະ ໃສ່ຮ້າຍປ້າຍສີຈີນ ທັງເປັນກົນອຸບາຍຂອງພວກເຂົາ ເພື່ອສ້າງແນວຄິດຕໍ່ຕ້ານຈີນໃຫ້ແກ່ປະຊາຊົນ ໂດຍມີເຈຕະນາຫວັງຢາກສ້າງພື້ນຖານດ້ານຫາງສຽງ ເພື່ອວາງນະໂຍບາຍທີ່ຮຸນແຮງຕໍ່ຈີນຕື່ມອີກ.