ກອງປະຊຸມມິດຕະພາບສາກົນຈີນ ແລະ ພິທີລະນຶກການສ້າງຕັ້ງສະມາຄົມມິດຕະພາບກັບນານາຊາດຂອງປະຊາຊົນຈີນຄົບຮອບ 70 ປີ ໄດ້ຈັດຂຶ້ນໃນຕອນບ່າຍວັນທີ 11 ຕຸລານີ້ຢູ່ນະຄອນຫຼວງປັກກິ່ງ. ທ່ານຫານເຈິ້ງ ຮອງປະທານປະເທດຈີນໄດ້ເຂົ້າຮ່ວມກອງປະຊຸມດັ່ງກ່າວ ພ້ອມທັງກ່າວຄຳປາໄສ.

ທ່ານຫານເຈິ້ງກ່າວວ່າ: ພາຍໃຕ້ສະພາບການໃໝ່, ການທູດລະຫວ່າງປະຊາຊົນເຊິ່ງເປັນວຽກງານພື້ນຖານໃນການເສີມສ້າງ ແລະ ຊຸກຍູ້ມິດຕະພາບລະຫວ່າງປະຊາຊົນ, ຊຸກຍູ້ການພັດທະນາສາຍພົວພັນລະຫວ່າງປະເທດ ແລະ ມີກຳລັງແໜ້ນໜາແຂງແຮງກວ່າໝູ່ໃນການຊຸກຍູ້ການຮຽນຮູ້ເຊິ່ງກັນແລະກັນລະຫວ່າງອະລິຍະທຳຕ່າງໆ ຈະມີບົດບາດສຳຄັນກວ່າເກົ່າ, ມີຖານະພົ້ນເດັ່ນກວ່າເກົ່າ ແລະ ມີເວທີອັນກວ້າງຂວາງກວ່າເກົ່າ. ລັດຖະບານຈີນໄດ້ໃຫ້ຄວາມສຳຄັນເປັນຢ່າງສູງຕໍ່ການທູດລະຫວ່າງປະຊາຊົນມາໂດຍຕະຫຼອດ ແລະ ຈະສືບຕໍ່ເຮັດຄືດັ່ງທີ່ເຄີຍໄດ້ປະຕິບັດຜ່ານມາ ເພື່ອສະໜັບສະໜູນສະມາຄົມມິດຕະພາບກັບນານາຊາດຂອງປະຊາຊົນຈີນ ໃນການເສີມຂະຫຍາຍບົດບາດທີ່ມີເອກະລັກພິເສດ, ສ້າງຂົວແຫ່ງການໄປມາຫາສູ່ກັນລະຫວ່າງປະຊາຊົນ, ການຮ່ວມມືທີ່ແທ້ຈິງ, ການແລກປ່ຽນດ້ານວັດທະທະນຳ ແລະ ມິດຕະພາບລະຫວ່າງຊາວໜຸ່ມເຍົາວະຊົນໃຫ້ຫຼາຍຂຶ້ນຕື່ມອີກ.

ທ່ານຫານເຈິ້ງມີຂໍ້ສະເໜີ 4 ຂໍ້ຕໍ່ການຊຸກຍູ້ວຽກງານມິດຕະພາບລະຫວ່າງຈີນກັບຕ່າງປະເທດ ນັ້ນກໍຄື ໜຶ່ງ, ຍຶດໝັ້ນສາມັກຄີ ແລະ ມິດຕະພາບກັນ, ຕັ້ງໜ້າປະຕິບັດຕາມທັດສະນະປະຊາຄົມຮ່ວມຊາຕາກຳຂອງມວນມະນຸດ. ສອງ, ຍຶດໝັ້ນການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ, ຊຸກຍູ້ການພັດທະນາ ແລະ ຈະເລີນຮຸ່ງເຮືອງຮ່ວມກັນ. ສາມ, ຍຶດໝັ້ນການແລກປ່ຽນດ້ານວັດທະນະທຳ, ຊຸກຍູ້ການຮຽນຮູ້ເຊິ່ງກັນແລະກັນລະຫວ່າງອະລິຍະທຳ ແລະ ເຊື່ອມສຳພັນທາງຈິດໃຈຂອງປະຊາຊົນ. ສີ່, ຍຶດໝັ້ນເລັງສາຍຕາໃສ່ອະນາຄົດທີ່ຍາວໄກ, ສືບທອດພາລະກິດມິດຕະພາບລະຫວ່າງປະຊາຊົນ.

ກອງປະຊຸມຄັ້ງນີ້ມີຫົວຂໍ້ວ່າ “ລົງເລິກມິດຕະພາບລະຫວ່າງປະຊາຊົນຈີນ ແລະ ຕ່າງປະເທດ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ” ໂດຍມີຜູ້ຮັບຜິດຊອບອົງການຈັດຕັ້ງຂອງປະເທດຕ່າງໆທີ່ເປັນມິດກັບຈີນ, ບຸກຄົນສາກົນທີ່ເປັນມິດກັບຈີນ ແລະ ຜູ້ແທນຝ່າຍຈີນລວມທັງໝົດປະມານ 500 ທ່ານເຂົ້າຮ່ວມ.