ຕອນເຊົ້າວັນທີ 10 ຕຸລານີ້, ທ່ານ ຫຼີ ສຽງ ນາຍົກລັດຖະມົນຕີຈີນ ໄດ້ເຂົ້າຮ່ວມກອງປະຊຸມຜູ້ນຳຈີນ-ອາຊຽນຄັ້ງທີ 27 (10+1) ທີ່ຈັດຂຶ້ນຢູ່ນະຄອນຫຼວງວຽງຈັນສປປ ລາວ ມີຜູ້ນຳປະເທດອາຊຽນ, ຜູ້ສັງເກດການອາຊຽນ ແລະ ເລຂາທິການໃຫຍ່ອາຊຽນໄດ້ເຂົ້າຮ່ວມກອງປະຊຸມ.

   ທ່ານ ຫຼີ ສຽງ ຊີ້ອອກວ່າ,  ຈີນ ແລະ ອາຊຽນແມ່ນສອງຕະຫຼາດໃຫຍ່, ຊັບພະຍາກອນຕະຫຼາດເປັນປະໂຫຍດທີ່ພົ້ນເດັ່ນທີ່ສຸດຂອງພວກເຮົາ. ການເພີ່ມທະວີການເຊື່ອມຈອດຕະຫຼາດແມ່ນທິດທາງສຳຄັນໃນການຮ່ວມມືໃນຕໍ່ໜ້າ. ການເຈລະຈາກ່ຽວກັບການຍົກລະດັບເຂດການຄ້າເສລີຈີນ-ອາຊຽນສະບັບ 3.0, ເປັນການຮັບປະກັນດ້ານສະຖາບັນໃຫ້ທັງສອງຝ່າຍ ເພື່ອຮ່ວມກັນສ້າງຕະຫຼາດຂະໜາດໃຫຍ່. ຈີນຍິນດີຮ່ວມມືກັບອາຊຽນຫຼາຍກວ່າເກົ່າ ເພື່ອຮ່ວມກັນສ້າງ ແລະ ແບ່ງປັນຕະຫຼາດ ແລະ ຊອກຫາວິທີທີ່ຈະນຳເອົາແຮງຊຸກຍູ້ການພັດທະນາທີ່ເຂັ້ມແຂງກວ່າເກົ່າ ແລະ ຍາວນານມາໃຫ້ທັງສອງຝ່າຍ, ແລະໃຫ້ການສະໜັບສະໜູນຢ່າງແໜ້ນແຟ້ນກວ່າເກົ່າເພື່ອຄວາມຈະເລີນຮຸ່ງເຮືອງຮ່ວມຂອງພາກພື້ນ ແລະ ໂລກ.

     ທ່ານ ຫຼີ ສຽງ ກ່າວວ່າ, ຈີນຍິນດີຮ່ວມກັບອາຊຽນສ້າງເຄືອຂ່າຍການເຊື່ອມຕໍ່ເພື່ອເປີດກວ້າງການຮ່ວມມືໃນຂະແໜງການທີ່ພົ້ນເດັ່ນ, ລົງເລິກການແລກປ່ຽນປະຊາຊົນ ແລະ ວັດທະນະທຳ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານຈີນ-ອາຊຽນໃຫ້ກ້າວຂຶ້ນສູ່ລະດັບໃໝ່, ຮ່ວມກັນສ້າງອະນາຄົດທີ່ດີກວ່າເກົ່າ.    

      ກອງປະຊຸມໄດ້ຮັບຮອງເອົາ 5 ເອກະສານຜົນຂອງກອງປະຊຸມສໍາຄັນຄື: ໜື່ງ, ຖະແຫຼງການຮ່ວມອາຊຽນ-ຈີນ ວ່າດ້ວຍການຕ້ານການສໍ້ໂກງດ້ານເຄືອຂ່າຍໂທລະຄົມ ແລະ ການພະນັນອອນລາຍ. ສອງ, ຖະແຫຼງການຮ່ວມອາຊຽນ-ຈີນ ວ່າດ້ວຍການຮັດແໜ້ນການຮ່ວມມືດ້ານໄປມາຫາສູ່ລະຫວ່າງປະຊາຊົນກັບປະຊາຊົນ. ສາມ,  ຖະແຫຼງການຮ່ວມອາຊຽນ-ຈີນ ວ່າດ້ວຍການສົ່ງເສີມການພັດທະນາກະສິກໍາທັນສະໄໝ. ສີ່, ຖະແຫຼງການຮ່ວມອາຊຽນ-ຈີນ ວ່າດ້ວຍການຮ່ວມມືເພື່ອອໍານວຍຄວາມສະດວກໃນການສ້າງລະບົບນິເວດດີຈີຕອນທີ່ກວມລວມ ແລະ ຍືນຍົງ ແລະ ຫ້າ, ຖະແຫຼງການຮ່ວມ ວ່າດ້ວຍການສະຫຼຸບເນື້ອໃນສໍາຄັນຂອງການເຈລະຈາ ຍົກລະດັບສັນຍາການຄ້າເສລີ ອາຊຽນ-ຈີນ ສະບັບທີ 3.0.