ຫວ່າງບໍ່ດົນມານີ້, ນັກຂຽນໄດ້ໄປທັດສະນະສຶກສາຢູ່ເຂດນິຄົມອຸດສາຫະກຳເສດຖະກິດການບິນອາກາດຕ່ຳແຫ່ງທຳອິດຂອງນະຄອນຫຼວງປັກກິ່ງທີ່ຕັ້ງຢູ່ເມືອງເຢນຊິ້ງ, ເຂດນິຄົມອຸດສາຫະກຳແຫ່ງນີ້ກວມເນື້ອທີ່ 552.000 ຕາແມັດ, ໄດ້ດຶງດູດວິສາຫະກິດໂດຣນຮ້ອຍກວ່າແຫ່ງເຂົ້າໄປສ້າງທຸລະກິດ, ສ້າງເປັນຕ່ອງໂສ້ອຸດສາຫະກຳທີ່ຄົບວົງຈອນໂດຍກວມເອົາການຄົ້ນຄວ້າ ການຜະລິດ ແລະ ການປະຍຸກໃຊ້ຢ່າງຄົບຊຸດ. ຕາມເຈົ້າໜ້າທີ່ທີ່ກ່ຽວຂ້ອງແຈ້ງໃຫ້ຮູ້ວ່າ, ຄາດຄະເນວ່າ ຮອດປີ 2025, ຍອດປະລິມານເສດຖະກິດການບິນອາກາດຕ່ຳໃນທົ່ວເມືອງເຢນຊິ້ງຈະບັນລຸເຖິງ 5 ຕື້ຢວນ.

ເສດຖະກິດການບິນອາກາດຕ່ຳເປັນທິດທາງທີ່ສຳຄັນໃນການບຳລຸງສ້າງພະລັງແຮງຂັບເຄື່ອນໃໝ່ທີ່ຊຸກຍູ້ການພັດທະນາເສດຖະກິດ, ໄດ້ກວມເອົາຮູບແບບຂະແໜງການການບິນແບບດັ້ງເດີມ, ພ້ອມທັງກວມເອົາຮູບແບບການຜະລິດ ແລະ ບໍລິການການບິນອາກາດຕ່ຳທີ່ຖືໂດຣນເປັນການຄ້ຳປະກັນ, ຜ່ານການນຳໃຊ້ເຕັກໂນໂລຊີຂໍ້ມູນຂ່າວສານ ແລະ ດິຈີຕອນ ເຊື່ອມໂຍງເຂົ້າກັບການເຄື່ອນໄຫວເສດຖະກິດ-ສັງຄົມຫຼາຍກວ່າເກົ່າ. ມາຮອດປັດຈຸບັນໄດ້ກາຍເປັນຮູບແບບເສດຖະກິດສັງລວມຊະນິດໜຶ່ງ.

ການພັດທະນາເສດຖະກິດການບິນອາກາດຕ່ຳບໍ່ສາມາດປັດສະຈາກເຄື່ອງບິນທີ່ກ້າວໜ້າໄດ້, ຕ້ອງການການຄ້ຳຊູດ້ວຍເຕັກໂນໂລຊີຂໍ້ມູນຂ່າວສານ ແລະ ອິນເຕີເນັດ. ກະຊວງອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານຈີນໄດ້ເຜີຍແຜ່ຂໍ້ມູນໂດຍສະແດງໃຫ້ເຫັນວ່າ, ໃນຊຸມປີຜ່ານມາ, ອຸດສາຫະກຳຜະລິດອຸປະກອນການບິນທີ່ຖືເຮືອບິນໂດຣນເປັນຕົວແທນນັ້ນໄດ້ພັດທະນາໄປຢ່າງວ່ອງໄວ. ອີງຕາມສະຖິຕິທີ່ບໍ່ຄົບຖ້ວນ, ນັບມາຮອດທ້າຍປີ 2023, ຈີນມີວິສາຫະກິດຄົ້ນຄວ້າຜະລິດໂດຣນພົນລະເຮືອນຫຼາຍກວ່າ 2300 ແຫ່ງ, ຜະລິດຕະພັນໂດຣນທີ່ຜະລິດຢ່າງເປັນຂະໜາດໃຫຍ່ນັ້ນມີຫຼາຍກວ່າ 1000 ລຸ້ນ. ນັບມາຮອດເດືອນມິຖຸນາປີ 2024, ໂດຣນທີ່ລົງລະບຽນດ້ວຍຊື່ແທ້ໃນທົ່ວປະເທດຈີນມີຫຼາຍກວ່າ 1.875.000 ລຳ, ວິສາຫະກິດດຳເນີນທຸລະກິດກ່ຽວກັບໂດຣນມີຫຼາຍກວ່າ 14.000 ແຫ່ງ. ພ້ອມກັນນັ້ນ, ຢູ່ແຫ່ງຕ່າງໆຂອງຈີນໄດ້ຄົ້ນຄວ້າກໍລະນີທີ່ສາມາດນຳໃຊ້ໂດຣນໄດ້ຢ່າງຕັ້ງໜ້າ, ປະສົມປະສານກັບການກໍ່ສ້າງພື້ນຖານໂຄງລ່າງ, ເຕົ້າໂຮມອຸດສາຫະກຳ ແລະ ການສ້າງເວທີບໍລິການດ້ານການຄຸ້ມຄອງແບບມືອາຊີບ. ຍັງໄດ້ນຳໃຊ້ເຕັກໂນໂລຊີຂໍ້ມູນຂ່າວສານທີ່ທັນສະໄໝ ເຊັ່ນວ່າ: ຄລາວຄອມພິວຕິງ, ຖານຂໍ້ມູນມະຫາສານ, ອິນເຕີເນັດໃນສັບພະສິ່ງ, ປັນຍາປະດິດ ແລະ ອິນເຕີເນັດເຄື່ອນທີ່ເປັນຕົ້ນ, ເພີ່ມທະວີການປະສານສົມທົບດ້ານເຕັກໂນໂລຊີ ແລະ ການບໍລິຫານ, ເປີດກວ້າງຂອບເຂດນຳໃຊ້ການບິນແບບບໍ່ມີຄົນຂັບຢ່າງບໍ່ຢຸດຢັ້ງ, ຕົວຢ່າງວ່າ: ການຊ່ວຍເຫຼືອກູ້ໄພແບບສຸກເສີນ, ການຂົນສົ່ງສິນຄ້າ, ການປູກຝັງກະສິກຳປ່າໄມ້, ການລາດຕະເວນກວດກາລະບົບໄຟຟ້າ, ການທ່ອງທ່ຽວວັດທະນະທຳ ແລະອື່ນໆ, ເຊິ່ງໄດ້ເສີມຂະຫຍາຍບົດບາດນັບມື້ນັບສຳຄັນກວ່າເກົ່າເຂົ້າໃນການຊຸກຍູ້ການພັດທະນາເສດຖະກິດ-ສັງຄົມ, ເພີ່ມທະວີການປະກັນສັງຄົມ ແລະ ວຽກງານປ້ອງກັນຊາດ.

ເດືອນກຸມພາປີ 2021, ມະໂນພາບ “ເສດຖະກິດການບິນອາກາດຕ່ຳ” ໄດ້ບັນທຶກເຂົ້າໃນ “ໂຄງຮ່າງແຜນພັດທະນາເຄືອຂ່າຍຄົມມະນາຄົມແບບສັງລວມແຫ່ງຊາດ” ເປັນຄັ້ງທຳອິດ. ເດືອນທັນວາປີ 2023, ໃນກອງປະຊຸມວຽກງານເສດຖະກິດສູນກາງຈີນໄດ້ສະເໜີຢ່າງຈະແຈ້ງວ່າ ຈະພັດທະນາເສດຖະກິດການບິນອາກາດຕ່ຳເປັນອຸດສາຫະກຳໃໝ່ທີ່ມີລັກສະນະຍຸດທະສາດ, ໃນບົດລາຍງານວຽກງານລັດຖະບານປະຈຳປີ 2024 ຂອງຈີນໄດ້ເນັ້ນໜັກເຖິງການພັດທະນາເສດຖະກິດການບິນອາກາດຕ່ຳອີກຄັ້ງໜຶ່ງ. ການສະໜັບສະໜູນຕໍ່ເສດຖະກິດການບິນອາກາດຕ່ຳກໍນັບມື້ນັບເຂັ້ມແຂງຂຶ້ນ, ຈາກຂັ້ນສູນກາງລົງຮອດທ້ອງຖິ່ນ ໄດ້ນຳໃຊ້ນະໂຍບາຍ ແລະ ມາດຕະການອຳນວຍຄວາມສະດວກຕ່າງໆ ເຊິ່ງໄດ້ສ້າງພື້ນຖານທີ່ໝັ້ນໜຽວໃຫ້ແກ່ການພັດທະນາຂອງເສດຖະກິດການບິນອາກາດຕ່ຳ. ອີງຕາມຂໍ້ມູນຂອງອົງການການບິນພົນລະເຮືອນຈີນໄດ້ຢຶນຢັນວ່າ, ປີ 2023 ຜ່ານມາ ມູນຄ່າເສດຖະກິດການບິນອາກາດຕ່ຳມີຫຼາຍກວ່າ 500 ຕື້ຢວນ, ເມື່ອຮອດປີ 2030 ຄາດວ່າຈະບັນລຸເຖິງ 2000 ຕື້ຢວນ.

ເສດຖະກິດການບິນອາກາດຕ່ຳແມ່ນພົວພັນເຖິງອຸດສາຫະກຳການຜະລິດລະດັບສູງ, ພະລັງງານໃໝ່, ວັດສະດຸໃໝ່ ແລະອີກຫຼາຍຂົງເຂດ, ການປະດິດສ້າງໃໝ່ແມ່ນສອດຫ້ອຍຢູ່ໃນທົ່ວຂະບວນການ, ທັງເປັນທິດທາງທີ່ສຳຄັນແຫ່ງການບຳລຸງສ້າງພະລັງແຮງຂັບເຄື່ອນການພັດທະນາ, ມີຈຸດພິເສດຕ່າງໆ, ເຊັ່ນ: ນຳພາໂດຍການປະດິດສ້າງໃໝ່, ພັດທະນາຕາມທິດສີຂຽວ ແລະ ກາກບອນຕ່ຳ, ເຊື່ອມໂຍງເສດຖະກິດດິຈີຕອນ ແລະ ເສດຖະກິດຕົວຈິງ. ໃນຄື້ນກະແສຟອງແຫ່ງການພັດທະນາກຳລັງການຜະລິດໃນຄຸນນະພາບໃໝ່ນັ້ນ, ເສດຖະກິດການບິນອາກາດຕ່ຳຍ້ອນມີຖານະຍຸດທະສາດພິເສດ ແລະ ກຳລັງແຮງບົ່ມຊ້ອນທີ່ໃຫຍ່ຫຼວງ, ຍ່ອມຈະກາຍເປັນຫົວຈັກໃໝ່ທີ່ຊຸກຍູ້ການຍົກລະດັບອຸດສາຫະກຳ.

ໃນຖານະເປັນຈຸດເຕີບໂຕໃໝ່ດ້ານເສດຖະກິດ, ເສດຖະກິດການບິນອາກາດຕ່ຳໄດ້ຮັບຄວາມສົນໃຈໃນຂອບເຂດທົ່ວໂລກ, ແລະມີທ່ວງທ່າທີ່ພັດທະນາໄປຢ່າງວ່ອງໄວ, ໂດຍສະເພາະຢູ່ພາກພື້ນອາຊີຕາເວັນອອກສຽງໃຕ້. ຢູ່ພາກພື້ນນີ້ມີເກາະດອນຫຼາຍ ແລະ ມັກເກີດໄພທຳມະຊາດ ເຊິ່ງລວມທັງລົມພາຍຸຢູ່ເລື້ອຍໆ, ເຄື່ອງບິນທີ່ບິນຕ່ຳ ແລະ ໂດຣນໄດ້ເສີມຂະຫຍາຍບົດບາດທີ່ສຳຄັນເຂົ້າໃນການຕິດຕາມໄພທຳມະຊາດ ການກູ້ໄພ ແລະ ສົ່ງເຄື່ອງໄປສູ່ເຂດຫ່າງໄກສອກຫຼີກ. ດັ່ງນັ້ນ, ປະເທດອາຊີຕາເວັນອອກສຽງໃຕ້ມີຄວາມຕ້ອງການຢ່າງຮີບດ່ວນຕໍ່ອຸປະກອນແບບນີ້ໃນການກໍ່ສ້າງພື້ນຖານໂຄງລ່າງ ແລະ ການຄຸ້ມຄອງເລື່ອງສຸກເສີນ. ສິ່ງສຳຄັນໄປກວ່ານັ້ນຄື, ຈີນ ແລະ ປະເທດສະມາຊິກອາຊຽນມີການພົວພັນກັນຢ່າງໃກ້ຊິດໃນດ້ານພູມີລັດຖະສາດ ການຮ່ວມມືເສດຖະກິດ ແລະ ການແລກປ່ຽນວັດທະນະທຳ, ການຮ່ວມມືລະຫວ່າງຈີນ-ອາຊຽນໃນຂົງເຂດເສດຖະກິດການບິນອາກາດຕ່ຳ, ບໍ່ພຽງແຕ່ຈະມີຜົນດີຕໍ່ການຍົກລະດັບອຸດສາຫະກຳ ແລະ ການພັດທະນາຂອງສອງຝ່າຍເທົ່ານັ້ນ, ຫາກຍັງຈະເພີ່ມພະລັງແຮງຂັບເຄື່ອນອັນໃໝ່ໃຫ້ແກ່ການປະດິດສ້າງໃໝ່ດ້ານວິທະຍາສາດເຕັກໂນໂລຊີ ແລະ ການພັດທະນາແບບຍືນຍົງຂອງພາກພື້ນນີ້ອີກດ້ວຍ.