ອີງຕາມແຫຼ່ງຂ່າວຈາກກົມຄຸ້ມຄອງຄົມມະນາຄົມກະຊວງປ້ອງກັນຄວາມສະຫງົບຈີນແຈ້ງໃຫ້ຮູ້ໃນວັນທີ 3 ຕຸລານີ້ວ່າ: ໃນມື້ທີ 3 ຂອງໄລຍະພັກວັນຊາດຈີນເປັນເວລາ 7 ວັນຄືລະຫວ່າງວັນທີ 1-7ຕຸລານີ້, ປະລິມານການສັນຈອນຂອງພາຫະນະຕ່າງໆຕາມທາງຫຼວງສາຍຫຼັກໃນທົ່ວປະເທດຈີນມີຈຳນວນຫຼວງຫຼາຍຢ່າງຕໍ່ເນື່ອງ. ນັບມາຮອດເວລາ18ໂມງຂອງວັນທີ 3 ຕຸລານີ້, ສະພາບ ການສັນຈອນຕາມຖະໜົນໃນບັນດາຕົວເມືອງໃຫຍ່ພ້ອມດ້ວຍທາງດ່ວນສຳຄັນ, ເສັ້ນທາງສາຍຫຼັກລະດັບແຂວງ ແລະ ລະດັບຊາດໃນທົ່ວປະເທດຈີນແມ່ນມີຄວາມປອດໄພ ແລະ ໂລ່ງລ່ຽນໂດຍລວມ.

ພາກສ່ວນຄຸ້ມຄອງຄົມມະນາຄົມຂອງພະແນກປ້ອງກັນຄວາມສະຫງົບທ້ອງຖິ່ນຕ່າງໆໄດ້ສົມທົບກັບຈຸດພິເສດດ້ານການອອກເດີນທາງຍາມພັກຂອງປະຊາຊົນ ແລະ ສະພາບການປ່ຽນແປງດ້ານປະລິມານການສັນຈອນຂອງພາຫະນະ, ໄດ້ຈັດສັນກຳລັງຕຳຫຼວດແລະອຸປະກອນຕາມຫຼັກວິທະຍາສາດ, ເພີ່ມທະວີການຄວບຄຸມ ແລະ ລະບາຍຄວາມແອອັດຕາມຈຸດສຳຄັນຕ່າງໆຂອງຖະໜົນ, ກວດກາແລະຄຸ້ມຄອງຢ່າງເຂັ້ມງວດ ແລະ ຕໍ່ເນື່ອງຕໍ່ການກະທຳຜິດກົດຈະລາຈອນຢ່າງໜັກໜ່ວງ, ດຳເນີນການໂຄສະນາ ແລະສຶກສາອົບຮົມກ່ຽວກັບຄວາມປອດໄພດ້ານຄົມມະນາຄົມຢ່າງກວ້າງຂວາງ, ອອກແຮງສຸດຂີດເພື່ອປົກປ້ອງການເດີນທາງຂອງປະຊາຊົນໃນຍາມພັກໃຫ້ມີຄວາມປອດໄພ ແລະ ສະດວກ.