ໃນເວລາຕອບຄຳຖາມນັກຂ່າວກ່ຽວກັບການດຳເນີນວຽກງານພາຍຫຼັງເຫດການກໍ່ການຮ້າຍ “6 ຕຸລາ” ທີ່ເກີດຂຶ້ນຢູ່ນະຄອນກາລາຊີປະເທດປາກິດສະຖານ, ໂຄສົກກະຊວງການຕ່າງປະເທດຈີນກ່າວວ່າ: ວັນທີ 6 ຕຸລາຜ່ານມາ, ຫຼັງຈາກເກີດເຫດການຫຼອນໂຈມຕີຂະບວນລົດໂຮງຜະລິດໄຟຟ້າດ້ວຍຖ່ານຫີນທີ່ທ່າກາຊິມ ເຮັດໃຫ້ມີຄົນຈີນເສຍຊີວິດ ແລະ ບາດເຈັບ, ຝ່າຍຈີນໄດ້ສົ່ງໜ່ວຍງານທີ່ປະກອບດ້ວຍຫຼາຍພາກສ່ວນເດີນທາງໄປປາກິດສະຖານເພື່ອດຳເນີນວຽກງານໃນທັນທີ. ໜ່ວຍງານດັ່ງກ່າວໄດ້ເດີນທາງໄປຮອດນະຄອນຫຼວງອິດລາມາບັດແລ້ວ ກໍໄດ້ຮ່ວມກັບສະຖານທູດຈີນປະຈຳປາກິດສະຖານ ວິສາຫະກິດທີ່ກ່ຽວຂ້ອງ ແລະອື່ນໆດຳເນີນວຽກງານຮັບມືສຸກເສີນຢ່າງຮອບດ້ານ. ໜ່ວຍງານດັ່ງກ່າວໄດ້ພົບປະກັບກະຊວງການຕ່າງປະເທດ ກະຊວງພາຍໃນ ກອງທັບ ເຈົ້າໜ້າທີ່ຕຳຫຼວດ ເຈົ້າໜ້າທີ່ພາກສ່ວນສືບຂ່າວລັບຂອງປາກິດສະຖານ, ໂດຍຮຽກຮ້ອງໃຫ້ປາກິດສະຖານຈົ່ງເຮັດວຽກສົ່ງທ້າຍຢ່າງເໝາະສົມ, ພະຍາຍາມສຸດຂີດເພື່ອປິ່ນປົວຜູ້ໄດ້ຮັບບາດເຈັບ, ສືບສວນຫາຄວາມເປັນຈິງ, ຈັບຜູ້ກໍ່ເຫດການ, ພ້ອມທັງໃຊ້ມາດຕະການປ້ອງກັນຄວາມປອດໄພທີ່ເຂັ້ມງວດກວ່າເກົ່າເພື່ອຮັບປະກັນຄວາມປອດໄພຂອງບຸກຄົນ ອົງການຈັດຕັ້ງ ແລະ ໂຄງການຂອງຈີນຢູ່ປາກິດສະຖານ. ຝ່າຍປາກິດສະຖານໄດ້ກ່າວປະນາມຢ່າງຮຸນແຮງຕໍ່ເຫດການກໍ່ການຮ້າຍຄັ້ງນີ້, ໄດ້ເລີ່ມໃຊ້ມາດຕະການເຮັດວຽກສົ່ງທ້າຍຢ່າງຮອບດ້ານ ແລະ ດຳເນີນຄະດີເພື່ອສືບສວນ-ສອບສວນຜູ້ກໍ່ເຫດ, ຈະໃຊ້ມາດຕະການປ້ອງກັນຄວາມປອດໄພຢ່າງເຂັ້ມງວດກວ່າເກົ່າ, ອອກແຮງສຸດຂີດເພື່ອປ້ອງກັນຜົນປະໂຫຍດຂອງຝ່າຍຈີນຢູ່ປາກິດສະຖານ.

ໃນໄລຍະດຳເນີນງານຢູ່ປາກິດສະຖານ, ໜ່ວຍງານຂອງຈີນໄດ້ໄປສະແດງຄວາມໄວ້ອາໄລຕໍ່ຜູ້ປະສົບເຄາະຮ້າຍ, ຢ້ຽມຢາມຜູ້ໄດ້ຮັບບາດເຈັບທີ່ຮັບປິ່ນປົວຢູ່ໂຮງໝໍ, ພ້ອມທັງໄປຢື້ຢາມຖາມຂ່າວຕໍ່ພະນັກງານວິສາຫະກິດຢູ່ສະຖານທີ່ໂຄງການ.