ວັນທີ 5 ຕຸລານີ້, ໂຄສົກກະຊວງການຕ່າງປະເທດຈີນໄດ້ຕອບຄຳຖາມນັກຂ່າວກ່ຽວກັບທ່ານໂຈ ໄບເດັນ ປະທານາທິບໍດີອາເມຣິກາສົ່ງໂທລະເລກຊົມເຊີຍວັນຊາດຈີນໄປເຖິງທ່ານສີຈິ້ນຜິງ ປະທານປະເທດຈີນ.

ມີນັກຂ່າວຖາມວ່າ: ອີງຕາມສື່ມວນຊົນລາຍງານວ່າ, ຜູ້ນຳປະເທດ, ພັກການເມືອງ ແລະຜູ້ຮັບຜິດຊອບອົງການຈັດຕັ້ງສາກົນຫຼາຍທ່ານໄດ້ສົ່ງສານຫຼືໂທລະເລກໄປເຖິງທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ ປະທານປະເທດຈີນ ເພື່ອຊົມເຊີຍສາທາລະນະລັດປະຊາຊົນຈີນສະຖາປະນາຄົບຮອບ 75 ປີ. ຂໍຖາມວ່າທ່ານໂຈ ໄບເດັນ ປະທານາທິບໍດີອາເມຣິກາໄດ້ສົ່ງໂທລະເລກຊົມເຊີຍໄປເຖິງປະເທດຈີນຫຼືບໍ່?

ໂຄສົກກະຊວງການຕ່າງປະເທດຈີນຕອບວ່າ: ຫວ່າງມໍ່ໆມານີ້, ທ່ານໂຈ ໄບເດັນ ປະທານາທິບໍດີອາເມຣິກາໄດ້ສົ່ງໂທລະເລກຊົມເຊີຍໄປເຖິງທ່ານສີຈິ້ນຜິງ ປະທານປະເທດຈີນເພື່ອຊົມເຊີຍສາທາລະນະລັດປະຊາຊົນຈີນສະຖາປະນາຄົບຮອບ 75 ປີ. ເນື້ອໃນໂທລະເລກຊົມເຊີຍຂອງທ່ານໂຈ ໄບເດັນລະບຸວ່າ, ເນື່ອງໃນໂອກາດສາທາລະນະລັດປະຊາຊົນຈີນສະຖາປະນາຄົບຮອບ 75 ປີ, ຂ້າພະເຈົ້າຂໍຕາງໜ້າປະຊາຊົນອາເມຣິກາສະແດງຄວາມຊົມເຊີຍແລະອວຍພອນໄຊອັນປະເສີດທີ່ສຸດໃຫ້ແກ່ທ່ານ ແລະ ປະຊາຊົນຈີນ.