ວັນທີ 11 ຕຸລານີ, ທ່ານຫຼີສຽງ ນາຍົກລັດຖະມົນຕີຈີນ ໄດ້ເຂົ້າຮ່ວມກອງປະຊຸມສຸດຍອດອາຊີຕາເວັນອອກຄັ້ງທີ 19 ທີ່ນະຄອນຫຼວງວຽງຈັນ.

 ທ່ານຫຼີສຽງ ກ່າວວ່າ: ປະຈຸບັນ, ໂລກໄດ້ກ້າວເຂົ້າສູ່ໄລຍະທີ່ເກີດຄວາມວຸ້ນວາຍແລະການປ່ຽນແປງໃໝ່, ຈັງຫວະການຟື້ນຟູເສດຖະກິດໂລກຍັງບໍ່ພຽງພໍ.  ປີນີ້ແມ່ນວັນຄົບຮອບ 70 ປີຂອງການເຜີຍແຜ່ 5 ຫຼັກການແຫ່ງການຢູ່ຮ່ວມກັນໂດຍສັນຕິ.  ໃນໂລກທີ່ຕິດພັນກັບຄວາມວຸ້ນວາຍ, “ການຢູ່ຮ່ວມກັນໂດຍສັນຕິ” ແມ່ນຍິ່ງມີຄຸນຄ່າ, ການຍຶດໝັ້ນຄວາມສະເໝີພາບ, ເຄົາລົບເຊິ່ງກັນ ແລະກັນ ແລະຕ່າງຝ່າຍຕ່າງມີຜົນປະໂຫຍດ, ຮ່ວມກັນຊຸກຍູ້ສະຖຽນລະພາບແມ່ນມີຄວາມໝາຍສຳຄັນຕໍ່ການຮັກສາການພັດທະນາຢ່າງວ່ອງໄວຂອງອາຊີ, ການຮັກສາຄວາມຍຸຕິທຳແລະຄວາມເປັນທຳຂອງສາກົນຕ້ອງຖອດຖອນສະຕິປັນຍາຈາກ 5 ຫຼັກການເຊິ່ງຈົນຮອດປັດຈຸບັນ  ບໍ່ພຽງແຕ່ບໍ່ໄດ້ຫລ້າສະໄຫມເທົ່ານັ້ນ, ແຕ່ຍັງຄົງສະແດງໃຫ້ເຫັນເຖິງຄຸນຄ່າແຫ່ງຍຸກສະໄຫມ ແລະຄວາມສໍາຄັນຂອງໂລກຕື່ມອີກ.

ທ່ານຫຼີສຽງຊີ້ອອກວ່າ: ຈີນຍິນດີຮ່ວມກັບທຸກຝ່າຍສືບຕໍ່ຊຸກຍູ້ 5 ຫຼັກການຢູ່ຮ່ວມກັນໂດຍສັນຕິ, ສຸມໃສ່ຊຸກຍູ້ການກໍ່ສ້າງປະຊາຄົມຮ່ວມຊາຕາກຳຂອງມວນມະນຸດ, ສ້າງຄວາມເຫັນດີເຫັນພ້ອມທີ່ດີກວ່າເກົ່າ, ລົງເລິກຄວາມໄວ້ເນື້ອເຊື່ອໃຈເຊິ່ງກັນ ແລະກັນ, ເພີ່ມທະວີການຮ່ວມມື. ຮ່ວມກັນສ້າງອະນາຄົດທີ່ສົດໃສ ແລະດີກວ່າເກົ່າຂອງພາກພື້ນ ແລະໂລກ.  ໜຶ່ງ, ເດັດດ່ຽວປົກປັກຮັກສາສັນຕິພາບ ແລະສະຖຽນລະພາບ.  ສືບຕໍ່ສະໜັບສະໜູນຂອບພາກພື້ນທີ່ມີອາຊຽນເປັນໃຈກາງ, ເປີດກວ້າງ ແລະເຊື່ອມໂຍງເຂົ້າກັນ,ປະຕິບັດຕາມເສັ້ນທາງການຄຸ້ມຄອງຄວາມໝັ້ນຄົງຂອງພາກພື້ນ ໂດຍມີການປຶກສາຫາລືຢ່າງກວ້າງຂວາງ, ປະກອບສ່ວນຮ່ວມ ແລະມີຜົນປະໂຫຍດຮ່ວມ. ພວກເຮົາຕ້ອງມີຄວາມລະມັດລະວັງສູງ ແລະເດັດດ່ຽວສະກັດກັ້ນພຶດຕິກຳທີ່ເປັນອັນຕະລາຍຕໍ່ຄວາມໝັ້ນຄົງຂອງພາກພື້ນ ແລະເພີ່ມຄວາມສ່ຽງຕໍ່ການປະທະກັນ. ສອງແມ່ນຍຶດໝັ້ນຕ່າງຝ່າຍຕ່າງໄດ້ຮັບຜົນປະໂຫຍດຢ່າງສະເໝີຕົ້ນສະເໝີປາຍ. ຈີນຍິນດີຮ່ວມກັບທຸກຝ່າຍ ຕັ້ງໜ້າຈັດຕັ້ງປະຕິບັດຂໍ້ລິເລີ່ມພັດທະນາໂລກທີ່ທ່ານປະທານສີຈິ້ນຜິງວາງອອກ, ເສີມຂະຫຍາຍທ່າແຮງຂອງໃຜລາວໃຫ້ດີ, ເພີ່ມທະວີການລົງທຶນໃນຂົງເຂດຕ່າງໆ ເຊັ່ນ: ການຫັນເປັນສີຂຽວ ແລະເສດຖະກິດດີຈີຕອນເປັນຕົ້ນທີ່ປະເທດຕ່າງໆໃນພາກພື້ນຕ້ອງການ, ແລະບັນລຸການພັດທະນາແບບກວມລວມແລະໄດ້ຮັບຜົນປະໂຫຍດທົ່ວໄປ. ການພັດທະນາແບບລວມ ແລະລວມ.  ສາມ, ແມ່ນຊຸກຍູ້ການຮ່ວມມືຢ່າງແໜ້ນແຟ້ນ.  ພວກເຮົາຕ້ອງປະຕິບັດສັນຍາຄູ່ຮ່ວມມືເສດຖະກິດຮອບດ້ານໃນພາກພື້ນຢ່າງຮອບດ້ານ ແລະມີຄຸນນະພາບສູງ, ເລັ່ງລັດການກໍ່ສ້າງເຂດການຄ້າເສລີອາຊີ - ປາຊີຟິກ, ຊຸກຍູ້ການເຊື່ອມໂຍງເສດຖະກິດໃນພາກພື້ນ, ແລະຫຼີກເວັ້ນບໍ່ໃຫ້ບັນຫາດ້ານເສດຖະກິດການຄ້າກາຍເປັນບັນຫາດ້ານການເມືອງ ແລະຄວາມໝັ້ນຄົງ.

 ທ່ານຫຼີສຽງກ່າວຕື່ມວ່າ: ການພັດທະນາ ແລະຄວາມຈະເລີນຮຸ່ງເຮືອງຂອງພາກພື້ນແມ່ນບໍ່ສາມາດແຍກອອກຈາກສັນຕິພາບ ແລະສະຖຽນລະພາບຢູ່ທະເລຈີນໃຕ້.  ຈີນຍຶດໝັ້ນປະຕິບັດຕາມກົດໝາຍສາກົນລວມທັງສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລຕະຫຼອດມາ, ແລະຍຶດໝັ້ນຕໍ່ຖະແຫຼງການວ່າດ້ວຍການປະພຶດຂອງຝ່າຍຕ່າງໆຢູ່ທະເລຈີນໃຕ້ຢ່າງສະເໝີຕົ້ນສະເໝີປາຍ,ຍຶດໝັ້ນແກ້ໄຂຄວາມຂັດແຍ້ງຢ່າງເໝາະສົມໂດຍຜ່ານການສົນທະນາ ແລະປຶກສາຫາລືກັບບັນດາປະເທດທີ່ກ່ຽວຂ້ອງ ແລະດຳເນີນການຮ່ວມມືທາງທະເລຢ່າງຕັ້ງໜ້າ. ປະຈຸບັນ, ຈີນ ແລະບັນດາປະເທດອາຊຽນພວມຕັ້ງໜ້າຊຸກຍູ້ການປຶກສາຫາລືກ່ຽວກັບ "ກົດແຫ່ງການປະພຶກຢູ່ທະເລຈີນໃຕ້" ແລະພະຍາຍາມບັນລຸຂໍ້ຕົກລົງໂດຍໄວ.  ບັນດາປະເທດທີ່ກ່ຽວຂ້ອງຢູ່ນອກພາກພື້ນຄວນເຄົາລົບ ແລະສະໜັບສະໜູນຄວາມພະຍາຍາມຂອງຈີນແລະບັນດາປະເທດໃນພາກພື້ນໃນການຮ່ວມກັນຮັກສາສັນຕິພາບ ແລະສະຖຽນລະພາບຢູ່ທະເລຈີນໃຕ້ ແລະເສີມຂະຫຍາຍບົດບາດທີ່ມີຄວາມສ້າງສັນຕໍ່ສັນຕິພາບ ແລະສະຖຽນລະພາບຂອງພາກພື້ນ.