ວັນທີ 4 ຕຸລານີ້, ຍອດຈໍານວນຜູ້ໂດຍສານທີ່ເຂົ້າອອກເມືອງຜ່ານດ່ານທາງຫຼວງຈູ່ໄຫຂອງຂົວໃຫຍ່ຮົງກົງ-ຈູ່ໄຫ-ມາກາວຂອງຈີນໄດ້ລື່ນກາຍ 20 ລ້ານເທື່ອຄົນ, ເພີ່ມຂຶ້ນ 86% ເມື່ອທຽບໃສ່ໄລຍະດຽວກັນຂອງປີ 2023 ແລະ ຫຼາຍກວ່າຍອດຈໍານວນຜູ້ໂດຍສານໃນທົ່ວປີ 2023.

   ອີງຕາມຕົວເລກຂໍ້ມູນສະຖິຕິຈາກດ່ານກວດກາຕາມຊາຍແດນຂົວໃຫຍ່ຮົງກົງ-ຈູ່ໄຫ-ມາກາວແຈ້ງໃຫ້ຮູ້ວ່າ: ນັບແຕ່ຕົ້ນປີນີ້ມາ, ຜູ້ໂດຍສານທີ່ເຂົ້າອອກເມືອງຜ່ານດ່ານທາງຫຼວງຈູ່ໄຫຂອງຂົວໃຫຍ່ຮົງກົງ-ຈູ່ໄຫ-ມາກາວທີ່ມາຈາກເຂດບໍລິຫານພິເສດຮົງກົງ ແລະ ມາກາວຂອງຈີນໄດ້ບັນລຸເຖິງ 12.033.000 ເທື່ອຄົນ, ເພີ່ມຂຶ້ນ 83,3% ເມື່ອທຽບໃສ່ໄລຍະດຽວກັນຂອງປີ 2023, ກວມເອົາ 60,2% ຂອງຍອດຈໍານວນຜູ້ໂດຍສານຜ່ານດ່ານດັ່ງກ່າວ. ຂະນະທີ່ຍອດຈໍານວນລົດເຂົ້າອອກທີ່ມີປ້າຍລົດພຽງແຕ່ປ້າຍດຽວຈາກເຂດຮົງກົງ ແລະ ມາກາວແມ່ນມີຫຼາຍກວ່າ 2.260.000 ເທື່ອຄັນ, ກວມເອົາ 56% ຂອງຍອດຈໍານວນລົດເຂົ້າອອກດ່ານດັ່ງກ່າວ.

   ຄຽງຄູ່ກັບການທ່ອງທ່ຽວຢູ່ເຂດອ່າວໃຫຍ່ກວາງຕຸ້ງ-ຮົງກົງ-ມາກາວໄດ້ຮັບຄວາມນິຍົມຊົມຊອບຕື່ມອີກ, ນັບແຕ່ຕົ້ນປີນີ້ມາ, ຜູ້ໂດຍສານຈາກເຂດດ້ານໃນຂອງຈີນ (ເຂດແດນຈີນທີ່ບໍ່ລວມທັງຮົງກົງ-ມາກາວ-ໄຕ້ຫວັນ) ທີ່ຖືໃບອະນຸຍາດເດີນທາງເຂົ້າໄປທ່ອງທ່ຽວຢູ່ຮົງກົງ ແລະ ມາກາວແມ່ນມີຫຼາຍກວ່າ 3.860.000 ເທື່ອຄົນ, ເພີ່ມຂຶ້ນ 76,6% ເມື່ອທຽບໃສ່ໄລຍະດຽວກັນຂອງປີ 2023.

   ນອກນີ້, ດ່ານທາງຫຼວງຈູ່ໄຫຂອງຂົວໃຫຍ່ຮົງກົງ-ຈູ່ໄຫ-ມາກາວໃນຖານະເປັນດ່ານເຊື່ອມຕໍ່ທາງບົກໂດຍກົງລະຫວ່າງເຂດດ້ານໃນຂອງຈີນ ແລະ ສະໜາມບິນສາກົນຮົງກົງ ພຽງດ່ານດຽວເທົ່ານັ້ນ, ພວມກາຍເປັນຊ່ອງທາງເຂົ້າມາທ່ອງທ່ຽວຢູ່ຈີນຂອງນັກທ່ອງທ່ຽວຕ່າງປະເທດຈໍານວນຫຼວງຫຼາຍ.