ວັນທີ 10 ຕຸລານີ້, ທ່ານຫຼີ ສຽງ ນາຍົກລັດຖະມົນຕີຈີນ ໄດ້ພົບປະກັບທ່ານ ທ່ານ ອິຊິບະ ຊິເກຣຸ (H.E. Mr. ISHIBA Shigeru)  ນາຍົກລັດຖະມົນຕີຍີ່ປຸ່ນໃນຂະນະທີ່ເຂົ້າຮ່ວມກອງປະຊຸມຜູ້ນຳການຮ່ວມມືອາຊີຕາເວັນອອກຢູ່ນະຄອນຫຼວງວຽງຈັນ.

ທ່ານ ຫຼີ ສຽງ ກ່າວວ່າ, ດັ່ງທີ່ທ່ານປະທານສີຈິ້ນຜິງ ຊີ້ອອກວ່າ, ຈີນແລະຍີ່ປຸ່ນເປັນປະເທດບ້ານໃກ້ເຮືອນຄຽງທີ່ຢູ່ສອງຝັ່ງນ້ຳດຽວກັນ, ເດີນຕາມເສັ້ນທາງແຫ່ງການຢູ່ຮ່ວມກັນໂດຍສັນຕິ, ມິດຕະພາບທຸກເຊັນຄົນ, ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ ແລະຮ່ວມກັນພັດທະນາ ແມ່ນສອດຄ່ອງກັບຜົນປະໂຫຍດກົກຮາກຂອງປະຊາຊົນສອງປະເທດ.ຫວັງວ່າຍີ່ປຸ່ນຈະຍຶດໝັ້ນຫຼັກການ ແລະ ຄວາມເຫັນດີເຫັນພ້ອມຂອງ 4 ເອກະສານການເມືອງລະຫວ່າງຈີນກັບຍີ່ປຸ່ນ, ເຮັດວຽກກັບຈີນຕາມທິດທາງດຽວກັນ, ຍຶດໝັ້ນແນວທາງການພົວພັນລະຫວ່າງສອງປະເທດທີ່ຖືກຕ້ອງຢ່າງແໜ້ນແຟ້ນ, ຮັກສາພື້ນຖານການເມືອງຂອງການພົວພັນສອງປະເທດຢ່າງຕັ້ງໜ້າ. ເພີ່ມທະວີການສົນທະນາ ແລະ ການຮ່ວມມື, ຊຸກຍູ້ການພົວພັນຄູ່ຮ່ວມຍຸດທະສາດ ທີ່ຕ່າງຝ່າຍຕ່າງມີຜົນປະໂຫຍດ, ແລະພະຍາຍາມສ້າງການພົວພັນລະຫວ່າງຈີນ-ຍີ່ປຸ່ນທີ່ມີລັກສະນະສ້າງສັນ ແລະ ໝັ້ນຄົງຕາມຄວາມຮຽກຮ້ອງຕ້ອງການຂອງຍຸກໃໝ່.

ທ່ານ ຫຼີ ສຽງ ຊີ້ອອກວ່າ, ການພັດທະນາຂອງຈີນ ແລະ ຍີ່ປຸ່ນ ແມ່ນໂອກາດສຳຄັນຂອງກັນ ແລະ ກັນ, ຫາກບໍ່ແມ່ນການທ້າທາຍ. ຈີນຍິນດີຮ່ວມກັບຍີ່ປຸ່ນເພື່ອເສີມຂະຫຍາຍທ່າແຮງຂອງຕົນຕື່ມອີກ, ຄົ້ນຄວ້າຈຸດເຕີບໂຕໃໝ່ ໃນການຮ່ວມມືໃນຂົງເຂດການປະດິດສ້າງເຕັກໂນໂລຊີ, ເສດຖະກິດດິຈິຕອລ, ການພັດທະນາສີຂຽວ ແລະ ຂົງເຂດອື່ນໆ, ນຳໃຊ້ກົນໄກສົນທະນາຄວບຄຸມການສົ່ງອອກຢ່າງດີ. ຮັກສາຄວາມໝັ້ນຄົງແລະຄວາມສະດວກຂອງຕ່ອງໂສ້ອຸດສາຫະກຳ ແລະ ການສະໜອງສີນຄ້າ, ລວມທັງລະບົບການຄ້າເສລີໃນທົ່ວໂລກ. ສອງຝ່າຍຄວນເພີ່ມທະວີຕື່ມອີກ ເພື່ອສະໜັບສະໜູນໃຫ້ດຳເນີນການແລກປ່ຽນທ້ອງຖິ່ນ, ວັດທະນະທຳ, ກິລາ, ຊາວໜຸ່ມ ແລະອື່ນໆ, ສືບຕໍ່ເພີ່ມທະວີຄວາມເຂົ້າໃຈ ແລະ ມິດຕະພາບລະຫວ່າງປະຊາຊົນສອງປະເທດ. ຈີນຍິນດີເພີ່ມທະວີການປະສານງານ ແລະ ການຮ່ວມມືກັບຍີ່ປຸ່ນໃນຫຼາຍຝ່າຍ ເພື່ອຮ່ວມກັນຊຸກຍູ້ສັນຕິພາບ, ສະຖຽນລະພາບ, ຄວາມຈະເລີນຮຸ່ງເຮືອງແລະການພັດທະນາຂອງພາກພື້ນ.

ທ່ານ ອິຊິບະ ຊິເກຣຸ  ໃຫ້ຮູ້ວ່າ: ປະຈຸບັນ, ຍີ່ປຸ່ນ ແລະ ຈີນ ພວມກ້າວໄປສູ່ທິດທາງຊຸກຍູ້ການພົວພັນຄູ່ຮ່ວມມືຍຸດທະສາດທີ່ຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດ, ພະຍາຍາມສ້າງການພົວພັນລະຫວ່າງສອງປະເທດໃຫ້ແໜ້ນແຟ້ນ ແລະ ໝັ້ນຄົງ. ຍີ່ປຸ່ນຍິນດີຮ່ວມກັບຈີນອວ່າຍໜ້າໄປສູ່ອະນາຄົດ, ເພີ່ມທະວີການແລກປ່ຽນລະດັບສູງ, ເພີ່ມທະວີການສົນທະນາແລະການແລກປ່ຽນໃນທຸກຂັ້ນ, ແກ້ໄຂບັນຫາທີ່ພົ້ນເດັ່ນໂດຍຜ່ານການປຶກສາຫາລື, ສືບຕໍ່ຊຸກຍູ້ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ຊຸກຍູ້ຄວາມໝັ້ນຄົງ ແລະ ການພັດທະນາໃນໄລຍະຍາວຂອງການພົວພັນຍີ່ປຸ່ນ-ຈີນ. ຍີ່ປຸ່ນບໍ່ມີເຈດຕະນາທີ່ຈະ “ຢຸດການເຊື່ອມໂຍງ ແລະ ທຳລາຍການເຊື່ອມໂຍງ” ກັບຈີນ, ແລະ ຫວັງວ່າຈະລົງເລິກການຮ່ວມມືຕົວຈິງໃນຂົງເຂດຕ່າງໆຢ່າງເລິກເຊິ່ງ, ເພື່ອໃຫ້ໝາກຜົນດັ່ງກ່າວມີຜົນດີຕໍ່ປະຊາຊົນສອງປະເທດຕື່ມອີກ. ກ່ຽວກັບບັນຫາໄຕ້ຫວັນ, ຍີ່ປຸ່ນຍຶດໝັ້ນຫຼັກໝັ້ນຂອງຕົນ ທີ່ໄດ້ກຳນົດໄວ້ໃນຖະແຫຼງການຮ່ວມຍີ່ປຸ່ນ-ຈີນ ແລະບໍ່ໄດ້ປ່ຽນແປງ. ຍີ່ປຸ່ນຍິນດີເພີ່ມທະວີການພົວພັນກັບຈີນໃນບັນຫາສາກົນ ແລະ ພາກພື້ນ ເພື່ອຮັບມືກັບສິ່ງທ້າທາຍ.