ຕອນບ່າຍວັນທີ 15 ຕຸລາ2024, ທ່ານສີຈິ້ນຜິງ ປະທານປະເທດຈີນໄດ້ເດີນທາງໄປເຄື່ອນໄຫວຢ້ຽມຢາມແລະເຮັດວຽກຢູ່ບ້ານອ້າວຈຽວຕາແສງເສີນເສິງເມືອງຕົ່ງຊ່ານນະຄອນຈ່າງໂຈ່ວແຂວງຟູຈ້ຽນ ທາງພາກຕາເວັນອອກສຽງໃຕ້ຂອງຈີນ, ເພິ່ນໄດ້ກວດເບິ່ງອາຫານທະເລແຫ້ງ ແລະ ສິນໃນນ້ຳທີ່ຫາໄດ້ຈາກການປະມົງຢູ່ທ່າເຮືອພາຍໃນບ້ານ ເພື່ອເກັບກຳຂໍ້ມູນກ່ຽວກັບການຊຸກຍູ້ການພັດທະນາຊົນນະບົດຂອງທ້ອງຖິ່ນແຫ່ງນີ້ໃຫ້ຈະເລີນ.

ກ່ອນໜ້ານີ້ເດືອນໜຶ່ງ, ທ່ານສີຈິ້ນຜິງໄດ້ຊີ້ໃຫ້ເຫັນໃນໂອກາດເຄື່ອນໄຫວຢ້ຽມຢາມແລະເຮັດວຽກຢູ່ຖານຜະລິດໝາກໂປ້ມຮວານິວນານຊ່ານເມືອງມ້າຍຈີ່ນະຄອນທຽນສຸຍແຂວງກ່ານຊູ້ວ່າ: “ຊົນນະບົດຖ້າຢາກພັດທະນາໃຫ້ຈະເລີນຂໍກຸນແຈສຳຄັນແມ່ນອຸດສາຫະກຳມີການພັດທະນາຢ່າງຈະເລີນຮຸ່ງເຮືອງ.”

ເວົ້າສຳລັບປະເທດຈີນແລ້ວ, ການສ້າງສາປະເທດສັງຄົມນິຍົມທັນສະໄໝຢ່າງຮອບດ້ານ, ໜ້າທີ່ອັນໜັກໜ່ວງທີ່ສຸດຍັງຄົງຢູ່ນຳຊົນນະບົດ. ປະຊາຊາດຢາກຟື້ນຟູຄວາມຈະເລີນຮຸ່ງເຮືອງຄືນໃໝ່, ຊົນນະບົດຕ້ອງມີຄວາມຈະເລີນຮຸ່ງເຮືອງ. ຕໍ່ກັບຍຸດທະສາດການພັດທະນາຊົນນະບົດໃຫ້ຈະເລີນຢ່າງຮອບດ້ານ, ທ່ານສີຈິ້ນຜິງມີຄວາມຫ່ວງໃຍມາໂດຍຕະຫຼອດ, ເພິ່ນມີສາຍຕາເບິ່ງກວ້າງມອງໄກທີ່ມີຄວາມໝາຍໝັ້ນຕໍ່ເປົ້າໝາຍ, ຍັງມີຄວາມໜັກແໜ້ນໃນການວາງແຜນປະຕິບັດຢ່າງຖືກເປົ້າໝາຍແລະຕິດແທດຕົວຈິງ.

ບ້ານອ້າວຈຽວ 

ບ້ານອ້າວຈຽວ ຕັ້ງຢູ່ພາກຕາເວັນອອກສຽງໃຕ້ຂອງເກາະຕົ່ງຊ່ານແຂວງຟູຈ້ຽນ, ເປັນແຫຼມຍາວມີຮູບຊົງປຽບເໝືອນຟອຍແຕ້ມຮູບນ້ຳມັນກ້ານໜຶ່ງເດ່ອອກໄປກາງທະເລ. ປີ2001, ໃນໄລຍະທີ່ເຮັດວຽກຢູ່ແຂວງຟູຈ້ຽນ, ທ່ານສີຈິ້ນຜິງເຄີຍໄປເຄື່ອນໄຫວຢ້ຽມຢາມບ້ານແຫ່ງນີ້ມາແລ້ວ. ຫຼັງຈາກເວລາຜ່ານໄປໄດ້ 23 ປີ, ທ່ານສີຈິ້ນຜິງໄດ້ເດີນທາງໄປບ້ານແຫ່ງນີ້ອີກເທື່ອໜຶ່ງ, ເມື່ອໄດ້ເຫັນບ້ານແຫ່ງນີ້ເກີດການປ່ຽນແປງຢ່າງໃຫຍ່ຫຼວງ, ເພິ່ນຮູ້ສຶກປິຕິຊົມຊື່ນເປັນຢ່າງຍິ່ງ ແລະເວົ້າດ້ວຍຄວາມປະທັບໃຈວ່າ: ການພັດທະນາຊົນນະບົດໃຫ້ຈະເລີນຍັງຄົງຕ້ອງເສີມຂະຫຍາຍທ່າແຮງຂອງທ້ອງຖິ່ນແລ້ວ, ພັດທະນາຊັບພະຍາກອນທາງທະເລໃຫ້ດີ.

ການເສີມຂະຫຍາຍທ່າແຮງ, ຂໍກະແຈສຳຄັນແມ່ນຢູ່ກັບການກຳກັບວິທີການທີ່ເສີມຂະຫຍາຍເງື່ອນໄຂເອື້ອອຳນວຍຂອງທ້ອງຖິ່ນ.

ກະຊັງລ້ຽງສັດນ້ຳທະເລຂອງບ້ານອ້າວຈຽວ

ບ້ານອ້າວຈຽວມີທະເລອ້ອມຮອບສາມດ້ານ, ຊາວບ້ານດຳລົງຊີວິດແບບລຽບງ່າຍຢູ່ຕາມແຄມຝັ່ງທະເລ ແລະ ມີການພັດທະນາຢ່າງຈະເລີນຍ້ອນອາໄສຂະແໜງການປະມົງ. ຢູ່ເທິງທະເລ, ບ້ານອ້າວຈຽວໄດ້ພັດທະນາກະຊັງນ້ຳເລິກຈຳນວນ 1.110 ກະຊັງ, ລ້ຽງສັດນ້ຳປະເພດຕ່າງໆກວມເນື້ອທີ່ປະມານ44ເຮັກຕາ, ຢູ່ແຄມຝັ່ງ, ບ້ານແຫ່ງນີ້ໄດ້ມີຟາມລ້ຽງສັດນ້ຳທະເລເຊັ່ນ: ປາເປົາຮືຫຼືປາອາບາໂລນ(abalone), ປາເກົ໋າ ເປັນຕົ້ນ ຈຳນວນ 128 ແຫ່ງ. “ອູ່ເຂົ້າທາງທະເລ”ໄດ້ສ້າງລາຍຮັບເພີ່ມໃຫ້ຊາວບ້ານ, ການພັດທະນາຂະແໜງການປະມົງໂດຍເຊື່ອມໂຍງເຂົ້າກັບການທ່ອງທ່ຽວນັ້ນໄດ້ເຮັດໃຫ້ຊາວບ້ານຫຼາຍກວ່າເກົ່າໄດ້ປະກອບອາຊີບການທ່ອງທ່ຽວ.

ການພັດທະນາອຸດສາຫະກຳທີ່ມີເອກະລັກພິເສດໄດ້ພາໃຫ້ຊາວບ້ານມີລາຍໄດ້ເພີ່ມຂຶ້ນ, ເຮັດໃຫ້ບ້ານຊົນນະບົດສວຍງາມຂຶ້ນ ເຮັດໃຫ້ຊາວກະສິກອນໄດ້ຮັບຜົນປະໂຫຍດ, ຮູ້ສຶກມີຄວາມສຸກແລະປອດໄພຂຶ້ນຢ່າງບໍ່ຢຸດຢັ້ງ.

ນັບຕັ້ງແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ20ຂອງພັກຄອມມູນິດຈີນເມື່ອປີ2022ເປັນຕົ້ນມາ, ທ່ານສີຈິ້ນຜິງໄດ້ລົງເຄື່ອນໄຫວຢ້ຽມຢາມແລະເຮັດວຽກຢູ່ແຫ່ງຕ່າງໆເລື້ອຍໆ, ເພິ່ນໄດ້ໃຫ້ຄວາມເອົາໃຈໃສ່ທີ່ສຸດຕໍ່ການພັດທະນາອຸດສາຫະກຳທີ່ມີເອກະລັກພິເສດຂອງຊົນນະບົດ. ຕົວຢ່າງ:

ຕອນເຄື່ອນໄຫວຢ້ຽມຢາມສວນປູກໝາກລິ່ນຈີ່ຢູ່ນະຄອນມ້າວມິງແຂວງກວາງຕຸ້ງ, ທ່ານສີຈິ້ນຜິງໄດ້ຮຽກຮ້ອງໄປຍັງປະຊາຊົນແລະພະນັກງານທ້ອງຖິ່ນວ່າ: “ຕ້ອງພັດທະນາອຸດສາຫະກຳລິ່ນຈີ່ທີ່ມີເອກະລັກພິເສດ ແລະ ການທ່ອງທ່ຽວວັດທະນະທຳທີ່ມີສີສັນພິເສດໃຫ້ດີກວ່າເກົ່າ.”

ໃນເວລາລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ນະຄອນຈາວຈ່ວງ ແຂວງຊ່ານຕົ່ງ, ທ່ານສີຈິ້ນຜິງໄດ້ໃຫ້ຄຳຊີ້ນຳວ່າ: “ຕ້ອງສ້າງຍີ່ຫໍ້ຊື່ດັງ, ຍົກສູງຄຸນນະພາບ, ຕໍ່ຍອດຕ່ອງໂສ້ອຸດສາຫະກຳ, ເພີ່ມທະວີກຳລັງແຂ່ງຂັນ ຂອງອຸດສາຫະກຳໃນຕະຫຼາດ ແລະ ເສີມສ້າງປະສິດທິຜົນສັງລວມ ເພື່ອນຳພາ ຊາວບ້ານຫຼາຍກວ່າເກົ່າສ້າງຄວາມຮັ່ງມີຮ່ວມກັນ. ”

ໃນເວລາເຄື່ອນໄຫວຢ້ຽມຢາມແລະເກັບກຳຂໍ້ມູນຢູ່ສວນປູກໝາກໂປ້ມຂອງນະຄອນທຽນສຸຍແຂວງກ່ານຊູ້, ເພິ່ນໄດ້ເນັ້ນໜັກວ່າ: “ການພັດທະນາຊົນນະບົດໃຫ້ຈະເລີນແມ່ນຕ້ອງອາໄສອຸດສາຫະກຳ, ທ້ອງຖິ່ນຕ່າງໆຕ້ອງເສີມຂະຫຍາຍທ່າແຮງຂອງໃຜລາວ, ກ້າວເດີນຕາມເສັ້ນທາງພັດທະນາໃຫ້ຈະເລີນທີ່ສອດຄ່ອງກັບສະພາບຕົວຈິງຂອງທ້ອງຖິ່ນຕົນ.”

ການລົງເຄື່ອນໄຫວຢ້ຽມຢາມທ້ອງຖິ່ນຕ່າງໆດ້ວຍຄວາມຫ່ວງໃຍ,ບໍ່ວ່າຈະເປັນຟາມປະມົງ, ສວນປູກໝາກລິ່ນຈີ່, ສວນປູກໝາກພິລາ ຫຼື ສວນປູກໝາກໂປ້ມ ແລະອື່ນໆ, ທ່ານສີຈິ້ນຜິງລ້ວນແຕ່ໄດ້ຝາກຄວາມຫວັງເປັນຢ່າງຍິ່ງໄວ້ກັບປະຊາຊົນທ້ອງຖິ່ນວ່າ: “ເຮັດໃຫ້ປະຊາຊົນມີຊີວິດການເປັນຢູ່ທີ່ດີ.”

ໃນທ້າຍລະດູໃບໄມ້ຫຼົ່ນເມື່ອ10ປີກ່ອນ, ທ່ານສີຈິ້ນຜິງໄດ້ລົງເຄື່ອນໄຫວຢ້ຽມຢາມແລະເຮັດວຽກຢູ່ແຂວງຟູຈ້ຽນໂດຍເນັ້ນໜັກວ່າ: “ການສ້າງສັງຄົມອີ່ມໜຳສຳລານໃຫ້ສຳເລັດຜົນຢ່າງຮອບດ້ານແມ່ນບໍ່ໃຫ້ປ່ອຍປະເຂດຊົນນະບົດ.”

ແຂວງຟູຈ້ຽນແມ່ນອຸດົມສົມບູນໄປດ້ວຍຊັບພະຍາກອນທີ່ມີຄວາມຫຼາກຫຼາຍດ້ານກະສິກຳ ແລະ ມີເອກະລັກພົ້ນເດັ່ນດ້ານກະສິກຳຫຼາກຫຼາຍຮູບແບບ. ໃນການເຄື່ອນໄຫວຢ້ຽມຢາມແຂວງຟູຈ້ຽນຄັ້ງນັ້ນ, ທ່ານສີຈິ້ນຜິງໄດ້ມີຂໍ້ຮຽກຮ້ອງວ່າ: “ປິ່ນອ້ອມການສ້າງກະສິກຳທັນສະໄໝທີ່ມີເອກະລັກພິເສດ, ພະຍາຍາມສູ້ຊົນຂຸດຄົ້ນທ່າແຮງໃໝ່ເພື່ອຍົກສູງຂີດຄວາມສາມາດດ້ານການຜະລິດທັນຍາຫານ, ບຸກເບີກຊ່ອງທາງໃໝ່ໃນການປັບປຸງໂຄງປະກອບກະສິກຳໃຫ້ດີຂຶ້ນ, ສະແຫວງຫາ ການບຸກທະລຸໃໝ່ໃນການຫັນປ່ຽນຮູບແບບການພັດທະນາກະສິກຳ, ເພື່ອສ້າງຜົນງານໃໝ່ໃນການຊຸກຍູ້ໃຫ້ຊາວກະສິກອນສ້າງລາຍໄດ້ເພີ່ມຂຶ້ນ, ຢວ່າງບາດກ້າວໃໝ່ໃນການສ້າງຊົນນະບົດໃໝ່.”

ປີ2021, ໃນເວລາທີ່ບັ້ນລຶບລ້າງຄວາມທຸກຍາກໄດ້ຮັບໄຊຊະນະຢ່າງຮອບດ້ານນັ້ນ, ທ່ານສີຈິ້ນຜິງໄດ້ເດີນທາງໄປເຄື່ອນໄຫວຢ້ຽມຢາມແລະເຮັດວຽກຢູ່ແຂວງຟູຈ້ຽນໂດຍຊີ້ໃຫ້ເຫັນວ່າ: “ຕ້ອງເລັ່ງຊຸກຍູ້ການພັດທະນາຊົນນະບົດໃຫ້ຈະເລີນ, ອີງໃສ່ຄວາມຫຼາກຫຼາຍດ້ານຊັບພະຍາກອນກະສິກຳແລະທ່າແຮງດ້ານດິນຟ້າອາກາດທີ່ເອື້ອອຳນວຍ, ບົ່ມເພາະອຸດສາຫະກຳທີ່ມີທ່າແຮງແລະມີເອກະລັກພິເສດ.”

ພາຍຫຼັງຫຼຸດພົ້ນອອກຈາກຄວາມທຸກຍາກແລ້ວ, ເຂດຊົນນະບົດອັນກວ້າງໃຫຍ່ໄພສານຂອງຈີນໄດ້ເປີດຂະບວນການໃໝ່ແຫ່ງການພັດທະນາຊົນນະບົດໃຫ້ຈະເລີນຢ່າງຮອບດ້ານ. ຂໍຍົກເອົາບ້ານອ້າວຈຽວແຂວງຟູຈ້ຽນມາເປັນຕົວຢ່າງ: ປັດຈຸບັນ, ທົ່ວບ້ານອ້າວຈຽວມີເຮືອຫາປາທີ່ສ້າງດ້ວຍເຫຼັກມີແຮງມ້າສູງຈຳນວນ 88 ລຳ, ວິສາຫະກິດປຸງແຕ່ງສິນໃນນ້ຳມີ38ແຫ່ງ, ຮ້ານຂາຍອາຫານທະເລທາງອິນເຕີເນັດ117ແຫ່ງ, ໂຮມສະເຕ41ແຫ່ງ. ລາຍໄດ້ລວມໝູ່ຂອງບ້ານໃນປີ 2023ບັນລຸເຖິງ1.73ລ້ານຢວນ, ລາຍໄດ້ຂອງຊາວກະສິກອນທີ່ສາມາດຈັບຈ່າຍໄດ້ສະເລ່ຍຕໍ່ຫົວຄົນ ບັນລຸເຖິງ 58,000 ຢວນ. ບ້ານປະມົງນ້ອຍໆແຫ່ງນີ້ທີ່ຫຼ້າຫຼັງໃນເມື່ອກ່ອນໄດ້ກັບກາຍມາເປັນ “ບ້ານປະມົງທີ່ສວຍງາມທີ່ສຸດໃນທົ່ວປະເທດ” ແລະ “ບ້ານທ່ອງທ່ຽວຫຼຽນຄຳແຂວງຟູຈ້ຽນ”ໃນທຸກມື້ນີ້. ວິວັດທະນາການຂອງບ້ານອ້າວຈຽວເປັນພາບຫຍໍ້ອັນໜຶ່ງທີ່ສ່ອງແສງໃຫ້ເຫັນເຖິງການປ່ຽນແປງຢ່າງໃຫຍ່ຫຼວງຂອງເຂດຊົນນະບົດອັນກວ້າງໃຫຍ່ໄພສານຂອງຈີນຢ່າງມີຊີວິດຊີວາ.

ທ່ານສີຈິ້ນຜິງເຄີຍຊີ້ອອກວ່າ: “ມີພຽງແຕ່ພັດທະນາກະສິກຳແລະຊົນນະບົດໃຫ້ດີແລ້ວເທົ່ານັ້ນ,ຊາວກະສິກອນທັງຫຼາຍຈຶ່ງຢູ່ເຢັນເປັນສຸກ, ເຂົາເຈົ້າຈຶ່ງຈະໄດ້ຮັບຜົນປະໂຫຍດ, ຮູ້ສຶກມີຄວາມສຸກແລະປອດໄພຢ່າງພຽງພໍ. ” ນີ້ຄືຈຸດເລີ່ມຕົ້ນແລະຈຸດໝາຍຂອງຍຸດທະຍາດການພັດທະນາຊົນນະບົດໃຫ້ຈະເລີນຢ່າງຮອບດ້ານ.

ທ່ານສີຈິ້ນຜິງຍັງມີທັດສະນະວ່າ: “ການຊຸກຍູ້ຄວາມທັນສະໄໝແບບຈີນ, ຕ້ອງຍຶດໝັ້ນຮັດແໜ້ນພື້ນຖານກະສິກຳຢ່າງບໍ່ລົດລະ, ຊຸກຍູ້ການພັດທະນາຊົນນະບົດໃຫ້ຈະເລີນຢ່າງຮອບດ້ານ.” ສິ່ງນີ້ໄດ້ສະແດງໃຫ້ເຫັນເຖິງທ່ານສີຈິ້ນຜິງໃຫ້ຄວາມສຳຄັນທີ່ສຸດຕໍ່ວຽກງານການພັດທະນາຊົນນະບົດໃຫ້ຈະເລີນຢ່າງຮອບດ້ານ.

ຈາກບັ້ນລຶບລ້າງຄວາມທຸກຍາກ ຮອດ ການພັດທະນາຊົນນະບົດໃຫ້ຈະເລີນຢ່າງຮອບດ້ານ, ທ່ານສີຈິ້ນຜິງໄດ້ມີວິໄສທັດອັນດີງາມຕໍ່ກັບຄວາມທັນສະໄໝແບບຈີນດັ່ງທີ່ເພິ່ນໄດ້ເວົ້າກັບຊາວບ້ານໃນການຢ້ຽມຢາມບ້ານອ້າວຈຽວແຂວງຟູຈ້ຽນໃນເມື່ອບໍ່ດົນມານີ້ວ່າ: “ບົນຂະບວນການໃໝ່ໃນຍຸກໃໝ່ ເຂດຊົນນະບົດຈະມີອະນາຄົດທີ່ສົດໃສກວ່າເກົ່າແນ່ນອນ, ຊາວກະສິກອນຈະມີຊີວິດການເປັນຢູ່ທີ່ຈະເລີນງອກງາມກວ່າເກົ່າ. ຂໍອວຍພອນໃຫ້ຊີວິດການເປັນຢູ່ຂອງພວກສະຫາຍຈົ່ງນັບມື້ນັບດີຂຶ້ນ.”