ວັນທີ 11 ຕຸລານີ້, ທ່ານ ຫຼີ ສຽງ ນາຍົກລັດຖະມົນຕີຈີນ ໄດ້ເຂົ້າຢ້ຽມຄຳນັບທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ສປປ ລາວທີ່ນະຄອນຫຼວງວຽງຈັນ.

ທ່ານ ຫຼີ ສຽງ ໄດ້ສົ່ງຄຳອວຍພອນອັນສະໜິດສະໜົມຈາກທ່ານ ສີ ຈິ້ນຜິງ ປະທານປະເທດຈີນ ເຖິງທ່ານ ທອງລຸນ ສີສຸລິດ  ປະທານປະເທດລາວ ແລະ ອວຍພອນໃຫ້ປະເທດລາວເປັນເຈົ້າພາບຈັດກອງປະຊຸມສຸດຍອດຮ່ວມມືອາຊີຕາເວັນອອກແລະກອງປະຊຸມທີ່ກ່ຽວຂ້ອງຕ່າງໆຢ່າງສຳເລັດຜົນ.

ທ່ານ ຫຼີ ສຽງ ຊີ້ອອກວ່າ, ຈີນສະໜັບສະໜູນລາວເດີນຕາມເສັ້ນທາງສັງຄົມນິຍົມທີ່ສອດຄ່ອງກັບສະພາບແຫ່ງຊາດຂອງຕົນຢ່າງເດັດດ່ຽວໜຽວແໜ້ນ, ຍິນດີສືບຕໍ່ສະໜັບສະໜູນເຊິ່ງກັນແລະກັນຢ່າງແໜ້ນແຟ້ນກັບລາວໃນບັນຫາທີ່ກ່ຽວຂ້ອງເຖິງຜົນປະໂຫຍດຕົ້ນຕໍຂອງກັນແລະກັນ. ສອງຝ່າຍຄວນເລັ່ງລັດຜັນຂະຫຍາຍປະຕິບັດແຜນການສ້າງຄູ່ຮ່ວມຊາຕາກຳຈີນ-ລາວສະບັບໃໝ່, ສືບຕໍ່ຊຸກຍູ້ການເຊື່ອມໂຍງຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ກັບຍຸດທະສາດຂອງລາວທີ່ຫັນຈາກປະເທດທີ່ບໍ່ມີຊາຍແດນຕິດກັບທະເລກາຍເປັນປະເທດເຊື່ອມໂຍງເຊື່ອມຈອດກັບປະເທດໃກ້ຄຽງ, ເປີດກວ້າງການຮ່ວມມືໃນຂົງເຂດຕ່າງໆເຊັ່ນດ້ານການຄ້າ, ການລົງທຶນ, ຄວາມສາມາດດ້ານການຜະລິດ, ພະລັງງານໄຟຟ້າ ແລະບໍ່ແຮ່ເປັນຕົ້ນ, ສືບຕໍ່ຂຸດຄົ້ນກຳລັງແຮງບົ່ມຊ້ອນ, ເສີມຂະຫຍາຍບົດບາດຂອງເສັ້ນທາງລົດໄຟຈີນ-ລາວ, ຊຸກຍູ້ການຮ່ວມມືຮອບດ້ານລະຫວ່າງຈີນ-ລາວບັນລຸໄດ້ຜົນງານທີ່ເຫັນໄດ້ຫຼາຍກວ່າເກົ່າ. ຈີນຍິນດີເປີດກວ້າງການແລກປ່ຽນດ້ານວັດທະນະທຳ, ການທ່ອງທ່ຽວ, ການສຶກສາ ແລະ ການໄປມາຫາສູ່ຂອງປະຊາຊົນກັບລາວຢ່າງບໍ່ຢຸດຢັ້ງ, ເພີ່ມຄວາມເຂົ້າໃຈແລະມິດຕະພາບເພື່ອສ້າງພື້ນຖານທາງຈິດໃຈຂອງປະຊາຊົນສອງປະເທດໃຫ້ເລິກເຊິ່ງກ່ວາເກົ່າປະກອບສ່ວນໃຫ້ແກ່ການລົງເລີກການຮ່ວມມືສອງປະທດ.

ທ່ານ ທອງລຸນ ສີສຸລິດ ກ່າວວ່າ, ລາວຍິນດີເພີ່ມທະວີການແລກປ່ຽນຂັ້ນສູງກັບຈີນ, ຮັດແໜ້ນຍຸດທະສາດການພັດທະນາປະເທດຊາດຂອງລາວດ້ວຍການຮ່ວມມືໃນການສ້າງຂໍ້ລິເລີ່ມ "ໜຶ່ງແລວໜຶ່ງເສັ້ນທາງ", ຊຸກຍູ້ການຮ່ວມມືໃນຂົງເຂດທີ່ສຳຄັນເຊັ່ນທາງລົດໄຟລາວ-ຈີນແລະອື່ນໆ, ລົງເລີກການພົບປະແລກປ່ຽນດ້ານວັດທະນະທຳ, ຊຸກຍູ້ການສ້າງຄູ່ຮ່ວມຊາຕາກຳລາວ-ຈີນໃຫ້ກ້າວຂຶ້ນສູ່ລະດັບໃໝ່, ເພື່ອສ້າງຄວາມຜາສຸກໃຫ້ແກ່ປະຊາຊົນທັງສອງປະເທດ.