ອີງຕາມຖະແຫຼງການສະບັບໜຶ່ງທີ່ທໍານຽບຂາວ ຫຼື ທໍານຽບປະທານາທິບໍດີອາເມຣິກາແຈ້ງໃຫ້ຮູ້ວ່າ: ວັນທີ 26 ກັນຍານີ້, ທ່ານ ໂຈ ໄບເດັນ ປະທານາທິບໍດີອາເມຣິກາໄດ້ລົງນາມໃນຮ່າງກົດໝາຍວ່າດ້ວຍລາຍຈ່າຍໃນໄລຍະສັ້ນສະບັບໜຶ່ງ ໂດຍຈະສືບຕໍ່ສະໜອງທຶນໃຫ້ແກ່ອົງການຕ່າງໆຂອງລັດຖະບານອາເມຣິກາຈົນຮອດວັນທີ 20 ທັນວາ 2024 ເພື່ອຮັບປະກັນໃຫ້ລັດຖະບານອາເມຣິກາໄດ້ເຮັດວຽກຢ່າງຕໍ່ເນື່ອງ.

   ນອກນີ້, ທ່ານ ໂຈ ໄບເດັນ ຍັງໄດ້ສົ່ງຈົດໝາຍເຖິງປະທານສະພາຕໍ່າ ແລະ ສະພາສູງອາເມຣິກາໂດຍມີເນື້ອໃນລະບຸວ່າ: ທ່ານໄດ້ກໍານົດທຶນເຫຼົ່ານີ້ໃຫ້ເປັນທຶນສຸກເສີນເພື່ອຕອບສະໜອງຕາມຄວາມຮຽກຮ້ອງຕ້ອງການທີ່ສຸກເສີນ ແລະ ຫຼີກເວັ້ນບໍ່ໃຫ້ລັດຖະບານຖືກຈໍາກັດດ້ານງົບປະມານລາຍຈ່າຍທົ່ວໄປ.

   ຕາມຂ່າວແຈ້ງໃຫ້ຮູ້ວ່າ: ວັນທີ 25 ກັນຍານີ້, ສະພາຕໍ່າ ແລະ ສະພາສູງຂອງອາເມຣິກາໄດ້ປ່ອນບັດຮັບຮອງຮ່າງກົດໝາຍວ່າດ້ວຍລາຍຈ່າຍໃນໄລຍະສັ້ນເປັນເວລາ 3 ເດືອນ.