ວັນທີ 24 ກັນຍານີ້ຢູ່ນະຄອນຄຸນໝິງແຂວງຢຸນນານຈີນ, ໄດ້ມີການເປີດນໍາໃຊ້ຂະບວນລົດໄຟຂົນສົ່ງສິນຄ້າດ້ວຍຫຼາຍວິທີແຕ່ “ໃຊ້ໃບນໍາສົ່ງສິນຄ້າພຽງແຕ່ໃບດຽວ” ລະຫວ່າງຈີນ-ລາວ-ໄທ, ຂະບວນລົດໄຟຂົນສົ່ງສິນຄ້າທີ່ບັນທຸກພືດຜັກຂະບວນໜຶ່ງໄດ້ອອກຈາກນະຄອນຄຸນໝິງຜ່ານທາງລົດໄຟຈີນ-ລາວມຸ່ງໜ້າສູ່ລາວ ແລະ ໄທ. ການນໍາໃຊ້ຮູບແບບຂົນສົ່ງສິນຄ້າດ້ວຍຫຼາຍວິທີແຕ່ “ໃຊ້ໃບນໍາສົ່ງສິນຄ້າພຽງແຕ່ໃບດຽວ”, ໄດ້ຫຼຸດຂັ້ນຕອນ ແລະ ເວລາການຄ່ຽນຖ່າຍສິນຄ້າໃຫ້ໜ້ອຍລົງ ທັງໄດ້ຊຸກຍູ້ການຈໍລະຈອນສິນຄ້າໃຫ້ຫຼຸດຕົ້ນທຶນລົງ, ຍົກຄຸນນະພາບ ແລະ ປະສິດທິພາບໃຫ້ສູງຂຶ້ນ.

   ຂະບວນລົດໄຟຂົນສົ່ງສິນຄ້າທີ່ເປີດນໍາໃຊ້ໃນເທື່ອນີ້ແມ່ນ “ຂະບວນລົດໄຟຢຸນນານລ້ານຊ້າງ-ແມ່ຂອງ” ໄດ້ນໍາໃຊ້ຕູ້ຄອນເທັນເນີແຊ່ເຢັນແບບອັດສະລິຍະທັງໝົດ, ພາຍຫຼັງຂະບວນລົດໄຟດັ່ງກ່າວອອກຈາກນະຄອນຄຸນໝິງຜ່ານທາງລົດໄຟຈີນ-ລາວໄປເຖິງນະຄອນຫຼວງວຽງຈັນຂອງລາວແລ້ວ, ຈະເດີນທາງຕໍ່ເພື່ອມຸ່ງໜ້າໄປສູ່ຕະຫຼາດຈຸດໝາຍປາຍທາງຢູ່ໄທໂດຍຜ່ານທາງຫຼວງ, ເຊິ່ງໃຊ້ເວລາໃນການເດີນທາງທັງໝົດແມ່ນ 3 ມື້ເຄິ່ງ. ພ້ອມດຽວກັນນີ້, ຂະບວນລົດໄຟດັ່ງກ່າວຍັງຈະຂົນສົ່ງໝາກກ້ວຍລາວໄປນະຄອນຄຸນໝິງ.