ວັນທີ 11 ຕຸລານີ້, ທ່ານຫຼີ ສຽງ, ນາຍົກລັດຖະມົນຕີຈີນໄດ້ພົບປະກັບທ່ານໄຊສົມພອນ ພົມວິຫານປະທານສະພາແຫ່ງຊາດລາວຢູ່ຫໍສະພາແຫ່ງຊາດລາວທີ່ນະຄອນຫຼວງວຽງຈັນ.

ທ່ານ ຫຼີ ສຽງ ກ່າວວ່າ, ຈີນ ແລະ ລາວເປັນເພື່ອນບ້ານສັງຄົມນິຍົມທີ່ມີໄມຕີຈິດມິດຕະພາບ, ໄດ້ສະໜັບສະໜູນເຊິ່ງກັນແລະກັນໃນການຕໍ່ສູ້ຍາດເອົາເອກະລາດຂອງຊາດແລະການປົດປ່ອຍປະເທດຊາດ, ໄດ້ຖອດຖອນບົດຮຽນເຊິ່ງກັນແລະກັນໃນການປະຕິຮູບແລະເປີດປະຕູສູ່ພາຍນອກ, ຄໍາວ່າ"ເປັນທັງສະຫາຍແລະອ້າຍນ້ອງ"ແມ່ນເວົ້າເຖິງມິດຕະພາບອັນເປັນມູນເຊື້ອລະຫວ່າງສອງພັກສອງລັດຢ່າງມີຊີວິດຊີວາ.

ພາຍໃຕ້ການຊີ້ນຳທາງຍຸດທະສາດຂອງທ່ານເລຂາທິການໃຫຍ່ສີ ຈິ້ນຜິງ ແລະ ທ່ານເລຂາທິການໃຫຍ່ທອງລຸນ ສີສຸລິດ, ການພົວພັນຂອງສອງປະເທດໄດ້ກ້າວເຂົ້າສູ່ຍຸກໃໝ່ແຫ່ງການສ້າງຄູ່ຮ່ວມຊາຕາກຳຈີນ-ລາວ. ຈີນຍິນດີຮ່ວມກັບລາວເພີ່ມທະວີການແລກປ່ຽນລະດັບສູງ, ເພີ່ມທະວີການພົວພັນທາງຍຸດທະສາດ, ຍຶດໝັ້ນແນວທາງທີ່ຖືກຕ້ອງແຫ່ງການພົວພັນລະຫວ່າງສອງປະເທດຢ່າງແໜ້ນແຟ້ນ, ລົງເລິກການຮ່ວມມືຮອບດ້ານໃນທຸກຂົງເຂດ, ເພີ່ມກຳລັງແຮງໃໝ່ໃຫ້ແກ່ການສ້າງຄູ່ຮ່ວມຊາຕາກຳຈີນ-ລາວ ພັດທະນາແບບຍືນຍົງ ແລະ ຍາວນານ.

ທ່ານ ຫຼີສຽງ ຊີ້ອອກວ່າ, ຈີນຍິນດີເພີ່ມທະວີການແລກປ່ຽນດ້ານນິຕິບັນຍັດກັບລາວ. ຫວັງວ່າສອງ ຝ່າຍຈະປະຕິບັດສັນຍາການຮ່ວມມືລະຫວ່າງອົງການນິຕິບັນຍັດຂອງສອງປະເທດ, ນຳໃຊ້ ກົນໄກຮ່ວມມືໃຫ້ດີ, ຮັກສາທ່າແຮງທີ່ດີໃນການແລກປ່ຽນ ຂັ້ນສູງຂອງອົງການນິຕິບັນຍັດ, ຄະນະກຳມະການສະເພາະກິດ ແລະ ໜ່ວຍງານມິດຕະພາບລະຫວ່າງສອງຝ່າຍ. ຊຸກຍູ້ການແລກປ່ຽນບົດຮຽນດ້ານການປົກຄອງ ແລະ ການຕິດຕາມກວດກາດ້ານນິຕິບັນຍັດ, ຮັບໃຊ້ສະພາບການລວມຂອງການພົວພັນຈີນ-ລາວໃຫ້ດີຂຶ້ນກວ່າເກົ່າ, ເພື່ອຊ່ວຍຊູຍູ້ໜູນໃຫ້ສອງຝ່າຍຮ່ວມກັນພັດທະນາແລະມີຄວາມວັດທະນາຖາວອນ.

ທ່ານ ໄຊສົມພອນ ພົມວິຫານ ກ່າວວ່າ, ລາວ ແລະ ຈີນມີມິດຕະພາບອັນເປັນມູນເຊື້ອຢ່າງເລິກເຊິ່ງ, ຈັງຫວະການພັດທະນາຂອງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດແມ່ນດີຫຼາຍ. ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ 3 ຂໍ້ລິເລີ່ມໃຫຍ່ທົ່ວໂລກ ທີ່ທ່ານເລຂາທິການໃຫຍ່ສີຈິ້ນຜິງສະເໜີອອກມານັ້ນ ໄດ້ຮັບການຍ້ອງຍໍຊົມເຊີຍຈາກປະຊາຄົມໂລກ, ປະເທດລາວກໍໃຫ້ຄວາມຊົມເຊີຍ ແລະ ສະໜັບສະໜູນຢ່າງເຕັມທີ່. ຂອບໃຈນຳຈີນ ທີ່ໄດ້ໃຫ້ການສະໜັບສະໜູນແກ່ການພັດທະນາເສດຖະກິດສັງຄົມຂອງລາວມາເປັນເວລາດົນນານ, ລາວຍິນດີເພີ່ມທະວີການແລກປ່ຽນລະຫວ່າງອົງການນິຕິບັນຍັດກັບຈີນ, ເພີ່ມທະວີການແລກປ່ຽນບົດຮຽນດ້ານການຄຸ້ມຄອງລັດຢ່າງເລິກເຊິ່ງ, ຊຸກຍູ້ມິດຕະພາບລາວ-ຈີນ ແລະ ການຮ່ວມມືທີ່ຕິດແທດຕົວຈີງກ້າວສູ່ລວງເລິກ, ແລະຊຸກຍູ້ການກໍສ້າງຄູ່ຮ່ວມຊາຕາກຳລາວ-ຈີນໃຫ້ໄດ້ຮັບຜົນງານຫຼາຍກວ່າເກົ່າ.