ວັນທີ 24 ກັນຍານີ້, ງານວາງສະແດງສິນຄ້າຈີນ-ອາຊຽນ ແລະ ກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 21 ໄດ້ໄຂຂຶ້ນຢູ່ນະຄອນນານນິງເຂດປົກຄອງຕົນເອງເຜົ່າຈ້ວາງກວາງຊີຂອງຈີນ. ງານວາງສະແດງແລະກອງປະຊຸມຄັ້ງນີ້ມີຫົວຂໍ້ຫຼັກວ່າ “ພັດທະນາຮ່ວມກັນແບບເປັນເພື່ອນມິດທີ່ມີຄວາມສະ ໜິດສະໜົມກັນ, ມີຄວາມຈິງໃຈຕໍ່ກັນ, ໃຫ້ຜົນປະໂຫຍດແກ່ກັນແລະມີຄວາມ ໂອບເອື້ອອາລີຕໍ່ກັນ ເພື່ອສ້າງອະນາຄົດທີ່ດີງາມ: ຊຸກຍູ້ການສ້າງເຂດການຄ້າເສລີຈີນ-ອາຊຽນ 3.0 ແລະ ການເຕີບໂຕຢ່າງມີຄຸນນະພາບສູງໃນພາກພື້ນ”, ຈະວາງສະແດງຜົນງານຫຼ້າສຸດແຫ່ງການຮ່ວມມືລະຫວ່າງຈີນກັບປະເທດສະມາຊິກອາຊຽນ.

ງານວາງສະແດງແລະກອງປະຊຸມຄັ້ງນີ້ໄດ້ເຊີນຜູ້ຕາງໜ້າພາກສ່ວນຕ່າງໆຈຳນວນ 1.100 ກວ່າທ່ານເຂົ້າຮ່ວມ ເຊິ່ງລວມທັງຜູ້ນຳຈີນແລະຕ່າງປະເທດ, ເຈົ້າໜ້າທີ່ລັດຖະບານ, ທູຕານຸທູດປະເທດສະມາຊິກອາຊຽນປະຈຳຈີນແລະອື່ນໆ. ໂດຍຜ່ານພິທີໄຂກອງປະຊຸມແລະກິດຈະກຳສົນທະນາລະດັບສູງຕ່າງໆ, ຜູ້ນຳຈີນແລະປະເທດໃນອາຊຽນໄດ້ເຕົ້າໂຮມຄວາມເຫັນທີ່ເປັນເອກະພາບກັນດ້ານການຮ່ວມມືຍຸດທະສາດທີ່ກວ້າງຂວາງກວ່າເກົ່າ ໂດຍປິ່ນອ້ອມການລົງເລິກສາຍພົວພັນຄູ່ຮ່ວມຍຸດທະສາດຮອດດ້ານຈີນ-ອາຊຽນ, ການຊຸກຍູ້ໃຫ້ເຂດການຄ້າເສລີຈີນ-ອາຊຽນ 3.0 ດຳເນີນງານດ້ວຍຄວາມສະດວກ ແລະ ການຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະພາບສູງ, ເພີ່ມຄວາມໄວ້ເນື້ອເຊື່ອໃຈກັນທາງດ້ານການເມືອງຕື່ມອີກ ແລະ ຊຸກຍູ້ການສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ.