ວັນທີ 17 ຕຸລານີ້,ທ່ານນາງເມົານີງ ໂຄສົກກະຊວງການຕ່າງປະເທດຈີນຈັດກອງປະຊຸມຖະແຫຼງຂ່າວ.ມີນັກຂ່າວຖາມວ່າ: ຕາມຂ່າວແຈ້ງວ່າ,ໄຕ້ຫວັນປະກາດວ່າ ສຳນັກງານ ຜູ້ຕາງໜ້າທີ່ປະຈຳຢູ່ນະຄອນມຸມບາຍຂອງອິນເດຍ

ເລີ່ມປະຕິບັດງານຢ່າງເປັນທາງການແລ້ວ. ສຳນັກງານແຫ່ງນີ້ຈະກາຍເປັນສຳນັກງານປະຈຳອິນເດຍແຫ່ງທີສາມຂອງໄຕ້ຫວັນ. ຈີນມີຄວາມເຫັນຄືແນວໃດຕໍ່ກັບເລື່ອງນີ້?

     ທ່ານນາງເມົານີງຕອບວ່າ: ຢູ່ໃນໂລກນີ້ມີພຽງແຕ່ປະເທດຈີນດຽວເທົ່ານັ້ນ,ໄຕ້ຫວັນແມ່ນພາກສ່ວນໜຶ່ງທີ່ແບ່ງແຍກອອກຈາກຜືນແຜ່ນດິນຈີນບໍ່ໄດ້.ຈີນເດັດດ່ຽວຄັດຄ້ານປະເທດທີ່ສ້າງການພົວພັນທາງການທູດກັບຈີນ ດຳເນີນການຕິດຕໍ່ ແລະ ການໄປມາຫາສູ່ທາງການກັບໄຕ້ຫວັນດ້ວຍຮູບການໃດໆ ເຊິ່ງລວມທັງການຕັ້ງສຳນັກງານຜູ້ຕາງໜ້າເຊິ່ງກັນແລະກັນ,ຈີນໄດ້ຕໍ່ວາທັກທ້ວງກັບອິນເດຍຢ່າງເຄັ່ງຂຶມ. ຫຼັັກການປະເທດຈີນດຽວແມ່ນຄຳໝັ້ນສັນຍາທາງການເມືອງທີ່ອິນເດຍໄດ້ໃຫ້ໄວ້ກັບຈີນຢ່າງເຂັ້ມງວດ,ແມ່ນພື້ນຖານທາງການເມືອງຂອງການພົວພັນລະຫວ່າງຈີນ ກັບ ອິນເດຍ.ຈີນຮຽກຮ້ອງໃຫ້ອິນເດຍຈົ່ງເຄົາລົບຄຳໝັ້ນສັນຍາຢ່າງເຂັ້ມງວດ, ແກ້ໄຂບັນຫາກ່ຽວກັບໄຕ້ຫວັນຢ່າງສຸຂຸມຮອບຄອບ,ບໍ່ດຳເນີນການໄປມາຫາສູ່ທາງການດ້ວຍຮູບການໃດໆກັບເຂດໄຕ້ຫວັນ ເພື່ອປ້ອງກັນບໍ່ໃຫ້ມີສິ່ງລົບກວນຂະບວນການປັບປຸງການພົວພັນລະຫວ່າງສອງປະເທດ.