ວັນທີ1ຕຸລາ2024ເປັນວັນສະຖາປະນາສປຈີນຄົບຮອບ75ປີ.

ທ່ານຍັງຈື່ຈຳວັນເວລາທີ່ລໍຄອຍຈົດໝາຍສະບັບໜຶ່ງຢ່າງໃຈຈົດໃຈຈໍ່ໃນເມື່ອກ່ອນໄດ້ບໍ່? ສຳລັບປະເທດຈີນແລ້ວ, ແຕ່ກ່ອນຕ້ອງລຽນຄິວລໍຖ້າຝາກພັດສະດຸຢູ່ໂຮງໄປສະນີຈົນມາຮອດປັດຈຸບັນແມ່ນສາມາດສັ່ງຊື້ເຄື່ອງດ້ວຍແອບຢູ່ໃນມືຖືໄດ້, ແຕ່ກ່ອນແມ່ນຜູ້ໄປສະນີ ບອກວ່າ “ມີຈົດໝາຍຂອງທ່ານ” ແຕ່ມາຮອດທຸກມື້ນີ້ແມ່ນອ້າຍບ່າວສົ່ງເຄື່ອງດ່ວນບອກວ່າ: “ນີ້ແມ່ນເຄື່ອງສົ່ງດ່ວນຂອງທ່ານ.” ຕໍ່ໄປຜູ້ຂຽນຈະພາທ່ານໄປຮັບຮູ້ກ່ຽວກັບການປ່ຽນແປງຢ່າງໃຫຍ່ຫຼວງດ້ານຊີວິດການເປັນຢູ່ຂອງປະຊາຊົນຈີນໃນຕະຫຼອດໄລຍະ75ປີຜ່ານມາໂດຍຜ່ານຈາກວິວັດທະນາການພັດທະນາຂະແໜງການໄປສະນີຂອງຈີນ.

  ພໍແຕ່ໄດ້ຍິນສຽງກະດິງລົດຖີບດັງຂຶ້ນ ກໍຮູ້ໂລດວ່າ ຜູ້ໄປສະນີມາແລ້ວ!

ຜູ້ໄປສະນີສົ່ງເຄື່ອງໄປສະນີດ້ວຍລົດຖີບໃນເມື່ອກ່ອນ

ພໍ່ເຖົ້າເສີງເວີນເຊິ່ນ ປີນີ້ເພິ່ນມີອາຍຸ90ປີແລ້ວ, ເປັນພະນັກງານບຳນານຂອງໂຮງໄປສະນີຕົ່ງຊືນະຄອນຫຼວງປັກກິ່ງ. ໃນຊຸມປີ1950, ເຂົາເຈົ້າແມ່ນສົ່ງເຄື່ອງໄປສະນີດ້ວຍລົດຖີບ, ຢູ່ໜ້າລົດຖີບມີຖົງໃສ່ໜັງສືພິມ, ຢູ່ທ້າຍລົດຖີບແມ່ນແຂວນຖົງໃຫຍ່ສອງອັນ. ປະຊາຊົນຊາວເມືອງສ່ວນຫຼາຍແມ່ນອາໄສຢູ່ເຮືອນພື້ນ, ທຸກເທື່ອທີ່ຜູ້ໄປສະນີຮ້ອງດ້ວຍສຽງດັງວ່າ “ໜັງສືພິມມາແລ້ວ!”, ຫຼາຍຄອບຄົວຢູ່ຮ່ອມຫູທົ້ງຕ່າງກໍມີຄົນອອກມາຕ້ອນຮັບ.

ແມ່ຕູ້ ສຽນໂຢວເຈ ທີ່ດຳລົງຊີວິດຢູ່ເຂດຄຸ້ມຖະໜົນສາວຢາງເມີນເມືອງຕົ່ງເສີງນະຄອນຫຼວງປັກກິ່ງໃຫ້ຮູ້ວ່າ: ຕອນນັ້ນ ສິ່ງທີ່ຄອງຄອຍທີ່ສຸດກໍແມ່ນໃບບິນພັດສະດຸທີ່ຜູ້ໄປສະນີສົ່ງມາໃຫ້, ເຖິງວ່າຈະຕ້ອງໄດ້ໄປເອົາພັດສະດຸຢູ່ໂຮງໄປສະນີດ້ວຍຕົນເອງກໍຕາມ.

   ຖ້າເວົ້າເຖິງເຄື່ອງທີ່ປະຊາຊົນຈີນມັກຝາກທາງໄປສະນີແລ້ວ, ພໍ່ເຖົ້າ ເສີງເວີນເຊິ່ນໄດ້ຫວນຄືນຫຼັງວ່າ: ປະຊາຊົນແມ່ນຝາກທຸກຢ່າງຜ່ານທາງໄປສະນີ, ໃນນີ້ ສິ່ງທີ່ຝາກຫຼາຍທີ່ສຸດແມ່ນຄູປອງສະບຽງອາຫານ, ຄູປອງແຜ່ນແພ ແລະ ຄູປອງນ້ຳມັນປຸງແຕ່ງອາຫານ, ຍັງມີບາງຄົນຝາກຢາງຕີນລົດອີກດ້ວຍ. ບາງຄົນຝາກຊໍ, ສະນັ້ນ, ທາງໂຮງໄປສະນີຈຶ່ງສ້າງຕັ້ງໜ່ວຍສ້ອມແປງເປັນການສະເພາະ, ເພື່ອເຮັດແກັດໄມ້ທີ່ມີຮູບຊົງພິເສດສຳລັບເກັບມ້ຽນຊໍ.

ລະຫວ່າງປີ1949-1978, ເສັ້ນທາງໄປສະນີໃນທົ່ວປະເທດຈີນໄດ້ເພີ່ມຂຶ້ນເກືອບ  7 ເທົ່າ, ເສັ້ນທາງໄປສະນີທີ່ໄປເຖິງເຂດຊົນນະບົດ ແລະ ເຂດຊາຍແດນກໍໄດ້ຂະຫຍາຍອອກຕື່ມອີກຢ່າງຫຼວງຫຼາຍ. ເສັ້ນທາງໄປສະນີໄດ້ເຊື່ອມຕໍ່ເຂດພູດອຍຫ່າງໄກສອກຫຼີກັບໂລກພາຍນອກ ເຮັດໃຫ້ພັດສະດຸໄປສະນີເຂົ້າເຖິງແຕ່ລະຄອບຄົວ.

ທຸງຊາດປັກຢູ່ບ່ອນໃດ, ການບໍລິການໄປສະນີຕ້ອງເຂົ້າເຖິງບ່ອນນັ້ນ.

ທ່ານຊ່າງນານສາຍ ຜູ້ໄປສະນີຂອງໂຮງໄປສະນີຕາແສງເຊິ້ງກ່ານກິ່ງແຂວງປົກຄອງຕົນເອງເຜົ່າລີ້ຊູ້ນູ້ຈ່ຽງແຂວງຢູນນານ

ທ່ານຊ່າງນານສາຍ ເປັນຜູ້ໄປສະນີຂອງໂຮງໄປສະນີຕາແສງເຊິ້ງກ່ານກິ່ງແຂວງປົກຄອງຕົນເອງເຜົ່າລີ້ຊູ້ນູ້ຈ່ຽງແຂວງຢູນນານ, ຊາວບ້ານເຂດພູດອຍຢູ່ທ້ອງຖິ່ນແຫ່ງນັ້ນຕ່າງກໍເອີ້ນລາວວ່າ: “ໂທເອີຮາພະ” ໃນພາສາເຜົ່າລີ້ຊູ້ມີຄວາມໝາຍວ່າ ຜູ້ສົ່ງຈົດໝາຍ. ວັນທີ 1 ມັງກອນ1988, ທ່ານ ຊ່າງນານສາຍໄປເຮັດວຽກຢູ່ທີ່ແຫ່ງນັ້ນ, ຕອນນັ້ນ ລາວຄິດພຽງແຕ່ວ່າໄດ້ມີວຽກເຮັດຢ່າງໜຶ່ງຈັ່ງແມ່ນດີຫຼາຍ, ແຕ່ວ່າ ເມື່ອເຂົ້າເຮັດວຽກຕົວຈິງແລ້ວ, ຈຶ່ງຮູ້ວ່າ ການແບກຖົງໄປສະນີສົ່ງຈົດໝາຍໄປເຖິງສ່ວນເລິກເຂດພູດອຍມັນມີຄວາມຫຍຸ້ງຍາກຊ່ຳໃດ.

ລາວບອກໃຫ້ຮູ້ວ່າ: “ຕອນນັ້ນ, ການສົ່ງເຄື່ອງໄປສະນີຢູ່ພາຍໃນຕາແສງເທື່ອໜຶ່ງຕ້ອງເດີນທາງ380ກິໂລແມັດ, ໃຊ້ເວລາເຖິງ6 ມື້, ຍັງຕ້ອງຂ້າມພູເຂົາທີ່ສູງກວ່າລະດັບໜ້ານ້ຳທະເລປະມານ3700-3800ແມັດຕື່ມອີກ. ໄປບ້ານໜຶ່ງ ເບິ່ງຄືວ່າໄລຍະຫ່າງແບບເສັ້ນຊື່ມີພຽງແຕ່100-200ແມັດເທົ່ານັ້ນ, ແຕ່ຕ້ອງໃຊ້ເວລາເດີນທາງເປັນມື້, ເພາະ ຕ້ອງຂຶ້ນພູລົງພູແບບໜ່ວຍຕໍ່ໜ່ວຍ, ຢູ່ຕາມທາງໄດ້ຍິນແຕ່ສຽງບາດຍ່າງຂອງຕົນແລະສຽງລົມພັດເທົ່ານັ້ນ.”  

ທ່ານ ຕາປີ້ ຄູສອນຂອງໂຮງຮຽນປະຖົມໃຈກາງຕາແສງເຊີ້ງກ່ານ, ກ່ອນໜ້ານີ້22ປີ, ລາວໄດ້ຮັບໃບຮັບຮອງຂອງລາວ, ສ່ວນຜູ້ເອົາໃບຮັບຮອງມາສົ່ງໃຫ້ລາວນັ້ນກໍແມ່ນທ່ານຊ່າງນານສາຍ. ລາວຍັງຈື່ຈຳໄດ້ຢ່າງຄັກແນ່ວ່າ ມື້ນັ້ນ ຝົນຕົກໜັກ, ທ່ານຊ່າງນານສາຍຢືນຢູ່ຕໍ່ໜ້າລາວຕົນໂຕປຽກໝົດ, ແລະໄດ້ເອົາໃບຮັບຮອງອອກຈາກຖົງໄປສະນີແລ້ວມອບໃຫ້ລາວ. ນັ້ນແມ່ນເທື່ອທຳອິດໃນຊີວິດຂອງທ່ານຕາປີ້ທີ່ໄດ້ຮັບໃບຮັບຮອງ ທັງເປັນຈົດໝາຍສະບັບທຳອິດທີ່ລາວໄດ້ຮັບ.

ຢູ່ບົນດິນແດນຈີນອັນກວ້າງໃຫຍ່ໄພສານ ເຄີຍມີເສັ້ນທາງໄປສະນີຫຼາຍຈົນນັບບໍ່ຖ້ວນທີ່ຄົດລ້ຽວທຸລະກັນດານຢູ່ເຂດຫ່າງໄກສອກຫຼີກເຊັ່ນ: ເສັ້ນທາງໄປສະນີມ້າຕ່າງ, ເສັ້ນທາງໄປສະນີສະລິງ, ເສັ້ນທາງໄປສະນີທາງນ້ຳແລະອື່ນໆ. ແນວໃດກໍຕາມ, ບໍ່ວ່າເສັ້ນທາງຈະຍາວໄກຫຍຸ້ງຍາກລຳບາກປານໃດກໍຕາມ,ຜູ້ໄປສະນີຕ້ອງໄປຮອດໄປເຖິງດັ່ງທີ່ ທ່ານຊ່າງນານສາຍເວົ້າວ່າ: ທຸງຊາດປັກຢູ່ບ່ອນໃດ ການບໍລິການໄປສະນີຕ້ອງເຂົ້າເຖິງບ່ອນນັ້ນ.

ປີ2014 ອົງການໄປສະນີແຫ່ງຊາດຈີນໄດ້ປະຕິບັດໂຄງການ “ການບໍລິການໄປສະນີເຂົ້າເຖິງບ້ານຊົນນະບົດ”ຢ່າງເປັນທາງການ.

ປີ2019, ບ້ານບໍລິຫານທັງໝົດໃນທົ່ວປະເທດຈີນໄດ້ບັນລຸເປົ້າໝາຍທີ່ເຂົ້າເຖິງການບໍລິການໄປສະນີໂດຍກົງ.

ປີ2020 ອົງການໄປສະນີແຫ່ງຊາດຈີນໄດ້ເຜີຍແຜ່ແຈ້ງການວ່າດ້ວຍການປະຕິບັດວຽກງານຈຸດສຸມ “ບໍລິການສົ່ງເຄື່ອງດ່ວນເຂົ້າເຖິງຊົນນະບົດ”

ມາຮອດທ້າຍປີ2022, ບ້ານດັ້ງເດີມທີ່ຢູ່ເຂດຊາຍແດນທັງໝົດ3461ບ້ານໃນທົ່ວປະເທດຈີນໄດ້ບັນລຸການເຂົ້າເຖິງການບໍລິການໄປສະນີ.

ນາງໂຈ່ວສາງຮວາ ຊາວສວນປູກໝາກລະແຊງເຂດຊຸມຊົນຄາລາບາເຄີ ເມືອງໂຮໂກສເຂດປົກຄອງຕົນເອງອຸຍເກີຊິ່ນຈ່ຽງເກັບໝາກລະແຊັງຢູ່ໃນສວນ

ທຸກມື້ນີ້ ຢູ່ຈີນຄົນທັງຫຼາຍຕ່າງກໍຮູ້ສຶກປະທັບໃຈຫຼາຍຕໍ່ຄວາມວ່ອງໄວແລະສະດວກຂອງການບໍລິການສົ່ງເຄື່ອງດ່ວນ. ປ້າຫຼີລີ້ຜິງ ຊາວບ້ານບ້ານສ່ານຊ້າກ່າສານະຄອນຊິງອ່ານເຂດປົກຄອງຕົນເອງມົງໂກໃນ ນິຍົມຊື້ເຄື່ອງຜ່ານທາງອອນລາຍ, ລາວບອກວ່າ:  “ຊື້ທຸກຢ່າງ, ມັນສະດວກເດ້!” ນາງໂຈ່ວສາງຮວາ ຊາວສວນປູກໝາກລະແຊັງເຂດຊຸມຊົນຄາລາບາເຄີ ເມືອງໂຮໂກສເຂດປົກຄອງຕົນເອງອຸຍເກີຊິ່ນຈ່ຽງໃຫ້ຮູ້ວ່າ: “ຕອນເຊົ້າໝາກລະແຊັງຍັງຫ້ອຍຢູ່ເທິງຕົ້ນຂອງມັນ, ແຕ່ຕອນບ່າຍກໍຖືກຈັດສົ່ງໄປຕ່າງແຂວງແລ້ວ, ຍັງສົ່ງອອກໄປຂາຍຢູ່ກາຊັກສະຖານນຳອີກ, ຈັ່ງແມ່ນດີໃຈຫຼາຍ!”, ນາງມ້ຽວຊິນຫຼິນ ຊາວນະຄອນຊູໂຈ່ວແຂວງຈ່ຽງຊູເວົ້າວ່າ:  “ໃຊ້ແອບຢູ່ໃນມືຖືກໍສາມາດຕິດຕາມຄວາມຄືບໜ້າຂອງການສົ່ງເຄື່ອງດ່ວນໄດ້, ຕື່ນນອນມາປັບ, ເຄື່ອງກໍສົ່ງມາເຖິງທີ່ແລ້ວ!”

ອ້າຍບ່າວສົ່ງເຄື່ອງດ່ວນທີ່ບິນໄດ້ໄວທີ່ສຸດ ຢາກບິນໄປໄກກວ່າເກົ່າອີກ

ວັນທີ 26 ມິຖຸນາ 2024, ເສັ້ນທາງການບິນແຕ່ນະຄອນນານກິ່ງຈີນຫາປະເທດລຸກຊຳບວກທີ່ເຊິ່ງເປັນເສັ້ນທາງການບິນຂ້າມທະວີບສາຍທຳອິດທີ່ອົງການໄປສະນີແຫ່ງຊາດຈີນເປັນຜູ້ດຳເນີນການບິນດ້ວຍຕົນເອງນັ້ນໄດ້ເປີດບໍລິການຢ່າງເປັນທາງການ.

ການຂົນສົ່ງເຄື່ອງດ່ວນດ້ວຍສາຍການບິນໄປສະນີຈີນຢູ່ນະຄອນນານກິ່ງ

ທ້າວຢວີຢີ້ ນັກບິນຂອງສາຍການບິນໄປສະນີຈີນ ໄດ້ຂັບຍົນບິນອອກຈາກນະຄອນນານກິ່ງ ເທດສະບານແຂວງຈ່ຽງຊູເດີນທາງໄປລົງຈອດຢູ່ປະເທດລຸກຊຳບວກ, ຫຼັງຈາກນັ້ນ, ພັດສະດຸດ່ວນໄດ້ຜ່ານຈາກລະບົບຂົນສົ່ງພາກພື້ນດິນຖືກຈັດສົ່ງໄປ36ປະເທດແລະເຂດແຄວ້ນຢູ່ອ້ອມຂ້າງທັນທີ.

ເນື່ອງຈາກວ່າການຂົນສົ່ງເຄື່ອງດ່ວນລ້ວນແຕ່ເປັນຖ້ຽວບິນຍາມກາງຄືນທັງໝົດ, ເມື່ອນັ່ງຢູ່ໃນຫ້ອງຂັບ, ທ້າວຢວີຢີ້ເບິ່ງອອກນອກປ່ອງຢ້ຽມຍົນ ມັກຈະເຫັນຕາເວັນຄ່ອຍໆພົ້ນຂຶ້ນ, ຮູ້ສຶກວ່າມັນອັດສະຈັນຫຼາຍ ແລະ ພາກພູມໃຈຫຼາຍ. ລາວບອກວ່າ： “ຂ້ອຍກໍສົມເປັນອ້າຍບ່າວສົ່ງເຄື່ອງດ່ວນຜູ້ໜຶ່ງໄດ໋ເນາະ ແລະພວມສຸມໃສ່ການເປັນອ້າຍບ່າວສົ່ງເຄື່ອງດ່ວນທີ່ບິນໄດ້ໄວທີ່ສຸດ.”

ແຕ່ກ່ອນ,ເສັ້ນທາງຍາວໄກຫຼາຍ, ລົດແລະມ້າໄປໄດ້ຊ້າຫຼາຍ, ແຕ່ວ່າມາຮອດປັດຈຸບັນ, ຈຸດບໍລິການທີ່ປົກຄຸມຕົວເມືອງແລະຊົນນະບົດຢ່າງທົ່ວເຖິງ, ຍັງມີການຈັດສົ່ງເຄື່ອງດ້ວຍເຄື່ອງບິນແບບບໍ່ມີຄົນຂັບຫຼືໂດຣນນຳອີກ, ການໄຈ້ແຍກເຄື່ອງດ້ວຍຫຸ່ນຍົນ, ເຄືອຂ່າຍບໍລິການການຝາກແລະສົ່ງເຄື່ອງດ່ວນໄດ້ປົກຄຸມທົ່ວປະເທດຈີນແລະເຊື່ອມຈອດກັບທົ່ວໂລກ. ໃນອະນາຄົດ, ທ້າວຢວີຢີ້ພ້ອມກັບເພື່ອນຮ່ວມງານທັງຫຼາຍ ຈະບິນໄປໄກກວ່າເກົ່າ, ບໍ່ສະເພາະແຕ່ບ່ອນທີ່ມີຄົນຈີນເທົ່ານັ້ນ, ຂໍພຽງແຕ່ລູກຄ້າມີຄວາມຕ້ອງການ, ເຂົາເຈົ້າຈະຂ້າມຜ່ານພູຜາແມ່ນ້ຳເປັນພັນເປັນໝື່ນສາຍເພື່ອຂົນສົ່ງເຄື່ອງດ່ວນໄປເຖິງທຸກຫົນທຸກແຫ່ງໃນທົ່ວໂລກ.

ເວລາຜ່ານໄປ 75ປີ, ຈີນໄດ້ສ້າງເຄືອຂ່າຍຈໍລະຈອນສິນຄ້າອັດສະລິຍະທີ່ມີປະສິດທິພາບສູງ

ໃນໄລຍະເບື້ອງຕົ້ນທີ່ສປຈີນສະຖາປະນາຂຶ້ນ, ຈຸດບໍລິການໄປສະນີແລະໂຮງໄປສະນີໃນທົ່ວປະເທດຈີນມີພຽງແຕ່ 26.000 ແຫ່ງເທົ່ານັ້ນ, ຕົ້ນຕໍແມ່ນໂຮມສູນຢູ່ຕົວເມືອງຂະໜາດໃຫຍ່ແລະກາງ, ການຝາກຈົດໝາຍສະບັບໜຶ່ງ, ພັດສະດຸອັນໜຶ່ງ, ບາງເທື່ອຕ້ອງໃຊ້ເວລາຫຼາຍອາທິດຈຶ່ງຈະໄປເຖິງທີ່ໝາຍ.

ຜ່ານການພັດທະນາມາເປັນເວລາ75ປີ, ການບໍລິການສົ່ງເຄື່ອງດ່ວນຂອງຈີນຈາກບໍ່ມີຮອດມີ, ຫົວໜ່ວຍທຸລະກິດທີ່ກ່ຽວຂ້ອງກັບການຈໍລະຈອນສິນຄ້າມແມ່ນມີຫຼາຍກວ່າ 6.000.000 ແຫ່ງ, ໄດ້ສ້າງເປັນເຄືອຂ່າຍຈໍລະຈອນສິນຄ້າທີ່ປົກຄຸມທົ່ວປະເທດແລະເຊື່ອມຈອດກັບທົ່ວໂລກ. ໂດຍສະເພາະນັບແຕ່ສປຈີນສະຖາປະນາຂຶ້ນເປັນຕົ້ນມາ, ປະລິມານການສົ່ງເຄື່ອງດ່ວນຂອງຈີນໄດ້ເພີ່ມຈາກ9,2ຕື້ອັນໃນປີ2013ຂຶ້ນເປັນ132ຕື້ອັນໃນປີ2023 ເຊິ່ງໄດ້ເພີ່ມຂຶ້ນຫຼາຍກວ່າ13ເທົ່າ, ຄອງຖານະອັນດັບໜຶ່ງຂອງໂລກຢ່າງໝັ້ນທ່ຽງ.

ທຸກມື້ນີ້, ທົ່ວປະເທດຈີນມີຈຸດບໍລິການໄປສະນີແລະສົ່ງເຄື່ອງດ່ວນປະເພດຕ່າງໆລວມທັງໝົດເຖິງ 468.000 ແຫ່ງ, ການບໍລິການສົ່ງເຄື່ອງດ່ວນໄດ້ປົກຄຸມບ້ານບໍລິຫານຫຼາຍກວ່າ 95%.

ທຸກມື້ນີ້ຢູ່ຈີນ,ພາຍໃນເວລາພຽງແຕ່ພິບຕາດຽວເທົ່ານັ້ນ, ແມ່ນມີພັດສະດຸຫຼາຍກວ່າ 5.000 ອັນຖືກຂົນສົ່ງອອກໄປ, ປະລິມານການສົ່ງເຄື່ອງດ່ວນໃນແຕ່ລະມື້ແມ່ນມີຫຼາຍກວ່າ 440 ລ້ານອັນ. ການດຳເນີນງານຂອງສູນສົ່ງຕໍ່ເຄື່ອງດ່ວນຂະໜາດໃຫຍ່ພາຍໃນປະເທດຈີນໄດ້ຫັນເປັນແບບອັດຕະໂນມັດກວມຫຼາຍກວ່າ  90%, ລະບົບການຈໍລະຈອນສິນຄ້າແບບອັດສະລິຍະໄດ້ຮັບປະກັນເຄື່ອງສົ່ງດ່ວນຫຼາຍກວ່າ80%ສາມາດສົ່ງເຖິງຈົດໝາຍປາຍທາງໄດ້ພາຍໃນເວລາ 3 ວັນ.

ປີ1949, ປະລິມານການຂົນສົ່ງພັດສະດຸຂອງທົ່ວປະເທດຈີນໃນປີນັ້ນທີ່ມີຄວາມຊັກຊ້າແກ່ຍາວເວລາ, ແຕ່ມາເຖິງປັດຈຸບັນແມ່ນໃຊ້ເວລາພຽງແຕ່10ນາທີກໍສາມາດສົ່ງໄປເຖິງທີ່ໄດ້. ການຈໍລະຈອນສິນຄ້າສົ່ງດ່ວນພວມປ່ຽນແປງຊີວິດການເປັນຢູ່ຂອງປະຊາຊົນໃນທາງກວ້າງແລະຄວາມໄວແບບບໍ່ເຄີຍມີມາກ່ອນ, ເຮັດໃຫ້ຄົນທັງຫຼາຍສາມາດເຂົ້າເຖິງສິນຄ້າຕ່າງໆໃນທົ່ວໂລກໄດ້ຢ່າງງ່າຍດາຍ.