ຄຽງຄູ່ກັບການມີສະຕິຕໍ່ກັບກາກບອນຕ່ຳ ແລະ ການອະນຸລັກສິ່ງແວດລ້ອມຂອງປະຊາຊົນໃນທົ່ວໂລກນັບມຶ້ນັບສູງຂຶ້ນ, ການອອກເດີນທາງແບບສີຂຽວໄດ້ກາຍເປັນທ່ວງທ່າການພັດທະນາອັນສຳຄັນໃນຂົງເຂດຄົມມະນາຄົມ; ລົດໃຊ້ພະລັງງານໄຟຟ້າທີ່ຜະລິດໂດຍຈີນໄດ້ກາຍເປັນຜະລິດຕະພັນທີ່ໄດ້ຮັບຄວາມນິຍົມຫຼາຍທີ່ສຸດໃນຕະຫຼາດຂອງລາວຢ່າງວ່ອງໄວ ຍ້ອນມີເຕັກໂນໂລຊີຂັ້ນສູງ, ຮູບຊົງທີ່ທັນສະໄໝ, ຂີ່ສະບາຍ ແລະ ການບໍລິການທີ່ດີ.

ຕອນເຊົ້າວັນທີ 28 ຕຸລານີ້, ລົດໄຟຂະບວນໜຶ່ງຕາມທາງລົດໄຟຈີນ-ລາວທີ່ບັນທຸກລົດເມໃຊ້ພະລັງງານໃໝ່ BRT ທີ່ຜະລິດໂດຍແຂວງກຸ້ຍໂຈ່ວຂອງຈີນ ໄດ້ເດີນທາງອອກຈາກນະຄອນກຸ້ຍຢາງຂອງຈີນ ແລະ ຈະເດີນທາງໄປຮອດນະຄອນຫຼວງວຽງຈັນຂອງລາວຫຼັງຈາກນັ້ນ 7 ວັນ. ລົດເມໃຊ້ພະລັງງານໃໝ່ BRT ຊຸດນີ້ຈະນຳໃຊ້ເຂົ້າໃນລະບົບລົດເມ BRT ທີ່ອັດສະລິຍະ ແລະ ທັນສະໄໝສາຍທຳອິດຂອງນະຄອນຫຼວງວຽງຈັນຂອງລາວ ເຊິ່ງຈະເປັນການສະໜັບສະໜູນຢ່າງແຂງແຮງໃຫ້ແກ່ການພັດທະນາແບບສີຂຽວ ແລະ ອັດສະລິຍະຂອງຄົມມະນາຄົມຂອງລາວ.

ຄຽງຄູ່ກັບການຮ່ວມມືລະຫວ່າງຈີນ-ລາວໄດ້ກ້າວເຂົ້າສູ່ລວງເລິກ, ວິສາຫະກິດລົດໃຊ້ພະລັງງານໄຟຟ້າຂອງຈີນໄດ້ຮ່ວມມືກັບວິສາຫະກິດຂອງລາວນັບມື້ນັບຫຼາຍຂຶ້ນ ແລະ ເຂົ້າສູ່ຕະຫຼາດຂອງລາວ. ໃນເດືອນຕຸລາປີ 2019, ບໍລິສັດ BYD ຂອງຈີນໄດ້ຮ່ວມມືກັບບໍລິສັດ MOK ຂອງລາວ ແລະ ກາຍເປັນຍີ່ຫໍ້ລົດໃຊ້ພະລັງງານໄຟຟ້າຍີ່ຫໍ້ທຳອິດຂອງຈີນທີ່ເຂົ້າສູ່ປະເທດລາວ. ໃນເດືອນຕຸລາປີ 2020, ບໍລິສັດ GEELY ຂອງຈີນໄດ້ເຊັນສັນຍາໂຄງການລົດໃຊ້ພະລັງງານໄຟຟ້າກັບບໍລິສັດລາວ ແລະ ໃນທ້າຍປີ 2023, ບໍລິສັດ Hong Qi ຂອງຈີນກໍໄດ້ເຊັນສັນຍາກັບລັດຖະບານລາວ ເພື່ອເປີດກວ້າງຕະຫຼາດລົດໃຊ້ທາງລັດຖະກິດຂອງລາວ. ການຮ່ວມມືລະຫວ່າງບໍລິສັດຈີນກັບລາວ ບໍ່ພຽງແຕ່ມີຜົນດີຕໍ່ຍີ່ຫໍ້ລົດໃຊ້ພະລັງງານໄຟຟ້າຂອງຈີນໃຫ້ເປັນທີ່ຮູ້ຈັກ ແລະ ຕອບສະໜອງຄວາມຕ້ອງການຂອງຕະຫຼາດຂອງລາວໃຫ້ດີເທົ່ານັ້ນ ຫາກຍັງສາມາດຍົກສູງຄວາມສາມາດການແຂ່ງຂັນຂອງຍີ່ຫໍ້ລົດຈີນ ໂດຍຜ່ານການດຳເນີນການຜະລິດ ແລະ ການບໍລິການຢູ່ພາຍໃນປະເທດລາວ.

ນອກນີ້, ຍີ່ຫໍ້ລົດໃຊ້ພະລັງງານໄຟຟ້າຂອງຈີນໄດ້ຈຳໜ່າຍລົດຫຼາຍລຸ້ນ ເພື່ອຕອບສະໜອງຕາມຄວາມຕ້ອງການທີ່ແຕກຕ່າງກັນຂອງຜູ້ບໍລິໂພກ. BYD ບໍ່ພຽງແຕ່ຈຳໜ່າຍ Atto3 ເທົ່ານັ້ນ ຍັງມີອີກຫຼາຍລຸ້ນຕື່ມອີກ ເຊັ່ນ: Han EV, Tang EV, ລົດເມໃຊ້ພະລັງງານໄຟຟ້າ ເປັນຕົ້ນ ໂດຍປົກຄຸມຕະຫຼາດການນຳໃຊ້ແບບທົ່ວໄປ ແລະ ການນຳໃຊ້ທາງທຸລະກິດ.

ສິ່ງທີ່ໜ້າສົນໃຈນັ້ນກໍຄື ການພັດທະນາຂອງການທ່ອງທ່ຽວກໍໄດ້ເປີດກວ້າງຕະຫຼາດໃຫ້ແກ່ລົດໃຊ້ພະລັງງານໃໝ່ ໂດຍສະເພາະແມ່ນພາຍຫຼັງທາງລົດໄຟຈີນ-ລາວເປີດບໍລິການແລ້ວ, ໄດ້ມີນັກທ່ອງທ່ຽວທັງພາຍໃນ ແລະ ຕ່າງປະເທດນັບມື້ນັບຫຼາຍຂຶ້ນເຂົ້າມາທ່ຽວປະເທດລາວ. ປັດຈຸບັນ, ແອັບທີ່ສາມາດເອີ້ນເອົາລົດຕັກຊີໂດຍຜ່ານທາງອິນເຕີເນັດຂອງລາວໄດ້ເລີ່ມໃຫ້ບໍລິການດ້ວຍລົດໃຊ້ພະລັງງານໄຟຟ້າຫຼາຍລຸ້ນແລ້ວ ເຊິ່ງລວມທັງລົດໃຊ້ພະລັງງານໄຟຟ້າຂອງຈີນ.

ສ່ວນລັດຖະບານລາວກໍໄດ້ຊຸກຍູ້ການນຳໃຊ້ລົດໃຊ້ພະລັງງານໃໝ່ເຊັ່ນກັນ. ຕາມຂ່າວລາຍງານວ່າ: ໃນ 5 ເດືອນປີນີ້, ປະລິມານການນຳເຂົ້າລົດໃຊ້ພະລັງງານໄຟຟ້າຂອງລາວໄດ້ມີຫຼາຍກວ່າປະລິມານການນຳເຂົ້າໃນໝົດປີກາຍແລ້ວ. ນອກນີ້, ລັດຖະບານລາວຍັງໄດ້ວາງເປົ້າໝາຍວ່າ ເມື່ອຮອດປີ 2030, ປະລິມານລົດໃຊ້ພະລັງງານໄຟຟ້າຂອງລາວຈະກວມເອົາຫຼາຍກວ່າ 30% ຂອງຍອດປະລິມານລົດຢູ່ພາຍໃນປະເທດລາວ, ພ້ອມທັງໄດ້ວາງນະໂຍບາຍກະຕຸ້ນຕ່າງໆ ເຊັ່ນ: ນະໂຍບາຍພິເສດດ້ານພາສີ ແລະ ອື່ນໆ. ປັດຈຸບັນ, ລາວກຳລັງສຸມກຳລັງເຂົ້າໃນການສ້າງເຄືອຂ່າຍຄົບວົງຈອນຂອງຂະແໜງການລົດໃຊ້ພະລັງງານໄຟຟ້າ, ຊຸກຍູ້ໃຫ້ນັກລົງທຶນຕ່າງປະເທດເຂົ້າສູ່ຕະຫຼາດລົດໃຊ້ພະລັງງານໄຟຟ້າຂອງລາວໃຫ້ຫຼາຍກວ່າເກົ່າ ເພື່ອຕອບສະໜອງຕາມຄວາມຕ້ອງການຂອງຕະຫຼາດລາວ.

ລົດໃຊ້ພະລັງງານໄຟຟ້າຂອງຈີນບໍ່ພຽງແຕ່ໄດ້ຕອບສະໜອງຕາມຄວາມຕ້ອງການຂອງລູກຄ້າລາວໃນການອອກເດີນທາງແບບສີຂຽວເທົ່ານັ້ນ ຍັງໄດ້ຊຸກຍູ້ການຮ່ວມມືດ້ານອຸດສາຫະກຳພະລັງງານໃໝ່ລະຫວ່າງລາວກັບຈີນໃຫ້ເຂົ້າສູ່ລວງເລິກອີກດ້ວຍ ເຊິ່ງຈະປະກອບສ່ວນຫຼາຍກວ່າເກົ່າເຂົ້າໃນການຫັນເປັນກາກບອນຕ່ຳ ແລະ ຫັນເປັນສີຂຽວຂອງລາວ ກໍຄືພາກພື້ນອາຊີຕາເວັນອອກສຽງໃຕ້.