ອີງຕາມໜັງສືພິມວໍຊິງຕັນໂພສຂອງອາເມຣິກາລາຍງານວ່າ: ຕອນບ່າຍຂອງວັນທີ 5 ຕຸລານີ້, ຊາຍອາເມຣິກາຄົນໜຶ່ງໄດ້ເຜົາຕົນເອງຢູ່ເຂດບໍລິເວນໃກ້ກັບທໍານຽບປະນາທາທິບໍດີອາເມຣິກາ ຫຼື ທໍານຽບຂາວແນໃສ່ປະທ້ວງໂດຍສັນຕິເພື່ອສະໜັບສະໜູນປາແລັດສະຕີນ.

   ຕາມຂ່າວແຈ້ງໃຫ້ຮູ້ວ່າ: ເຈົ້າໜ້າທີ່ຕໍາຫຼວດໄດ້ດັບໄຟໃຫ້ຊາຍຄົນນີ້ຢ່າງສໍາເລັດຜົນ, ຫຼັງຈາກນັ້ນໄດ້ນຳຊາຍຄົນນີ້ອອກຈາກສະຖານທີ່ດັ່ງກ່າວ, ຂັບໄລ່ສະຫຼາຍກຸ່ມຜູ້ປະທ້ວງ ແລະ ປິດລ້ອມສະຖານທີ່ເກີດເຫດ. ເຈົ້າໜ້າທີ່ຕໍາຫຼວດທ້ອງຖິ່ນຢືນຢັນວ່າ: ຊາຍຄົນນີ້ໄດ້ຖືກສົ່ງໄປປິ່ນປົວຢູ່ໂຮງໝໍ ແລະ ບໍ່ມີຄວາມອັນຕະລາຍເຖິງແກ່ຊີວິດ.

   ອີງຕາມຂໍ້ມູນຂອງພາກສ່ວນສາທາລະນະສຸກເຂດກາຊາເຜີຍໃຫ້ຮູ້ວ່າ: ການປະທະກັນລະຫວ່າງປາແລັດສະຕິນ ແລະ ອິດສະຣາແອນຮອບນີ້ໄດ້ສືບຕໍ່ດໍາເນີນຢູ່ ແລະ ໃກ້ຈະຄົບຮອບ 1 ປີ, ການປະທະກັນຮອບນີ້ເຮັດໃຫ້ມີປະຊາຊົນປາແລັດສະຕິນເສຍຊີວິດເຖິງ 41.870 ຄົນ.