ກະຊວງການຕ່າງປະເທດຣັດເຊຍໄດ້ອອກຖະແຫຼງການໃນວັນທີ 11 ຕຸລານີ້ໂດຍໄດ້ສະແດງການປະທ້ວງຢ່າງຮຸນແຮງຕໍ່ສະຖານທູດຍີ່ປຸ່ນປະຈຳຣັດເຊຍກ່ຽວກັບເລື່ອງທີ່ຍີ່ປຸ່ນໄດ້ວາງແຜນຈະຈັດການຊ້ອມຮົບຮ່ວມກັບອາເມຣິກາຢູ່ເຂດໃກ້ຄຽງຊາຍແດນຣັດເຊຍໃນລະດູໃບໄມ້ຫຼົ່ນປີນີ້.

ຖະແຫຼງການລະບຸວ່າ: ຍີ່ປຸ່ນໄດ້ປະກາດຈະຈັດການຊ້ອມຮົບຮ່ວມກັບອາເມຣິກາໃນທ້າຍເດືອນຕຸລາຫາຕົ້ນເດືອນພະຈິກປີນີ້ ເຊິ່ງສະຖານທີ່ຈັດການຊ້ອມຮົບລວມທັງເຂດຮອກໄກໂດທີ່ຢູ່ໃກ້ກັບຊາຍແດນຣັດເຊຍ.

ຖະແຫຼງການລະບຸຕື່ມວ່າ: ການກະທຳແບບນີ້ແມ່ນຍອມຮັບບໍ່ໄດ້ຢ່າງເດັດຂາດ. ຣັດເຊຍໄດ້ອອກແຈ້ງເຕືອນຕໍ່ສະຖານທູດຍີ່ປຸ່ນປະຈຳຣັດເຊຍວ່າ ຈະປະຕິບັດມາດຕະການຕອບໂຕ້ທີ່ຈຳເປັນ ເພື່ອເພີ່ມທະວີຄວາມສາມາດດ້ານການປົກປ້ອງ ແລະ ປົກປັກຮັກສາອະທິປະໄຕຂອງຣັດເຊຍ.