ວັນທີ 25 ກັນຍານີ້ຢູ່ສໍານັກງານໃຫຍ່ອົງການສະຫະປະຊາຊາດທີ່ນະຄອນນິວຢອກຂອງອາເມຣິກາ, ທ່ານ ຫວາງຢີ້ ກໍາມະການກົມການເມືອງສູນກາງພັກຄອມມູນິດຈີນ ລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມງານນໍາສະເໜີ “ຂໍ້ລິເລີ່ມການພັດທະນາທົ່ວໂລກສະໜັບສະໜູນປະເທດເຂດໂລກໃຕ້-ຈີນພວມມີການເຄື່ອນໄຫວ”.

   ໃນໂອກາດນີ້, ທ່ານ ຫວາງຢີ້ ໄດ້ກ່າວປາໄສວ່າ: ຄວາມທັນສະໄໝຂອງໂລກບໍ່ຄວນໃຫ້ປະເທດໃດໜຶ່ງຕົກອອກຈາກຖັນແຖວ, ການສະໜັບສະໜູນປະເທດເຂດໂລກໃຕ້ໃຫ້ມີການພັດທະນາ ແລະ ຄວາມຈະເລີນຮຸ່ງເຮືອງເປັນທິດທາງບຸລິມະສິດຂອງຂໍ້ລິເລີ່ມການພັດທະນາທົ່ວໂລກ. ພວກເຮົາຍິນດີສຸມຄວາມພະຍາຍາມຮ່ວມກັບຝ່າຍຕ່າງໆລົງເລິກການຮ່ວມມືໃນຂໍ້ລິເລີ່ມການພັດທະນາທົ່ວໂລກ, ເລັ່ງລັດຈັດຕັ້ງປະຕິບັດວາລະການພັດທະນາແບບຍືນຍົງຮອດປີ 2030 ຂອງອົງການສະຫະປະຊາຊາດ ເພື່ອເຮັດໃຫ້ທຸກປະເທດ ແລະ ທຸກຄົນໄດ້ຮັບຜົນປະໂຫຍດຈາກຄວາມທັນສະໄໝ.

   ທ່ານ ຟິເລມອນ ຢາງ ປະທານສະມັດຊາໃຫຍ່ອົງການສະຫະປະຊາຊາດສະໄໝທີ 79 ກ່າວວ່າ: ຈີນສະເໜີຂໍ້ລິເລີ່ມການພັດທະນາທົ່ວໂລກອອກມາແມ່ນໄດ້ສ່ອງແສງໃຫ້ເຫັນເຖິງຄວາມສາມາດໃນການນໍາພາທີ່ແຂງແຮງຂອງຈີນ. ຂໍ້ລິເລີ່ມດັ່ງກ່າວໄດ້ຮັບການສະໜັບສະໜູນຈາກຫຼາຍປະເທດ ໂດຍໄດ້ສະໜອງຊ່ອງທາງໃໝ່ໃນການເລັ່ງລັດເພື່ອບັນລຸເປົ້າໝາຍການພັດທະນາແບບຍືນຍົງ ກໍຄືຊ່ວຍເຫຼືອປະເທດເຂດໂລກໃຕ້ນໍາອີກ ເຊິ່ງມີຄວາມໝາຍສໍາຄັນເປັນຢ່າງຍິ່ງ.