ວັນທີ  1 ຕຸລານີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງສານໄປຍັງທ່ານອິຊິບະ ຊິເກຣຸ ເພື່ອຊົມເຊີຍທ່ານໄດ້ຮັບເລືອກຕັ້ງເປັນນາຍົກລັດຖະມົນຕີຍີ່ປຸ່ນ.

    ເນື້ອໃນສານຊົມເຊີຍຂອງທ່ານສີຈິ້ນຜິງລະບຸວ່າ: ຈີນ ແລະ ຍີ່ປຸ່ນແມ່ນບ້ານໃກ້ເຮືອນຄຽງທີ່ມີສາຍນ້ຳຕິດຈອດກັນ. ການທີ່ສອງປະເທດເດີນຕາມເສັ້ນທາງທີ່ຢູ່ຮ່ວມກັນໂດຍສັນຕິ, ມີໄມຕີຈິດມິດຕະພາບຕໍ່ກັນທຸກເຊັ່ນຄົນ, ຮ່ວມມືກັນແບບຕ່າງຝ່າຍຕ່າງໄດ້ຮັບຜົນປະໂຫຍດ ແລະ ຮ່ວມກັນພັດທະນານັ້ນ ແມ່ນສອດຄ່ອງກັບຜົນປະໂຫຍດພື້ນຖານຂອງປະຊາຊົນສອງປະເທດ. ຫວັງວ່າຍີ່ປຸ່ນຈະເດີນຕາມທິດທາງດຽວກັນກັບຈີນ, ເຄົາລົບນັບຖືຫຼັກການ ແລະ ຄວາມຮັບຮູ້ທີ່ເປັນເອກະພາບກັນຂອງເອກະສານການເມືອງ 4 ສະບັບ, ຊຸກຍູ້ສາຍພົວພັນຍຸດທະສາດ ແລະ ສ້າງຜົນປະໂຫຍດໃຫ້ແກ່ກັນລະຫວ່າງສອງປະເທດຢ່າງຮອບດ້ານ, ສຸມກຳລັງເຂົ້າໃນການສ້າງສາຍພົວພັນຈີນ-ຍີ່ປຸ່ນທີ່ມີລັກສະນະສ້າງສັນ ແລະ ໝັ້ນທ່ຽງທີ່ສອດຄ່ອງກັບຄວາມຮຽກຮ້ອງຕ້ອງການຂອງຍຸກໃໝ່.

    ມື້ດຽວກັນ, ທ່ານ ຫຼີຊຽງ ນາຍົກລັດຖະມົນຕີຈີນໄດ້ສົ່ງສານຊົມເຊີຍໄປຍັງທ່ານອິຊິບະ ຊິເກຣຸ ໂດຍລະບຸວ່າ: ສອງຝ່າຍຄວນປົກປັກຮັກສາພື້ນຖານດ້ານການເມືອງຂອງສາຍພົວພັນສອງປະເທດ, ເພີ່ມທະວີໄມຕີຈິດມິດຕະພາບ ຄວາມໄວ້ເນື້ອເຊື່ອໃຈກັນ ແລະ ການຮ່ວມມື, ສ້າງຄວາມສຸກໃຫ້ແກ່ປະຊາຊົນສອງປະເທດເປັນຢ່າງດີກວ່າເກົ່າ.