ຕອນບ່າຍວັນທີ 29 ຕຸລານີ້, ທ່ານນາງເຜີງລີ້ຢວນ ພັນລະຍາຂອງທ່ານສີຈິ້ນຜິງ ປະທານປະເທດຈີນ ແລະ ທ່ານນາງຊູຊານເນ ອິນເນສ ສຕຸບ ພັນລະຍາຂອງປະທານາທິບໍດີແຟງລັງທີ່ເດີນທາງກັບທ່ານອາເລັກຊານເດີ ສຕຸບ ປະທານາທິບໍດີແຟງລັງເພື່ອຢ້ຽມຢາມຈີນທາງລັດຖະກິດຢູ່ນະຄອນຫຼວງປັກກິ່ງ ໄດ້ເຂົ້າຮ່ວມງານລ້ຽງນ້ຳຊາຢູ່ນະຄອນຫຼວງປັກກິ່ງ.

ທ່ານນາງເຜີງລີ້ຢວນກ່າວວ່າ: ຈີນແລະແຟງລັງມີມູນເຊື້ອປະຫວັດສາດຄວາມເປັນມາຢ່າງຍາວນານ ແລະ ມີວັດທະນະທຳອັນເລິກເຊິ່ງ, ປີໜ້າຈະແມ່ນປີທີ່ສອງປະເທດສ້າງສາຍຕັ້ງພົວພັນທາງການທູດຄົບຮອບ 75 ປີ, ຫວັງວ່າສອງຝ່າຍຈະເພີ່ມທະວີການແລກປ່ຽນການຮ່ວມມືໃນຂົງເຂດຕ່າງໆ ເປັນຕົ້ນສິລະປະແລະກິລານ້ຳກ້ອນແລະຫິມະ ເພື່ອເພີ່ມພູນຄູນສ້າງມິດຕະພາບຂອງປະຊາຊົນສອງຊາດຢ່າງບໍ່ຢຸດຢັ້ງ. ໃນໂອກາດນີ້, ທ່ານນາງເຜີງລີ້ຢວນຍັງໄດ້ສະແດງຄວາມຊົມເຊີຍຕໍ່ທ່ານນາງຊູຊານເນ ທີ່ໄດ້ຕັ້ງໜ້າເຄື່ອນໄຫວກິດຈະກຳສາທາລະນະປະໂຫຍດ ພ້ອມທັງແນະນຳຜົນງານແຫ່ງການພັດທະນາໃນຂົງເຂດທີ່ກ່ຽວຂ້ອງຂອງຈີນ.

ທ່ານນາງຊູຊານເນໄດ້ຂອບໃຈຢ່າງຈິງໃຈຕໍ່ທ່ານນາງເຜີງລີ້ຢວນທີ່ໄດ້ໃຫ້ການຕ້ອນຮັບຢ່າງອົບອຸ່ນ, ພ້ອມທັງຕີລາຄາສູງຕໍ່ທ່ານນາງເຜີງລີ້ຢວນ ທີ່ໄດ້ເຮັດວຽກເພື່ອຊຸກຍູ້ການພັດທະນາວຽກງານແມ່ຍິງແລະເດັກນ້ອຍຢູ່ໃນໂລກ ແລະ ກ່າວວ່າ: ຍິນດີຊຸກຍູ້ການແລກປ່ຽນຢ່າງມີໄມຕີຈິດມິດຕະພາບລະຫວ່າງແຟງລັງ-ຈີນໃນຂົງເຂດວັດທະນະທຳແລະອື່ນໆຕື່ມອີກ ເພື່ອປະກອບສ່ວນເຂົ້າໃນການລົງເລິກມິດຕະພາບລະຫວ່າງສອງປະເທດ.