ປີ2024ເປັນປີ ແຫ່ງການສະຖາປະນາສາທາລະນະລັດປະຊາຊົນຈີນຫຼືວັນຊາດຈີນຄົບຮອບ75ປີ. ຕະຫຼອດໄລຍະ75ປີຜ່ານມາ, ສປຈີນຈາກປະເທດທີ່ທຸກຍາກຫຼ້າຫຼັງແບບເກືອບບໍ່ມີຫຍັງເລີຍໄດ້ເຕີບໃຫຍ່ຂະຫຍາຍຕົວແບບກ້າວກະໂດດຂຶ້ນມາເປັນກຸ່ມເສດຖະກິດໃຫຍ່ອັນດັບສອງຂອງໂລກ, ໄດ້ຮັບຜົນສຳເລັດທີ່ ຊາວໂລກເຫັນໄດ້ຢ່າງປະຈັກຕາໃນການປະດິດສ້າງດ້ານວິທະຍາສາດເຕັກໂນໂລຊີ, ຄວາມຈະເລີນຮຸ່ງເຮືອງດ້ານວັດທະນະທຳ, ຊີວິດການເປັນຢູ່ຂອງປະຊາຊົນ,ເສດຖະກິດ-ສັງຄົມ, ການອະນຸລັກສິ່ງແວດລ້ອມທຳມະຊາດແລະອື່ນໆ ເຊິ່ງຜົນສຳເລັດເຫຼົ່ານີ້ແມ່ນສະແດງໃຫ້ເຫັນໄດ້ຈາກດ້ານຕ່າງໆໃນຊີວິດການເປັນຢູ່ຂອງປະຊາຊົນຈີນ. ຕໍ່ໄປແມ່ນສະພາບການປ່ຽນແປງດ້ານເສັ້ນທາງຊົນນະບົດຈີນໃນຕະຫຼອດໄລຍະ75ປີຜ່ານມາ.

ພາຍຫຼັງຈີນກ້າວເຂົ້າສູ່ຍຸກໃໝ່ນັບແຕ່ປີ2012ເປັນຕົ້ນມາ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ ປະທານປະເທດຈີນໄດ້ມີຄຳຊີ້ນຳສຳຄັນຫຼາຍເທື່ອກ່ຽວກັບການພັດທະນາທາງຫຼວງຊົນນະບົດໂດຍສະເໜີໃຫ້ເຮັດວຽກກໍ່ສ້າງເສັ້ນທາງຊົນນະບົດໃຫ້ດີ, ຄຸ້ມຄອງໃຫ້ດີ, ປົກປັກຮັກສາໃຫ້ດີ ແລະ ດຳເນີນທຸລະກິດໃຫ້ດີ ເຊິ່ງເອີ້ນຫຍໍ້ວ່າ “ເສັ້ນທາງຊົນນະບົດ 4 ດີ”, ເດືອນພຶດສະພາປີ2024, ເພິ່ນໄດ້ມີຄຳຊີ້ນຳຫຼ້າສຸດກ່ຽວກັບການພັດທະນາທາງຫຼວງຊົນນະບົດໂດຍຮຽກຮ້ອງວ່າ: “ຕ້ອງອອກແຮງຢ່າງຕໍ່ເນື່ອງ,ສຸມຄວາມພະຍາຍາມຢ່າງບໍ່ລົດລະ, ປັບປຸງນະໂຍບາຍແລະກົດລະບຽບໃຫ້ສົມບູນຂຶ້ນຕື່ມອີກ, ຍົກສູງຄວາມສາມາດດ້ານການຄຸ້ມຄອງ, ຈັດຕັ້ງປະຕິບັດການເຄື່ອນໄຫວຍົກລະດັບທາງຫຼວງຊົນນະບົດຮອບໃໝ່ໃຫ້ມີປະສິດທິຜົນ, ສືບຕໍ່ຊຸກຍູ້ການພັດທະນາ ‘ເສັ້ນທາງຊົນນະບົດ 4 ດີ’ທີ່ມີຄຸນນະພາບສູງ.”

ຢູ່ບົນດິນແດນຈີນອັນກວ້າງໃຫຍ່ໄພສານ, ເຄືອຂ່າຍເສັ້ນທາງຊົນນະບົດທີ່ມີຄວາມສະດວກທີ່ສຸດໄດ້ບັນຈຸຄວາມຫວັງແຫ່ງການຫັນເປັນທັນສະໄໝດ້ານກະສິກຳແລະຊົນນະບົດ.

ຈີນເລີ່ມດຳເນີນການກໍ່ສ້າງທາງຫຼວງເທື່ອລະກ້າວໃນຕົ້ນສະຕະວັດທີ20, ແຕ່ວ່າຈົນມາເຖິງໄລຍະເບື້ອງຕົ້ນທີ່ສປຈີນສະຖາປະນາຂຶ້ນ, ການຄົມມະນາຄົມທາງບົກຂອງຈີນຍັງມີຄວາມຫຼ້າຫຼັງທີ່ສຸດ, ຄົນແບກ ແລະ ສັດຕ່າງ ກາຍເປັນຮູບການຂົນສົ່ງຕົ້ນຕໍ. ຕອນນັ້ນ, ໄລຍະຂອງທາງຫຼວງໃນທົ່ວປະເທດຈີນມີພຽງ ແຕ່ 80.800 ກິໂລແມັດເທົ່ານັ້ນ, ສະເລ່ຍແລ້ວ, ຢູ່ຕາມເນື້ອທີ່ດິນແດນແຕ່ລະ100ກິໂລຕາແມັດໃດແມ່ນບໍ່ມີເສັ້ນທາງຫຼວງຮອດ 1 ກິໂລແມັດ.

ການກໍ່ສ້າງເສັ້ນທາງຄົມມະນາຄົມມີຄວາມຫຼ້າຫຼັງ ໄດ້ກາຍເປັນສິ່ງຜູກມັດແລະທ່ວງດຶງການພັດທະນາເສດຖະກິດ-ສັງຄົມຂອງຫຼາຍເຂດແຄວ້ນຢູ່ຈີນໂດຍສະເພາະແມ່ນຢູ່ເຂດຊົນນະບົດ ແລະ ເຂດຫ່າງໄກສອກຫຼີກ.

ພາຍຫຼັງດຳເນີນການປະຕິຮູບແລະເປີດປະຕູສູ່ພາຍນອກແລ້ວ, ຈີນໄດ້ເພີ່ມການລົງທຶນເຂົ້າໃນການກໍ່ສ້າງທາງຫຼວງຊົນນະບົດ, ເວລານັ້ນ, ຄຳວ່າ “ຢາກຮັ່ງມີໃຫ້ສ້າງເສັ້ນທາງກ່ອນ” ໄດ້ກາຍເປັນທີ່ຍອມຮັບຢ່າງກວ້າງຂວາງສຳລັບປະຊາຊົນຈີນທັງຫຼາຍ. ຖ້າເວົ້າເລື່ອງການສ້າງເສັ້ນທາງແລ້ວ, ແມ່ນເວົ້າໄດ້ງ່າຍແຕ່ຊ້ຳພັດເຮັດໄດ້ຍາກ. ທົ່ວປະເທດຈີນມີບ້ານບໍລິຫານ7ແສນແຫ່ງແຈກຢາຍຢູ່ຕາມດິນແດນທີ່ກວ້າງຂວາງເຖິງ 9,6ລ້ານກວ່າກິໂລຕາແມັດ. ບ້ານບາງແຫ່ງແມ່ນຕັ້ງຢູ່ພູພຽງທີ່ມີລະດັບສູງກວ່າໜ້ານ້ຳທະເລ5.000ແມັດຂຶ້ນໄປ, ບາງແຫ່ງຕັ້ງຢູ່ເຂດທະເລຊາຍທີ່ບໍ່ຄ່ອຍມີຄົນໄປຮອດໄປເຖິງ, ຍັງມີບ້ານບາງແຫ່ງຕັ້ງຢູ່ຮ່ອມເລິກພູເຂົາ. ເພື່ອສ້າງເສັ້ນທາງໃຫ້ບ້ານບໍລິຫານເຫຼົ່ານີ້ສາມາດອອກສູ່ພາຍນອກ, ປະຊາຊົນຈີນທີ່ດຸໝັ່ນແລະສະຫຼາດສະຫຼຽວໄດ້ສູ້ຊົນດ້ວຍຄວາມທໍລະຫົດອົດທົນ.

ທາງຫຼວງໜ້າຜາ

ບ້ານໂກ່ວລ້ຽງແຂວງເຫີໜານຕັ້ງຢູ່ໜ້າຜາແຫ່ງໜຶ່ງທີ່ຢູ່ສ່ວນເລິກເຂດພູໄທ້ຫາງ ເຊິ່ງເປັນເຂດຖານທີ່ໝັ້ນການປະຕິວັດເກົ່າ. ຊຸມປີ1970, ເພື່ອແກ້ໄຂສະພາບຄວາມຫຍຸ້ງຍາກດ້ານການສັນຈອນອອກສູ່ພາຍນອກ, ຊາວບ້ານໂກ່ວລ້ຽງພຽງແຕ່ອາໄສເຫຼັກແຫຼມ ແລະ ຄ້ອນເຫຼັກຂຸດເຈາະຫີນຢູ່ໜ້າຜາອອກໄດ້ເຖິງ 26.000 ແມັດກ້ອນ, ຕອກເຫຼັກແຫຼມຈົນປູ້ທີ່ມີນ້ຳໜັກລວມກັນທັງໝົດ 12 ໂຕນ, ຄ້ອນເຫຼັກທີ່ມີນ້ຳໜັກປະມານ 3,6ກິໂລກຣາມໄດ້ເປ່ເພເຖິງ 4.000 ອັນ. ໃຊ້ເວລາດົນເຖິງ 5 ປີປາຍ ຈຶ່ງສ້າງທາງຫຼວງອອກສູ່ເຂດພູດອຍສາຍໜຶ່ງໃຫ້ສຳເລັດ. ທຸກມື້ນີ້, ພາບທິວທັດອັນສວຍສົດງົດງາມທີ່ສຸດ ແລະ ຈິດໃຈສູ້ຊົນດ້ວຍຄວາມທໍລະຫົດອົດທົນທີ່ເກີດມາຈາກການເຈາະໜ້າຜາສ້າງທາງນັ້ນໄດ້ເຮັດໃຫ້ບ້ານໂກ່ວລ້ຽງກາຍເປັນແຫຼ່ງທ່ອງທ່ຽວປະຫວັດສາດການປະຕິວັດທີ່ມີຊື່ສຽງຢູ່ເຂດພູໄທ້ຫາງ.

ທາງຫຼວງເມດ໋ອກ

ທາງຫຼວງເທິງພູພຽງ

ທາງຫຼວງເມດ໋ອກ ເຂດປົກຄອງຕົນເອງຊີ່ຈ້າງ ທີ່ຕັ້ງຢູ່ພູພຽງຊິງໄຫ-ຊີ່ຈ້າງເຊິ່ງມີສົມຍານາມວ່າ “ຫຼັງຄາໂລກ”, ທາງຫຼວງສາຍນີ້ມີຄວາມຍາວພຽງແຕ່ປະມານ 117 ກິໂລແມັດເທົ່ານັ້ນ ແຕ່ຊ້ຳພັດໄດ້ໃຊ້ເວລາດົນເຖິງ 52ປີ ຈຶ່ງສ້າງສຳເລັດ ເຊິ່ງຖືກເອີ້ນວ່າ: ເປັນທາງຫຼວງທີ່ສ້າງຍາກທີ່ສຸດຢູ່ຈີນ.  ທາງຫຼວງເມດ໋ອກໄດ້ຜ່ານການກໍ່ສ້າງມາຫຼາຍເທື່ອແລ້ວ, ແຕ່ວ່າຈຳຕ້ອງຢຸດການກໍ່ສ້າງເນື່ອງຈາກມີຄວາມຫຍຸ້ງຍາກຫຼາຍ ຫຼືວ່າ ຖືກທຳລາຍເສຍຫາຍຈາກໄພທຳມະຊາດ. ຕະຫຼອດໄລຍະກວ່າເຄິ່ງສະຕະວັດ, ເຄີຍມີກຳມະກອນກໍ່ສ້າງ 200 ກວ່າຄົນເສຍສະຫຼະຊີວິດຈາກການສ້າງທາງ.

ມາຮອດປີ2013, ທາງຫຼວງເມດ໋ອກໄດ້ສ້າງສຳເລັດແລະເປີດນຳໃຊ້ຢ່າງເປັນທາງການ. ໃນມື້ເປີດການນຳໃຊ້, ຄວາມໃຝ່ຝັນຂອງປະຊາຊົນບັນດາເຜົ່າຢູ່ເມືອງເມດ໋ອກທີ່ຢາກມີເສັ້ນທາງອອກຈາກເຂດພູເຂົາໄດ້ກາຍເປັນຈິງໃນທີ່ສຸດ. ເນື່ອງ ຈາກມີເສັ້ນທາງສາຍນີ້, ທ້ອງຖິ່ນແຫ່ງນີິ້ໄດ້ມີໄຟຟ້າແລະອິນເຕີເນັດເຂົ້າເຖິງຢ່າງວ່ອງໄວ, ເສດຖະກິດ-ສັງຄົມຢູ່ຊົນນະບົດ ແລະ ຕົວເມືອງໄດ້ບັນລຸການພັດທະນາແບບກ້າວກະໂດດ.

ທາງຫຼວງຕູໂຫຼງຈ່ຽງ

ຕາແສງຕູໂຫຼງຈ່ຽງແຂວງຢູນນານເປັນບ່ອນໂຮມສູນດຳລົງຊີວິດພຽງແຫ່ງດຽວຂອງເຜົ່າຕູໂຫຼງ ເຊິ່ງເປັນຊົນເຜົ່າຈາກສັງຄົມປະຖົມບູຮານເຂົ້າສູ່ສັງຄົມນິຍົມໂດຍກົງ. ໃນເມື່ອກ່ອນ, ປະຊາຊົນເຜົ່າຕູໂຫຼງດຳລົງຊີວິດຢູ່ເຂດຮ່ອມພູທີ່ມີປ່າດົງດົກໜາແບບປິດກັ້ນກັບພາຍນອກ, ເຂົາເຈົ້າຢູ່ເຮືອນມຸ່ງຫຍ້າ, ເດີນທາງໂດຍໃຊ້ເສັ້ນທາງມ້າງຕ່າງ ແລະ ຂົວຫວາຍ, ຊີວິດການເປັນຢູ່ແມ່ນມີຄວາມທຸກຍາກທີ່ສຸດ.

ເລີ່ມແຕ່ເດືອນກໍລະກົດປີ1995ເປັນຕົ້ນມາ, ກອງສ້າງທາງທີ່ປະກອບດ້ວຍ4000ກວ່າຄົນໄດ້ເດີນທາງມາຮອດທີ່ແຫ່ງນີ້. ເຂົາເຈົ້າໄດ້ຜ່ານຜ່າຄວາມຫຍຸ້ງຍາກແລະອຸປະສັກຕ່າງໆເປັນຕົ້ນແມ່ນ ພູຜາສູງຊັນ, ສະພາບທໍລະນີສາດມີຄວາມສະຫຼັບສັບຊ້ອນ, ເງື່ອນໄຂດິນຟ້າອາກາດບໍ່ເອື້ອອຳນວຍທີ່ສຸດ ແລະອຶ່ນໆ, ໃນທີ່ສຸດແມ່ນສາມາດເຮັດໃຫ້ຕາແສງຕູໂຫຼງຈ່ຽງມີທາງດິນແດງແລ່ນລົດໄດ້ໃນເດືອນກັນຍາປີ1999.

ປີ2014, ອຸມົງພູກ່າວຫຼີກົ້ງຂອງທາງຫຼວງຕູໂຫຼງຈ່ຽງໄດ້ສ້າງສຳເລັດ, ເຊິ່ງໄດ້ສິ້ນສຸດປະຫວັດສາດຂອງຕາແສງຕູໂຫຼງຈ່ຽງທີ່ເຄິ່ງປີໃດແມ່ນຖືກຫິມະປິດທາງເຂົ້າອອກຮ່ອມພູເຂົາ. ທ່ານສີຈິ້ນຜິງໄດ້ມີຄຳຊີ້ນຳອັນສຳຄັນວ່າ: ຫວັງໃຫ້ປະຊາຊົນເຜົ່າຕູໂຫຼງຈົ່ງບັນລຸຄວາມໃຝ່ຝັນອັນດີງາມທີ່ມີຊີວິດອີ່ມໜຳສຳລານຄືກັນກັບຊົນເຜົ່າອ້າຍນ້ອງອື່ນໆໃນທົ່ວປະເທດໂດຍໄວ.

ນັບຕັ້ງແຕ່ເສັ້ນທາງຫຼວງຕູໂຫຼງຈ່ຽງເປີດການນຳໃຊ້ເປັນເວລາ10ປີຜ່ານມາ, ຕາແສງຕູໂຫຼງຈ່ຽງໄດ້ເກີດມີການປ່ຽນແປງຢ່າງໃຫຍ່ຫຼວງ, ລາຍໄດ້ສະເລ່ຍຕໍ່ຫົວຄົນຂອງປະຊາຊົນໄດ້ເພີ່ມຈາກ 2,236 ຢວນໃນ 2014 ຂຶ້ນເປັນ18,244 ຢວນໃນປີ2023, ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ.

ທາງຫຼວງກາງທະເລຊາຍ

ທາງຫຼວງລະດັບຊັ້ນຢູ່ກາງທະເລຊາຍສາຍທຳອິດຢູ່ໃນໂລກຕັ້ງຢູ່ທະເລຊາຍທັກລີມາຄານເຂດປົກຄອງຕົນເອງອຸຍເກີ້ຊິນຈ່ຽງຂອງຈີນ ເຊິ່ງເປັນທາງຫຼວງລະດັບຊັ້ນທີ່ເນັ່ງຜ່ານທະເລຊາຍເຄື່ອນຍ້າຍຍາວທີ່ສຸດຢູ່ໃນໂລກ ແລະຍັງເປັນທາງຫຼວງກາງທະເລຊາຍທີ່ສ້າງຂຶ້ນກ່ອນໝູ່ຢູ່ຈີນ.

ຕົວຢ່າງກ່ຽວກັບການປ່ຽນແປງດ້ານເສັ້ນທາງຊົນນະບົດແບບດັ່ງກ່າວນີ້ຍັງມີຢູ່ຢ່າງຫຼວງຫຼາຍໃນປະເທດຈີນ.

ທາງຫຼວງຊົນນະບົດທີ່ປຽບເໝືອນເສັ້ນເລືອດຝອຍທີ່ເຊື່ອມຕໍ່ຕົວເມືອງແລະຊົນນະບົດ ບໍ່ພຽງແຕ່ກາຍເປັນເສັ້ນທາງສຳລັບການເດີນທາງຢ່າງປອດໄພຂອງປະຊາຊົນເທົ່ານັ້ນ, ຍັງໄດ້ກາຍເປັນເສັ້ນທາງແຫ່ງຄວາມຫວັງເພື່ອບັນລຸການພັດທະນາຊົນນະບົດໃຫ້ຈະເລີນນຳອີກ.

ນັບມາຮອດທ້າຍປີ2023, ໄລຍະຂອງທາງຫຼວງຊົນນະບົດຢູ່ຈີນລວມທັງໝົດແມ່ນບັນລຸເຖິງ4,6ລ້ານກິໂລແມັດ, ເຊິ່ງປະກອບເປັນ ເຄືອຂ່າຍຄົມມະນາຄົມຂົນສົ່ງ ທາງຫຼວງທີ່ເຊື່ອມໂຍງເຊື່ອມຈອດ, ເຖິງບ້ານເຖິງຕາແສງ, ເຊິ່ງໄດ້ສ້າງພື້ນຖານອັນໜັກແໜ້ນໃຫ້ແກ່ການພັດທະນາຊົນນະບົດ.

ທ່ານສີຈິ້ນຜິງໄດ້ໃຫ້ຄວາມສຳຄັນທີ່ສຸດຕໍ່ການກໍ່ສ້າງທາງຫຼວງຊົນນະບົດ, ເພິ່ນບໍ່ພຽງແຕ່ຮຽກຮ້ອງໃຫ້ກໍ່ສ້າງທາງຫຼວງຊົນນະບົດໃຫ້ດີເທົ່ານັ້ນ, ຍັງຮຽກຮ້ອງໃຫ້ຄຸ້ມຄອງໃຫ້ດີ, ປົກປັກຮັກສາໃຫ້ດີ ແລະດຳເນີນທຸລະກິດໃຫ້ດີ, ຈັດຕັ້ງປະຕິບັດການກໍ່ສ້າງ“ເສັ້ນທາງຊົນນະບົດ 4 ດີ”ໃຫ້ມີປະສິດທິຜົນ.

ໃນຊຸມປີຜ່ານມານີ້, ຈີນໄດ້ປະຕິບັດລະບຽບການ “ຫົວໜ້າຄຸ້ມຄອງເສັ້ນທາງ”ຢ່າງຮອບດ້ານ, ໄດ້ບັນລຸເປົ້າໝາຍທີ່ປະຕິບັດລະບຽບການ “ຫົວໜ້າຄຸ້ມຄອງເສັ້ນທາງ”ທີ່ມີໜ້າທີ່ຮັບຜິດຊອບຄຸ້ມຄອງທາງຫຼວງຊົນນະບົດໃຫ້ປົກຄຸມຫົວໜ່ວຍບໍລິຫານຂັ້ນເມືອງຢ່າງທົ່ວເຖິງ.

ລະຫວ່າງປີ2014-2023, ຈີນມີຕາແສງເພີ່ມຂຶ້ນຫຼາຍກວ່າ1000ແຫ່ງແລະບ້ານບໍລິຫານຫຼາຍກວ່າ 50.000 ແຫ່ງໄດ້ເຂົ້າເຖິງການບໍລິການລົດໂດຍສານ, ເຊິ່ງສາມາດບັນລຸເປົ້າໝາຍທີ່ຕາແສງແລະບ້ານບໍລິຫານທີ່ມີເງື່ອນໄຂພຽງພໍນັ້ນເຂົ້າເຖິງການບໍລິການລົດໂດຍສານທັງໝົດ, ສ່ວນປະຊາຊົນຢູ່ເຂດຊົນນະບົດ “ອອກເຮືອນກ້າວຂາຂຶ້ນລົດໂດຍສານເລີຍ” ໄດ້ກາຍເປັນຄວາມຈິງແລ້ວ.

ທາງຫຼວງຊົນນະບົດຢູ່ຕາມດິນແດນປະເທດຈີນອັນກວ້າງໃຫຍ່ໄພສານໄດ້ເຊື່ອມຈອດບ້ານຊົນນະບົດ ແລະ ແຫຼ່ງທ່ອງທ່ຽວແຫ່ງຕ່າງໆ ເຊິ່ງບໍ່ພຽງແຕ່ອຳນວຍຄວາມສະດວກໃຫ້ແກ່ນັກທ່ອງທ່ຽວທີ່ຂັບລົດໄປດ້ວຍຕົນເອງເທົ່ານັ້ນ ຍັງເຮັດໃຫ້ຊາວບ້ານທັງຫຼາຍມີໂອກາດປະກອບອາຊີບຢູ່ພາຍໃນບ້ານຢ່າງສະດວກອີກດ້ວຍ. ພ້ອມດຽວກັນນັ້ນ, ຮອບວຽນນ້ອຍຂອງລະບົບຈໍລະຈອນສິນຄ້າຊົນນະບົດນັບມື້ນັບໂລ່ງລ່ຽນຂຶ້ນ. ນັບມາຮອດທ້າຍປີ2023, ບ້ານຊົນນະບົດໃນທົ່ວປະເທດຈີນກວມປະມານ74，5%ໄດ້ສ້າງຕັ້ງຈຸດບໍລິການຈັດສົ່ງສິນຄ້າສຳລັບການຄ້າເອເລັກໂຕຣນິກ, ຜະລິດຕະພັນກະສິກຳທີ່ເກັບຈາກທົ່ງໄຮ່ທົ່ງນາຂອງບ້ານຊົນນະບົດຈຳນວນຫຼາຍແຫ່ງແມ່ນສາມາດເຂົ້າເຖິງໂຕະອາຫານຂອງຕົວເມືອງໃຫຍ່ໄດ້ພາຍໃນມື້ດຽວ, ຊີວິດການເປັນຢູ່ຂອງຊາວບ້ານມີຄວາມສະດວກສະບາຍແລະວ່ອງໄວຂຶ້ນຢ່າງຫຼວງຫຼາຍ.

ປີ2024,ຈີນຍັງຈະປັບປຸງທາງຫຼວງຊົນນະບົດເພີ່ມອີກ 122.000 ກິໂລແມັດ, ບ້ານດັ້ງເດີມທີ່ມີປະຊາກອນອ່າວຫຼາຍມີທາງເປຕົງເຂົ້າເຖິງໄດ້ເພີ່ມໃໝ່  16.700 ແຫ່ງ. ຄາດວ່າຮອດປີ2035, ສະພາບການພັດທະນາ“ເສັ້ນທາງຊົນນະບົດ 4 ດີ”ທີີ່ມີຄຸນນະພາບສູງຈະຈໍ່ຕົວຂຶ້ນໂດຍພື້ນຖານ, ໄລຍະທາງທັງໝົດຈະຢູ່ໃນລະດັບປະມານ 5ລ້ານກິໂລແມັດຢ່າງໝັ້ນທ່ຽງ.

ເມື່ອງເບິ່ງໄປອະນາຄົດ, ທາງຫຼວງຊົນນະບົດຈຳນວນຫຼວງຫຼາຍຈະເຊື່ອມໂຍງເຊື່ອມຈອດຕົວເມືອງກັບຊົນນະບົດ, ນຳມາເຊິ່ງກາລະໂອກາດແລະຄວາມຫວັງ. ການກໍ່ສ້າງ“ເສັ້ນທາງຊົນນະບົດ 4 ດີ” ຈະເຊື່ອມສານຈິດໃຈປະຊາຊົນພ້ອມກັນມຸ່ງໜ້າສູ່ຄວາມຮັ່ງມີ.