ຮ່ອມຫົກສອກເມືອງທົງເສິງ

ເມືອງທົງເສິງແຂວງອ່ານຮຸ່ຍ ມີຊື່ສຽງຍ້ອນເປັນ “ເມືອງວັດທະນະທຳ”. ຢູ່ ເຂດສິວິໄລຂອງເທດສະບານເມືອງແຫ່ງນີ້ມີທາງຮ່ອມຍາວຮ້ອຍແມັດກວ້າງສອງແມັດເສັ້ນໜຶ່ງ,ເຮືອນແບບເກົ່າຕັ້ງຢູ່ສອງຟາກຮ່ອມທາງແມ່ນກໍ່ດ້ວຍດິນຈີ່ຂຽວ ແລະ ມຸງດ້ວຍດິນຂໍຂຽວດຳ, ຍັງມີຕົ້ນໄມ້ເກົ່າແກ່ສູງສຽດຟ້າ, ທາງຮ່ອມເສັ້ນນີ້ມີຊື່ວ່າ “ຮ່ອມຫົກສອກ”.

ຕອນບ່າຍວັນທີ 17 ຕຸລາ2024, ທ່ານສີຈິ້ນຜິງ ປະທານປະເທດຈີນໄດ້ເດີນທາງໄປເຄື່ອນໄຫວຢ້ຽມຢາມແລະເຮັດວຽກຢູ່ຮ່ອມຫົກສອກເມືອງທົງເສິງ ເພື່ອເກັບກຳຂໍ້ມູນດ້ານຕ່າງໆຂອງທ້ອງຖິ່ນແຫ່ງນີ້ເຊັ່ນ: ການສືບທອດ ແລະ ເສີມຂະຫຍາຍວັດທະນະທຳອັນເປັນມູນເຊື້ອທີ່ດີງາມຂອງຈີນ, ການເພີ່ມທະວີການສ້າງຄວາມສິວິໄລດ້ານຈິດໃຈ ແລະອື່ນໆ.

ຮ່ອມນ້ອຍແຫ່ງນີ້ມີເລື່ອງເລົ່າຂານກ່ຽວກັບ “ການໃຫ້ກຽດກັນ” ເຊິ່ງສ່ອງແສງໃຫ້ເຫັນເຖິງວັດທະນະທຳປະຫວັດສາດອັນດົນນານໄດ້ເຊື່ອມສານສະຕິປັນຍາຈີນຄືແນວໃດ? ຕໍ່ໄປແມ່ນລາຍລະອຽດ.

ຫຍັບດິນໃຫ້ເຂົາຈັກສາມສອກຊິເປັນຫຍັງ?

ກ້ອນຫີນທີ່ຂວັດໃສ່ບົດກອນຂອງທ່ານຈ່າງຢີ່ງຢູ່ປາກຮ່ອມຫົກສອກຂອງເມືອງທົງເສີງ

“ສົ່ງຈົດໝາຍໄກພັນລີ້ພຽງເພື່ອເລື່ອງການສ້າງກຳແພງເທົ່ານັ້ນ, ຫຍັບດິນໃຫ້ເຂົາຈັກສາມສອກຊິເປັນຫຍັງ? ກຳແພງເມືອງຈີນຍັງຄົງຕົວຢູ່ຈົນເຖິງປະຈຸບັນນີ້, ແຕ່ບໍ່ມີຈິນຊີຮ້ອງເຕ້ໃນສະໄໝກ່ອນແລ້ວ”. ນີ້ເປັນກາບກອນບົດໜຶ່ງທີ່ມີເຄົ້າເດີມມາຈາກ ຮ່ອມຫົກສອກ ເຊິ່ງໄດ້ຮັບການສືບທອດແລະຍ້ອງຍໍສັນລະເສີນມາເປັນເວລາຫຼາຍຮ້ອຍປີ.

ອີງຕາມຂໍ້ມູນປະຫວັດສາດໃຫ້ຮູ້ວ່າ: ໃນສະໄໝເຈົ້າຊີວິດຄ່າງຊີລາຊະວົງຊິ່ງທີ່ຫ່າງຈາກປັດຈຸບັນ360ກວ່າປີ, ທ່ານຈ່າງຢີ່ງເປັນເສນາອາມາດໃນລາຊະສຳນັກ, ບ້ານເກີດຂອງເພິ່ນຢູ່ເມືອງທົງເສີງ, ລະຫວ່າງເຮືອນຂອງເພິ່ນຢູ່ບ້ານເກີດ ແລະເຮືອນຂອງຄົນຂ້າງເຮືອນນາມສະກຸນອູມີທາງຮ່ອມເສັ້ນໜຶ່ງເພື່ອໃຫ້ສອງຄອບຄົວນຳໃຊ້ຮ່ວມກັນ. ຕໍ່ມາຄົນຂ້າງເຮືອນຈະປຸກສ້າງເຮືອນໃໝ່,ຈຶ່ງຢາກຍຶດໃຊ້ທາງຮ່ອມເສັ້ນນີ້ພຽງແຕ່ຝ່າຍດຽວ, ແຕ່ຄອບຄົວຂອງທ່ານຈ່າງຢິ່ງບໍ່ເຫັນດີນຳ. ສອງຝ່າຍຈຶ່ງຜິດຖຽງກັນຈົນບໍ່ສາມາດຕົກລົງກັນໄດ້, ສະນັ້ນ, ຄອບຄົວຂອງທ່ານຈ່າງຢິ່ງຈຶ່ງໄດ້ຂຽນຈົດໝາຍສົ່ງໄປບອກທ່ານຈ່າງຢິ່ງຢ່າງຮີບດ່ວນ, ໂດຍຮຽກຮ້ອງໃຫ້ເພິ່ນມາແກ້ໄຂບັນຫານີ້. ເມື່ອທ່ານຈ່າງຢິ່ງໄດ້ອ່ານຈົດໝາຍແລ້ວຈຶ່ງຕອບຄືນຈົດໝາຍຄອບຄົວຂອງເພິ່ນດ້ວຍກາບກອນບົດດັ່ງກ່າວ, ເຖິງຈະເປັນບົດກອນສັ້ນໆແຕ່ຊ້ຳພັດມີຄວາມໝາຍອັນເລິກເຊິ່ງ.ເມື່ອຄອບຄົວຂອງທ່ານຈ່າງຢິ່ງໄດ້ອ່ານແລ້ວກໍເຂົ້າໃຈເນື້ອໃນຄວາມໝາຍຂອງເພິ່ນທັນທີ, ຈຶ່ງໄດ້ເປັນເຈົ້າການຫຍັບດິນ ທາງຮ່ອມໃຫ້ກວ້າງອອກສາມສອກ. ເມື່ອຄົນຂ້າງເຮືອນນາມສະກຸນອູເຫັນແບບນັ້ນຈຶ່ງຮູ້ສຶກຕື້ນຕັນໃຈຫຼາຍ, ເລີຍຍອມຖອຍຫຼັງຄືນຫຍັບດິນທາງຮ່ອມໃຫ້ກວ້າງອອກສາມສອກຢ່າງເປັນເຈົ້າການເຊັ່ນດຽວກັນ, ໃນທີ່ສຸດສອງຝ່າຍຈຶ່ງໄດ້ຈົ່ງທາງຮ່ອມກວ້າງຫົກສອກ, ຈາກນັ້ນທາງຮ່ອມເສັ້ນນີ້ຈຶ່ງໄດ້ຊື່ວ່າ ຮ່ອມຫົກສອກ ແລະປະຊາຊົນໄດ້ເລົ່າຂານກັນມາວ່າເປັນເລື່ອງລາວທີ່ດີ.

ຮ່ອມຫົກສອກເມືອງທົງເສິງ

ຮ່ອມແຄບພຽງຫົກສອກ ແຕ່ປະຊາຊົນສອງຟາກຮ່ອມຊ້ຳພັດໃຈກວ້າງເປັນມິດຕໍ່ກັນ, ທາງຮ່ອມສັ້ນພຽງຮ້ອຍແມັດ ແຕ່ມີປະຫວັດຄວາມເປັນມາເປັນເວລາດົນນານ.

ທຸກມື້ນີ້ຢູ່ຕາມຖະໜົນຫົນທາງນ້ອຍໃຫຍ່ຢູ່ເມືອງທົງເສີງ, ບ່ອນໃດກໍຈະເຫັນໄດ້ເຖິງເອກະລັກຂອງ “ຮ່ອມຫົກສອກ” ເຊັ່ນ: ຢູ່ຂ້າງຖະໜົນແມ່ນມີປ້າຍຄຳຂວັນວ່າ “ໃຊ້ຖະໜົນໂດຍບໍ່ໃຫ້ກຽດກັນຈະສັນຈອນບໍ່ໄດ້, ໃຫ້ກຽດກັນຈະເປັນການດີຄືຮ່ອມຫົກສອກ”, ຕາມຝາເຮືອນຢູ່ແຄມຖະໜົນຈະມີຮູບແຕ້ມກາຕູນກ່ຽວກັບ “ຮ່ອມຫົກສອກ”, ໃນປຶ້ມແບບຮຽນຂອງເດັກນ້ອຍທັງຫຼາຍແມ່ນມີເລື່ອງລາວກ່ຽວກັບ“ຮ່ອມຫົກສອກ” ແລະອື່ນໆ.

ແນວຄິດ“ຄວາມຄ່ຽມຄົມຖ່ອມຕົວ,ຜ່ອນຜັນໃຫ້ກຽດ” ແລະ “ຄວາມກົມກຽວເປັນສິ່ງລໍ້າຄ່າ” ທີ່ແຝງຊ້ອນຢູ່ໃນຈິດໃຈ “ຮ່ອມຫົກສອກ” ໄດ້ຮັບການສືບທອດຕໍ່ກັນມາຈາກຮຸ່ນສູ່ຮຸ່ນຈົນມາເຖິງປັດຈຸບັນແມ່ນໄດ້ບຳລຸງຈິດໃຈຂອງປະຊາຊົນຈີນ.

ແນວຄິດ“ການຜ່ອນຜັນໃຫ້ກຽດ” ກັບ “ຄວາມກົມກຽວ”ໃນຈິດໃຈ“ຮ່ອມຫົກສອກ”

ຫໍວາງສະແດງບົດຮຽນເຟີ່ງສຽວຢູ່ແຂວງເຈີ້ຈ່ຽງ

ໃນເວລາຢ້ຽມຊົມຮ່ອມຫົກສອກ, ທ່ານສີຈິ້ນຜິງກ່າວວ່າ: “ທຸກສິ່ງຢ່າງກ່ຽວກັບຊີວິດເປັນການຢູ່ຂອງປະຊາຊົນລ້ວນແຕ່ເປັນສິ່ງສຳຄັນໝົດ, ເມື່ອແກ້ໄຂບັນຫາທີ່ຕິດພັນກັບຊີວິດການເປັນຢູ່ຂອງປະຊາຊົນໃຫ້ດີແລ້ວ,ຂໍ້ຂັດແຍ້ງໃນສັງຄົມຈຶ່ງຈະໜ້ອຍລົງ, ສັງຄົມຈຶ່ງຈະກົມກຽວ. ຮ່ອມຫົກສອກໄດ້ສ່ອງແສງໃຫ້ເຫັນເຖິງສະຕິປັນຍາທາງປະຫວັດສາດຂອງບັນພະບຸລຸດໃນການແກ້ໄຂຂໍ້ຂັດແຍ້ງ, ຕ້ອງຖືເປັນສະຖານທີ່ສຶກສາອົບຮົມເພື່ອເຊີດຊູວັດທະນະທຳທີ່ມີມູນເຊື້ອອັນດີງາມຂອງປະຊາຊາດຈີນ,ເສີມຂະຫຍາຍບົດບາດດ້ານຄຸນສົມບັດທີ່ດີງາມຂອງປະຊາຊາດຈີນທີ່ຖືສຳຄັນການຜ່ອນຜັນໃຫ້ກຽດ ແລະ ຖືເອົາຄວາມກົມກຽວເປັນສິ່ງລໍ້າຄ່ານັ້ນໃຫ້ເກີດປະສິດທິຜົນທີ່ດີ ເພື່ອສ້າງສະພາບແວດລ້ອມສັງຄົມທີ່ກົມກຽວ ແລະ ປະຊາຊົນຢູ່ເຢັນເປັນສຸກ”

ທ່ານຈ່າງຢູນ ຫຼານຮຸ່ນທີ12ຂອງທ່ານຈ່າງຢິ່ງ ແມ່ນກຳເນີດແລະເຕີບໃຫຍ່ ຢູ່ແຄມຮ່ອມຫົກສອກ. ປັດຈຸບັນ, ລາວເປັນເລຂາໜ່ວຍພັກເຂດຊຸມຊົນຮ່ອມຫົກສອກ. ຕະຫຼອດໄລຍະການເຮັດວຽກເຂດຊຸມຊົນມາເປັນເວລາ20ກວ່າປີ, ລາວໄດ້ນຳໃຊ້ເລື່ອງລາວບູຮານກ່ຽວກັບຮ່ອມຫົກສອກມາສຶກສາອົບຮົມຄົນຢູ່ເລື້ອຍໆ, ສະຕິປັນຍາແຫ່ງການຄົບຄ້າສະມາຄົມຂອງບັນພະບຸລຸດໄດ້ຊ່ວຍໃຫ້ລາວແກ້ໄຂຂໍ້ຂັດແຍ້ງລະຫວ່າງປະຊາຊົນຢູ່ເຂດຊຸມຊົນກໍຄືລະຫວ່າງຄົນຂ້າງເຮືອນໄດ້ເປັນຈຳນວນຫຼວງຫຼາຍ.

ທ່ານສີຈິ້ນຜິງເຄີຍຊີ້ອອກວ່າ: “ຕໍ່ກັບເນື້ອໃນວັດທະນະທຳທີ່ມີມູນເຊື້ອອັນດີງາມທີ່ເໝາະສຳລັບການປັບປຸງການພົວພັນສັງຄົມ ແລະ ສົ່ງເສີມໃຫ້ຜູ້ຄົນກ້າວ ໄປສູ່ສິ່ງທີ່ດີງາມແລະສູງສົ່ງນັ້ນ, ພວກເຮົາຕ້ອງສົມທົບກັບເງື່ອນໄຂຂອງຍຸກສະໄໝເພື່ອສືບທອດ ແລະ ເສີມຂະຫຍາຍໃຫ້ມີເນື້ອໃນອັນໃໝ່.”

ສານປະຊາຊົນເມືອງທົງເສີງໄດ້ຖືເອົາຈິດໃຈ “ຮ່ອມຫົກສອກ” ໝູນໃຊ້ເຂົ້າໃນການໄກ່ເກ່ຍຂໍ້ຂັດແຍ້ງໂດຍໃຊ້ຫຼັກການ “ຫົກບາດກ້າວ”ຄື: ຮັບຟັງຄວາມຮຽກຮ້ອງຕ້ອງການ, ຈຳແນກອັນໃດຜິດອັນໃດຖືກ, ໄກ່ເກ່ຍ, ຢືມໃຊ້ປັດຊະຍາຊາບູຮານເພື່ອສຶກສາອົບຮົບ, ຜ່ອນຜັນໃຫ້ກຽດກັນ ແລະ ບັນລຸຄວາມປອງດອງກັນ. ຈາກນີ້ຈຶ່ງໄດ້ກາຍເປັນວິທີການໄກ່ເກ່ຍແບບຮ່ອມຫົກສອກ, ໃນນັ້ນ, ສິ່ງທີ່ເຂົ້າເຖິງຈິດໃຈຂອງປະຊາຊົນຢ່າງເລິກເຊິ່ງທີ່ສຸດແມ່ນຄຳວ່າ “ຜ່ອນຜັນໃຫ້ກຽດກັນ” ແລະ “ບັນລຸຄວາມປອງດອງກັນ.” ທີ່ນີ້, “ຜ່ອນຜັນໃຫ້ກຽດກັນ” ເປັນວິທີການ ຂະນະທີ່ “ບັນລຸຄວາມປອງດອງກັນ.” ແມ່ນເປົ້າໝາຍ.

ໃນຊຸມປີຜ່ານມານີ້, ເມືອງທົງເສີງໄດ້ຖືເອົາຈິດໃຈ“ຮ່ອມຫົກສອກ”ເຊື່ອມໂຍງເຂົ້າໃນບັນດາຂົງເຂດວຽກງານການຄຸ້ມຄອງຂັ້ນຮາກຖານ, ເຊື່ອມຊຶມແລະຖອດຖອນ “ບົດຮຽນເຟີ່ງສຽວ” ຢ່າງເຕັມສ່ວນ, ປະດິດສ້າງໃຫ້ເປັນ “ວີທີການເຮັດວຽກຮ່ອມຫົກສອກໃນຍຸກໃໝ່” ເຊິ່ງໄດ້ບັນລຸເປົ້າໝາຍການຫັນປ່ຽນແລະຍົກລະດັບຈາກການແກ້ໄຂຂໍ້ຂັດແຍ້ງຢ່າງມີປະສິດທິຜົນຮອດການດຳເນີນການຄຸ້ມຄອງຂັ້ນຮາກຖານຢ່າງມີປະສິດທິຜົນ.

ໃນກອງປະຊຸມສະພາປະຊາຊົນແຫ່ງຊາດຈີນ ແລະ ກອງປະຊຸມສະພາເປິກສາການເມືອງປະຊາຊົນແຫ່ງຊາດຈີນຫຼືກອງປະຊຸມສອງສະພາປະຈຳ ປີ2023, ວິທີການໄກ່ເກ່ຍທີ່ຕັ້ງຊື່ດ້ວຍ “ຮ່ອມຫົກສອກ” ໄດ້ປາກົດຂຶ້ນໃນບົດລາຍງານວຽກງານສານປະຊາຊົນສູງສຸດ.

ເດືອນພະຈິກປີ2023, “ວີທີການເຮັດວຽກຮ່ອມຫົກສອກໃນຍຸກໃໝ່”ໄດ້ຖືກປະກາດເປັນຕົວແບບຄວາມກ້າວໜ້າດ້ານ “ບົດຮຽນເຟີ່ງສຽວ”ໃນຍຸກໃໝ່ຂອງທົ່ວປະເທດຈີນ ແລະໄດ້ນຳໄປວາງສະແດງຢູ່ຫໍວາງສະແດງບົດຮຽນເຟີ່ງສຽວ.

ຍຶດໝັ້ນ ແລະ ພັດທະນາ “ບົດຮຽນເຟີ່ງສຽວ”ໃນຍຸກໃໝ່ໃຫ້ດີ

ຕົ້ນຊຸມປີ1960, ພະນັກງານແລະປະຊາຊົນຕາແສງເຟີ່ງສຽວເມືອງຈູ່ຈີ້ແຂວງເຈີ້ຈ່ຽງໄດ້ປະດິດສ້າງ “ບົດຮຽນເຟີ່ງສຽວ”ກ່ຽວກັບການອີງໃສ່ມະຫາຊົນແກ້ໄຂຂໍ້ຂັດແຍ້ງກັບທີ່, ເພື່ອພະຍາຍາມສູ້ຊົນເຮັດໃຫ້ໄດ້ເຖິງຂັ້ນ “ເລື່ອງນ້ອຍໃຫ້ແກ້ໄຂຢູ່ພາຍໃນບ້ານ,ເລື່ອງໃຫຍ່ໃຫ້ແກ້ໄຂຢູ່ພາຍໃນຕາແສງ, ບໍ່ຖິ້ມຂໍ້ຂັດແຍ້ງໄປເດືອດຮ້ອນຂັ້ນເທິງ.”

ການບໍລິຫານປະເທດໃຫ້ມີຄວາມສະຫງົບ, ສິ່ງສຳຄັນແມ່ນຢູ່ນຳຂັ້ນຮາກຖານ. ທ່ານສີຈິ້ນຜິງເຄີຍຊີ້ໃຫ້ເຫັນຢ່າງເລິກເຊິ່ງວ່າ: “ປະເທດພວກເຮົາມີປະຊາກອນຈຳນວນ 1,4 ຕື້ຄົນ, ຖ້າວ່າບໍ່ວ່າເລື່ອງນ້ອຍຫຼືເລື່ອງໃຫຍ່ຕ່າງກໍໄປຮ້ອງຟ້ອງ,ມັນຍ່ອມຈະເປັນພາລະອັນໜັກໜ່ວງເກີນໄປ, ຕ້ອງຍຶດໝັ້ນແລະພັດທະນາ ‘ບົດຮຽນເຟີ່ງສຽວ’ໃນຍຸກໃໝ່”.

   ເດືອນກັນຍາປີ2023, ທ່ານສີຈິິ້ນຜິງໄດ້ເດີນທາງໄປຢ້ຽມຊົມຫໍວາງສະແດງບົດຮຽນເຟີ່ງສຽວເພື່ອທົບທວນຄືນຂະບວນວິວັດແຫ່ງການກຳເນີດແລະການຂະຫຍາຍຕົວຂອງ “ບົດຮຽນເຟີ່ງສຽວ”, ເພິ່ນໄດ້ເນັ້ນໜັກອີກຄັ້ງໜຶ່ງວ່າ: “ຕ້ອງປະຕິບັດ ແນວທາງມະຫາຊົນ, ອີງໃສ່ປະຊາຊົນຢ່າງແໜ້ນແຟ້ນ, ແກ້ໄຂບັນຫາໃຫ້ຕົກຢູ່ຂັ້ນຮາກຖານ, ແກ້ໄຂໃຫ້ຕົກໃນໄລຍະທີ່ເປັນໜໍ່ແໜງ.”

  ນອກຈາກ “ວີທີການເຮັດວຽກຮ່ອມຫົກສອກໃນຍຸກໃໝ່”ຂອງເມືອງທົງເສິງແຂວງອ່ານຮຸ່ຍແລ້ວ, ແຫ່ງຕ່າງໆໃນທົ່ວປະເທດຍັງມີວິທີແກ້ໄຂຂໍ້ຂັດແຍ້ງຢ່າງມີປະສິດທິຜົນເປັນຕົ້ນແມ່ນ:ວິທີການເຮັດວຽກ “ສາມສູນ”ຄື “ອຸບັດເຫດເປັນສູນ,ຄະດີເປັນສູນ,ຂໍ້ຂັດແຍ້ງເປັນສູນ”ຂອງເຂດຊຸມຊົນມູຕ່ານນະຄອນເສີນຢາງແຂວງລຽວນິງ, ວິທີການ “ກອງທຶນສິນເຊື່ອ”ເພື່ອ ແກ້ໄຂຂໍ້ຂັດແຍ້ງລະຫວ່ງເຈົ້າຂອງເຮືອນກັບບໍລິສັດຄຸ້ມຄອງຊັບສິນເຂດຊຸມຊົນຂອງເມືອງອູໂຮວນະຄອນເສິງຕູ່ ແຂວງເສສວນ ແລະອື່ນໆ. ທ້ອງຖິ່ນຕ່າງໆໄດ້ອີງໃສ່ປະຊາຊົນຢ່າງແໜ້ນແຟ້ນເພື່ອຊອກຄົ້ນແລະປະດິດສ້າງວິທີການເຮັດວຽກຄຸ້ມຄອງຂັ້ນຮາກຖານ, ໄດ້ເສີມຂະຫຍາຍ “ບົດຮຽນເຟີ່ງສຽວ”ໃນຍຸກໃໝ່ໃຫ້ອຸດົມສົມບູນຂຶ້ນຢ່າງບໍ່ຢຸດຢັ້ງ.

ເຮັດທຸກສິ່ງຢ່າງເພື່ອປະຊາຊົນ, ເຮັດທຸກສິ່ງຢ່າງໂດຍອີງໃສ່ປະຊາຊົນ. ຈາກ “ວິທີການທ້ອງຖິ່ນໃດໜຶ່ງ” ຮອດ “ນະໂຍບາຍແຫ່ງຊາດ”, ຈາກບົດຮຽນໃນພຶດຕິກຳຄຸ້ມຄອງຊົນນະບົດຮອດເຄັດລັບສຳຄັນແຫ່ງການບໍລິຫານປະເທດໃນຍຸກໃໝ່, “ບົດຮຽນເຟີ່ງສຽວ”ໃນຍຸກໃໝ່ໄດ້ແຕກດອກອອກຜົນ ແລະ ເປັ່ງລັດສະໝີໃໝ່.