ວັນທີ 3 ຕຸລານີ້, ທ່ານເຊີເກ ລັຟລົຟ ລັດຖະມົນຕີກະຊວງການຕ່າງປະເທດຣັດເຊຍກ່າວຢືນຢັນວ່າ: ການປະສານງານລະຫວ່າງຣັດເຊຍ-ຈີນໃນເວທີການຕ່າງປະເທດ ແລະ ການເມືອງສາກົນແມ່ນເປັນການປະກອບສ່ວນເຂົ້າໃນການສ້າງໃຫ້ມີລະບຽບໂລກຫຼາຍຂົ້ວທີ່ຍຸຕິທຳກວ່າເກົ່າ.

ໃນໂອກາດເຂົ້າຮ່ວມພິທີເປີດງານວາງສະແດງຮູບພາບຂໍ້ມູນສຳເນົາເອກະສານເພື່ອສະເຫຼີມສະຫຼອງຣັດເຊຍ-ຈີນສ້າງຕັ້ງສາຍພົວພັນທາງການທູດຄົບຮອບ75ປີທີ່ຈັດຂຶ້ນໃນວັນທີ 3 ຕຸລານີ້, ທ່ານລັຟລົຟກ່າວວ່າ: ຕະຫຼອດໄລຍະ75ປີຜ່ານມາ, ຜ່ານຈາກຄວາມພະຍາຍາມຮ່ວມຢ່າງຕໍ່ເນື່ອງຂອງສອງປະເທດ, ສາຍພົວພັນຣັດເຊຍ-ຈີນໄດ້ຂະຫຍາຍຕົວຂຶ້ນເຖິງລະດັບສູງແບບບໍ່ເຄີຍມີມາກ່ອນ. ເພິ່ນເນັ້ນໜັກວ່າ: ການປະສານງານດ້ານການຕ່າງປະເທດລະຫວ່າງຣັດເຊຍ-ຈີນແມ່ນເປັນການປະກອບສ່ວນເຂົ້າໃນການປົກປັກຮັກສາສະຖຽນລະພາບຂອງໂລກ ແລະສ້າງໃຫ້ມີລະບຽບໂລກຫຼາຍຂົ້ວທີ່ຍຸຕິທຳກວ່າເກົ່າ. ສອງຝ່າຍປະຕິບັດຕາມຈິດໃຈມິດຕະພາບທີ່ໝັ້ນຄົງຂະໜົງແກ່ນ, ການຮ່ວມມືແບບເພື່ອນບ້ານໃກ້ຄຽງທີ່ດີຕໍ່ກັນ, ເຄົາລົບເຊິ່ງກັນແລະກັນ ແລະຕ່າງຝ່າຍຕ່າງໄດ້ຮັບຜົນປະໂຫຍດນຳກັນ ແມ່ນສາມາດແກ້ໄຂທຸກບັນຫາ ແລະຜ່ານຜ່າຄວາມຫຍຸ້ງຍາກທຸກປະການໄດ້.

ງານວາງສະແດງຮູບພາບຄັ້ງນີ້ແມ່ນຈັດຂຶ້ນໂດຍກະຊວງການຕ່າງປະເທດຣັດເຊຍ ເຊິ່ງໄດ້ຄັດເລືອກຮູບພາບຂໍ້ມູນສຳເນົາເອກະສານຫຼາຍສິບໃບທີ່ສ່ອງແສງໃຫ້ເຫັນເຖິງເຫດການສຳຄັນໃນປະຫວັດສາດການພົວພັນລະຫວ່າງສອງປະເທດຣັດເຊຍ-ຈີນມາວາງສະແດງໃນງານ.