ຕອນເຊົ້າວັນທີ 20 ຕຸລານີ້, ຂະບວນລົດໄຟຂົນສົ່ງສິນຄ້າສາກົນ “ປັກກິ່ງ-ຢຸນນານ-ແມ່ນ້ຳລ້ານຊ້າງ-ແມ່ນ້ຳຂອງ” ຕາມທາງລົດໄຟຈີນ-ລາວ ທີ່ບັນທຸກໝາກກ້ວຍສົດຂອງລາວງວດທຳອິດຈຳນວນ 390 ໂຕນ ໄດ້ເດີນທາງໄປຮອດສູນຈໍລະຈອນສິນຄ້າສັງລວມຈິ່ງຜິງທີ່ນະຄອນຫຼວງປັກກິ່ງຂອງຈີນ ເຊິ່ງເປັນຄັ້ງທຳອິດທີ່ປັກກິ່ງນຳເຂົ້າໝາກໄມ້ຈາກອາຊີຕາເວັນອອກສຽງໃຕ້ໂດຍຜ່ານທາງລົດໄຟຈີນ-ລາວ. ຕາມຂ່າວແຈ້ງວ່າ: ລົດໄຟຂົນສົ່ງສິນຄ້າສາກົນຂະບວນນີ້ແມ່ນເດີນທາງອອກຈາກສະຖານີວຽງຈັນໃຕ້ໃນວັນທີ 12 ຕຸລານີ້ ແລະ ເຂົ້າຊາຍແດນຈີນຜ່ານດ່ານບໍ່ຫານ. ລົດໄຟຂະບວນນີ້ນຳໃຊ້ຕູ້ແຊ່ເຢັນຂົນສົ່ງຕະຫຼອດເສັ້ນທາງ ແລະ ໄດ້ເດີນທາງຫຼາຍກວ່າ 4.000 ກິໂລແມັດຈຶ່ງມາເຖິງປັກກິ່ງ.

ຕາມຂ່າວແຈ້ງວ່າ: ດິນ ແລະ ອາກາດຂອງລາວເໝາະກັບການປູກໝາກກ້ວຍ. ໝາກກ້ວຍທີ່ປູກຢູ່ລາວຫອມ, ຫວານ ແລະ ແຊບ ທັງໄດ້ຮັບຄວາມນິຍົມຊົມຊອບຈາກຊາວນະຄອນຫຼວງປັກກິ່ງ. ໝາກກ້ວຍຈຳນວນ 15 ຕູ້ທີ່ຂົນສົ່ງມາຮອດປັກກິ່ງໃນເທື່ອນີ້ໄດ້ຖືກຍາດຊື້ໝົດຢູ່ກັບທີ່ ແລະ ຈະຈຳໜ່າຍໂດຍຜ່ານຮ້ານອິນເຕີເນັດ, ຊຸບເປີມາເກັດ ແລະ ຊ່ອງທາງອື່ນໆ. ການເປີດນຳໃຊ້ຂະບວນລົດໄຟຂົນສົ່ງສິນຄ້າສາກົນໃນຄັ້ງນີ້ ໄດ້ເຮັດໃຫ້ໝາກກ້ວຍ ແລະ ໝາກໄມ້ອື່ນໆຂອງລາວສາມາດຂົນສົ່ງໄປສູ່ຕະຫຼາດຂອງຈີນຢ່າງສະດວກ ແລະ ວ່ອງໄວ, ສ້າງຄວາມອຸດົມສົມບູນໃຫ້ແກ່ “ກະຕ່າໝາກໄມ້” ຂອງລູກຄ້າຈີນ.

ນັບແຕ່ເປີດນຳໃຊ້ໃນວັນທີ 3 ທັນວາປີ 2021 ເປັນຕົ້ນມາ, ທາງລົດໄຟຈີນ-ລາວໄດ້ກາຍເປັນຂົວເຊື່ອມຕໍ່ອັນສຳຄັນລະຫວ່າງຈີນກັບອາຊີຕາເວັນອອກສຽງໃຕ້ ເຊິ່ງໄດ້ຊຸກຍູ້ການຄ້າລະຫວ່າງຈີນກັບລາວ, ຫຼຸດຕົ້ນທຶນການຈໍລະຈອນສິນຄ້າ, ຍົກສູງປະສິດທິພາບການຂົນສົ່ງ, ຍິ່ງໄດ້ສ້າງຜົນປະໂຫຍດຕົວຈິງໃຫ້ແກ່ວິສາຫະກິດສອງປະເທດ. ໂດຍຜ່ານທາງລົດໄຟຈີນ-ລາວ, ຜະລິດຕະພັນຕ່າງໆຂອງຈີນ ເຊັ່ນ: ຜະລິດຕະພັນກົນຈັກ ແລະ ເຄື່ອງໄຟຟ້າ, ຜະລິດຕະພັນກະສິກຳ, “ຜະລິດຕະພັນໃໝ່ 3 ຢ່າງ” ເຊັ່ນ ຜະລິດຕະພັນຜະລິດໄຟຟ້າດ້ວຍພະລັງງານແສງຕາເວັນ, ລົດໃຊ້ພະລັງງານໃໝ່ ເປັນຕົ້ນ ສາມາດເຂົ້າສູ່ຕະຫຼາດອາຊີຕາເວັນອອກສຽງໃຕ້ຢ່າງສະດວກວ່ອງໄວ; ໃນຂະນະດຽວກັນ, ຢາງພາລາ, ໝາກໄມ້ ແລະ ຜະລິດຕະພັນທີ່ມີເອກະລັກພິເສດຂອງລາວ ແລະ ໄທ ກໍສາມາດຂົນສົ່ງເຂົ້າມາຈີນ ແລະ ຕະຫຼາດອັນກວ້າງໃຫຍ່ກວ່ານີ້ຢ່າງສະດວກວ່ອງໄວ.

ອີງຕາມຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ: ນັບມາຮອດເດືອນກັນຍາປີນີ້, ດ່ານພາສີຄຸນໝີງຂອງຈີນໄດ້ກວດກາສິນຄ້າຂາເຂົ້າ-ຂາອອກ ແລະ ອະນຸຍາດຜ່ານດ່ານ ໂດຍຜ່ານທາງລົດໄຟຈີນ-ລາວຈຳນວນ 10 ລ້ານໂຕນ, ມູນຄ່າສິນຄ້າບັນລຸເຖິງ 40,77 ຕື້ໂດລາ. ປະເພດສິນຄ້າຂ້າມຊາດກໍໄດ້ເພີ່ມຂຶ້ນຈາກ 10 ກວ່າຊະນິດໃນເບື້ອງຕົ້ນມາເປັນ 2.900 ກວ່າຊະນິດໃນປັດຈຸບັນ, ການແລ່ນລົດໄຟໄດ້ເພີ່ມຂຶ້ນຈາກ 2 ຂະບວນໃນເບື້ອງຕົ້ນມາເປັນ 17 ຂະບວນໃນປັດຈຸບັນ. ຂໍ້ມູນດັ່ງກ່າວຕ່າງກໍໄດ້ສ່ອງແສງໃຫ້ເຫັນເຖິງທ່ວງທ່າການພັດທະນາອັນແຂງແຮງ ແລະ ກຳລັງບົ່ມຊ້ອນອັນໃຫຍ່ຫຼວງຂອງທາງລົດໄຟຈີນ-ລາວໃນດ້ານການຂົນສົ່ງສິນຄ້າຂ້າມຊາຍແດນ ພ້ອມທັງສ່ອງແສງໃຫ້ເຫັນເຖິງກຳລັງບົ່ມຊ້ອນອັນໃຫຍ່ຫຼວງ ແລະ ອະນາຄົດອັນກວ້າງຂວາງໃນການຮ່ວມມືດ້ານເສດຖະກິດການຄ້າລະຫວ່າງຈີນກັບບັນດາປະເທດອາຊີຕາເວັນອອກສຽງໃຕ້.

ໃນຫຼາຍປີຜ່ານມາ, ການເປີດນຳໃຊ້ທາງລົດໄຟຈີນ-ລາວບໍ່ພຽງແຕ່ໄດ້ສ້າງໂອກາດ ແລະ ເວທີໃໝ່ໃຫ້ແກ່ການຮ່ວມມືດ້ານເສດຖະກິດການຄ້າລະຫວ່າງຈີນກັບລາວເທົ່ານັ້ນ, ຍັງໄດ້ສ້າງພະລັງຂັບເຄື່ອນໃໝ່ໃຫ້ແກ່ການຮ່ວມມືດ້ານເສດຖະກິດການຄ້າລະຫວ່າງຈີນກັບບັນດາປະເທດອາຊີຕາເວັນອອກສຽງໃຕ້ ກໍຄືໂລກອີກດ້ວຍ. ຄຽງຄູ່ກັບການຊຸກຍູ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໃຫ້ເຂົ້າສູ່ລວງເລິກ ແລະ ການເຊື່ອມໂຍງເຂົ້າກັນຂອງເສດຖະກິດພາກພື້ນໄດ້ພັດທະນາຢ່າງວ່ອງໄວ, ທາງລົດໄຟຈີນ-ລາວຍ່ອມຈະເສີມຂະຫຍາຍບົດບາດອັນສຳຄັນກວ່າເກົ່າໃນຂົງເຂດການຈໍລະຈອນສິນຄ້າຂ້າມຊາຍແດນ. ພວກເຮົາກໍຫວັງວ່າ ທາງລົດໄຟຈີນ-ລາວຈະມີຂະບວນລົດໄຟທີ່ມີເອກະລັກພິເສດໃຫ້ຫຼາຍກວ່າເກົ່າ ເພື່ອເຮັດໃຫ້ເສັ້ນທາງແຫ່ງໄມຕີຈິດມິຕະພາບ, ເສັ້ນທາງແຫ່ງຄວາມຮັ່ງມີ ແລະ ເສັ້ນທາງແຫ່ງຄວາມສຸກສາຍນີ້ມີຄວາມໜັກແໜ້ນ ແລະ ຄວາມກວ້າງຂວາງຫຼາຍກວ່າເກົ່າ.