ວັນທີ 23 ກັນຍານີ້, ກອງປະຊຸມສຸດຍອດອະນາຄົດຂອງອົງການສະຫະປະຊາຊາດທີ່ດຳເນີນເປັນເວລາ 2 ວັນໄດ້ອັດລົງຢູ່ນະຄອນນິວຢອກຂອງອາເມຣິກາ. ທ່ານຫວາງຢີ້ ກຳມະການກົມການເມືອງສູນກາງພັກຄອມມູນິດຈີນ ລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມສຸດຍອດຄັ້ງນີ້ໃນຖານະເປັນຜູ້ຕາງໜ້າພິເສດຂອງທ່ານສີຈິ້ນຜິງ ປະທານປະເທດຈີນ ແລະກ່າວຄຳປາໄສ. ກອງປະຊຸມສຸດຍອດຄັ້ງນີ້ເປັນໜຶ່ງໃນກອງປະຊຸມລະດັບສູງທີ່ມີຄວາມສຳຄັນທີ່ສຸດຂອງອົງການສະຫະປະຊາຊາດໃນປີນີ້, ການຈັດກອງປະຊຸມສຸດຍອດໃນຄັ້ງນີ້ພໍດີຖືກກັບສະພາບການຟື້ນຕົວຂອງເສດຖະກິດໂລກທີ່ຊ້າລົງ, ການປະທະກັນໃນພາກພື້ນນັບມື້ນັບຮ້າຍແຮງຂຶ້ນ, ສິ່ງທ້າທາຍທີ່ເກີດຈາກການປ່ຽນແປງຂອງດິນຟ້າອາກາດ ວິກິດການດ້ານສະບຽງອາຫານ ແລະ ພະລັງງານທີ່ມີຄວາມສະຫຼັບສັບຊ້ອນກັນຫຼາຍຂຶ້ນ, ໂລກບໍ່ພຽງແຕ່ຕ້ອງພິຈາລະນາລະບົບການບໍລິຫານໂລກທີ່ມີຢູ່ໃນປັດຈຸບັນເທົ່ານັ້ນ, ແຕ່ຍັງຕ້ອງພິຈາລະນາທິດທາງທີ່ກ້າວໜ້າໃນອະນາຄົດອີກດ້ວຍ.

ສິ່ງທີ່ປະຈັກຕາຕໍ່ຄົນທັງຫຼາຍນັ້ນຄື ໃນມື້ທຳອິດຂອງກອງປະຊຸມສຸດຍອດຄັ້ງນີ້, ຝ່າຍຕ່າງໆໄດ້ເປິກສາຫາລື ແລະ ຮັບຮອງເອົາ “ສັນຍາອະນາຄົດ” ພ້ອມດ້ວຍ “ສັນຍາດີຈິຕອນທົ່ວໂລກ” ແລະ “ຖະແຫຼງການກ່ຽວກັບບັນຫາຂອງລູກຫຼານຄົນຮຸ່ນຫຼັງ” ທີ່ເປັນເອກະສານແນບທ້າຍຂອງ “ສັນຍາອະນາຄົດ”. ສັນຍານີ້ໄດ້ຜ່ານການເຈລະຈາຢ່າງຮີບດ່ວນມາເປັນເວລາ 2 ປີຈຶ່ງໄດ້ບັນລຸການເຊັນສັນຍາໃນທີ່ສຸດ, ມັນບໍ່ແມ່ນເລື່ອງງ່າຍ, ສະແດງໃຫ້ເຫັນເຖິງຄວາມຕັດສິນໃຈ ແລະ ຄວາມປາດຖະໜາຂອງຝ່າຍຕ່າງໆໃນການປະຕິຮູບລະບົບການບໍລິຫານໂລກ, ຟື້ນຟູລັດທິຫຼາຍຝ່າຍ ແລະ ຮັບມືກັບສິ່ງທ້າທາຍໃຫ້ດີກວ່າເກົ່າ.

ຈີນໄດ້ສະໜັບສະໜູນຢ່າງເດັດດ່ຽວຕໍ່ກອງປະຊຸມສຸດຍອດຄັ້ງນີ້, ໄດ້ໃຊ້ການກະທຳຕົວຈິງເພື່ອລົງເລິກປະຕິບັດລັດທິຫຼາຍຝ່າຍຢ່າງແທ້ຈິງ, ໄດ້ປະກອບສ່ວນອັນສຳຄັນເຂົ້າໃນການສ້າງລະບຽບສາກົນທີ່ຍຸຕິທຳ ແລະ ສົມເຫດສົມຜົນກວ່າເກົ່າ.

ຈີນໃນຖານະເປັນສະມາຊິກຖາວອນຂອງສະພາຄວາມໝັ້ນຄົງອົງການສະຫະປະຊາຊາດ, ໄດ້ລົງເລິກເຂົ້າຮ່ວມການເປິກສາຫາລືກ່ຽວກັບ “ສັນຍາອະນາຄົດ”, ໄດ້ສະເໜີຄວາມເຫັນ ແລະ ຂໍ້ສະເໜີຕ່າງໆທີ່ມີລັກສະນະສ້າງສັນບົນພື້ນຖານຂອງທັດສະນະປະຊາຄົມຮ່ວມຊາຕາກຳຂອງມວນມະນຸດ. ໃນເວລາກ່າວຄຳປາໄສຕາມຫົວຂໍ້ທີ່ວ່າ “ກຳແໜ້ນຊາຕາກຳຮ່ວມ ຮ່ວມກັນສ້າງອະນາຄົດທີ່ດີງາມ”, ທ່ານຫວາງຢີ້ກ່າວເນັ້ນວ່າ, ພວກເຮົາຍິນດີເກາະແຂນກັບປະເທດຕ່າງໆໃນໂລກກ້າວເດີນໄປຂ້າງໜ້າ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ຮ່ວມກັນສ້າງອະນາຄົດທີ່ມີສັນຕິພາບ ແລະ ດີງາມກວ່າເກົ່າ. ວັນທີ 19 ກັນຍານີ້, ຈີນໄດ້ເຜີຍແຜ່ “ເອກະສານຫຼັກໝັ້ນຂອງຈີນໃນການເຂົ້າຮ່ວມກອງປະຊຸມສຸດຍອດອະນາຄົດຂອງອົງການສະຫະປະຊາຊາດ ແລະ ກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 79” ໂດຍຊີ້ອອກວ່າ, ຈີນໄດ້ໃຫ້ຄຳຕອບແຫ່ງຍຸກສະໄໝ ຄື ສ້າງປະຊາຄົມຮ່ວມຊາຕາກຳຂອງມວນມະນຸດ ແລະ ຄຳຕອບແຫ່ງຍຸກສະໄໝດັ່ງກ່າວແມ່ນສອດຄ່ອງກັບຈິດໃຈການຮ່ວມມືທີ່ສົ່ງເສີມໃນ “ສັນຍາອະນາຄົດ” ແລະ ລະບົບການບໍລິຫານໂລກໃນລະດັບສູງ ເຊິ່ງໄດ້ຢືນຢັນວ່າທັດສະນະຂອງຈີນແມ່ນສອດຄ່ອງກັບຄວາມປາດຖະໜາຂອງຄົນທົ່ວໄປ ແລະ ທ່າອຽງໂດຍລວມ.

ເນື້ອໃນ “ສັນຍາອະນາຄົດ” ລະບຸວ່າ: “ການບັນລຸການພັດທະນາແບບຍືນຍົງ ແມ່ນຈະບໍ່ປ່ອຍໃຫ້ໃຜເຫຼືອໄວ້ຂ້າງຫຼັງ ນັ້ນແມ່ນເປົ້າໝາຍໃຈກາງຂອງລັດທິຫຼາຍຝ່າຍໃນປັດຈຸບັນ ແລະ ໄລຍະຕໍ່ໄປຢ່າງຖາວອນ.” ຈີນສຸມໃສ່ການສ້າງເວທີການຮ່ວມມືສາກົນທີ່ສຳຄັນ, ຊຸກຍູ້ການຮ່ວມມືຕົວຈິງກັບປະເທດພວມພັດທະນາໃນຂົງເຂດຕ່າງໆ, ລົງເລິກປະຕິບັດລັດທິຫຼາຍຝ່າຍທີ່ແທ້ຈິງ, ໄດ້ປະກອບສ່ວນກຳລັງເຂົ້າໃນການຊຸກຍູ້ລະບົບການບໍລິຫານໂລກໃຫ້ກ້າວໄປສູ່ທິດທາງທີ່ຍຸຕິທຳ ແລະ ສົມເຫດສົມຜົນກວ່າເກົ່າ. ໂດຍອີງໃສ່ກົນໄກຮ່ວມມືຫຼາຍຝ່າຍ, ຈີນໄດ້ຊຸກຍູ້ປະເທດທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ເຊື່ອມໂຍງເຊື່ອມຈອດກັນ, ປັບປຸງພື້ນຖານໂຄງລ່າງຂອງປະເທດອາຊີ ອາຟຣິກາ ແລະ ອາເມຣິກາລາຕິນ, ຊຸກຍູ້ການສ້າງເຄືອຂ່າຍການຈໍລະຈອນສິນຄ້າ ການຄ້າ ແລະ ພະລັງງານຂອງປະເທດພວມພັດທະນາ, ເພີ່ມພະລັງຂັບເຄື່ອນໃຫ້ແກ່ການພັດທະນາຂອງພາກພື້ນ.

ນອກນີ້, ຈີນໄດ້ຊ່ວຍເຫຼືອປະເທດພວມພັດທະນາຍົກລະດັບຂີດຄວາມສາມາດຂອງຕົນໃນການພັດທະນາຢ່າງເປັນເຈົ້າຕົນເອງດ້ວຍຄວາມຈິງໃຈຕະຫຼອດມາ, ໄດ້ປະກອບສ່ວນອັນຕັ້ງໜ້າເຂົ້າໃນການຊຸກຍູ້ຂະບວນການຫັນເປັນທັນສະໄໝຂອງໂລກ. ຈີນໄດ້ສະໜອງການຊ່ວຍເຫຼືອດ້ານການພັດທະນາໃຫ້ແກ່ 160 ກວ່າປະເທດ, ແລະຮ່ວມມືກັບອີກ 150 ກວ່າປະເທດ ເພື່ອຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ນອກນີ້ຍັງໄດ້ຮ່ວມກັບ 100 ກວ່າປະເທດ ແລະ ອົງການຈັດຕັ້ງສາກົນຫຼາຍແຫ່ງ ເຊິ່ງລວມທັງອົງການສະຫະປະຊາຊາດຊຸກຍູ້ການຮ່ວມມືພາຍໃຕ້ຂອບຂໍ້ລິເລີ່ມການພັດທະນາຂອງໂລກ, ສ້າງຕັ້ງກອງທຶນພັດທະນາຂອງໂລກ ແລະ ການຮ່ວມມືໃຕ້ໃຕ້, ສະໜັບສະໜູນການປະຕິບັດ 150 ກວ່າໂຄງການ.

ກອງປະຊຸມສຸດຍອດອະນາຄົດໄດ້ສິ້ນສຸດລົງແລ້ວ, ແຕ່ການປະຕິຮູບຫາກໍເລີ່ມຕົ້ນ. ສາມາດຄາດຄະເນໄດ້ວ່າ, ອຸດົມການຂອງອົງການສະຫະປະຊາຊາດທີ່ຟື້ນຟູລັດທິຫຼາຍຝ່າຍ ແລະ ປະຕິຮູບລະບົບການບໍລິຫານໂລກ ອາດຈະປະສົບກັບອຸປະສັກຕ່າງໆໃນການປະຕິບັດຕົວຈິງ. ຊາວຈີນມັກເວົ້າວ່າ: “ເຖິງວ່າເປັນເສັ້ນທາງທີ່ມີອຸປະສັກ ແລະ ຍາວໄກ, ຂໍແຕ່ເດີນທາງຕໍ່ໄປຢ່າງບໍ່ລົດລະກໍຈະໄປຮອດຈຸດໝາຍປາຍທາງໃນທີ່ສຸດ.” ເຊື່ອວ່າພາຍໃຕ້ການຊີ້ນຳຈາກແນວຄິດຂອງປະຊາຄົມຮ່ວມຊາຕາກຳຂອງມວນມະນຸດ ແລະ “ສັນຍາອະນາຄົດ”, ຈະມີປະເທດນັບມື້ນັບຫຼາຍກວ່າເກົ່າເຂົ້າຮ່ວມກັບຈີນກ້າວເດີນໄປສູ່ອະນາຄົດທີ່ດີງາມກວ່າເກົ່າ.