ວັນທີ 30 ຕຸລານີ້, ສະມັດຊາໃຫຍ່ອົງການສະຫະປະຊາຊາດໄດ້ຮັບຮອງຮ່າງມະຕິກ່ຽວກັບ “ຕ້ອງຍົກເລີກການປິດລ້ອມດ້ານເສດຖະກິດ, ການຄ້າ ແລະ ການເງິນຂອງອາເຣິກາທີ່ມີຕໍ່ກູບາ” ດ້ວຍຄະແນນສຽງເຫັນດີເປັນສ່ວນໃຫຍ່, ໂດຍໄດ້ກ່າວປະນາມອາເມຣິກາທີ່ໄດ້ດໍາເນີນການປິດລ້ອມດ້ານເສດຖະກິດຕໍ່ກູບາມາເປັນເວລາຍາວນານດົນເຖິງ 32 ປີ.

   ຕາມຂ່າວແຈ້ງໃຫ້ຮູ້ວ່າ: ຜົນການລົງຄະແນນສຽງຄັ້ງນີ້, ມີ 187 ສຽງເຫັນດີ, 2 ສຽງຄັດຄ້ານ ແລະ 1 ສຽງງົດອອກສຽງ, ໃນນັ້ນ, ອາເມຣິກາ ແລະ ອິດສະຣາແອນໄດ້ລົງຄະແນນສຽງຄັດຄ້ານ. ນີ້ເປັນເທື່ອທີ 32 ທີ່ສະມັດຊາໃຫຍ່ອົງການສະຫະປະຊາຊາດຮັບຮອງມະຕິທີ່ກ່ຽວຂ້ອງລຽນຕິດ.

   ທ່ານ ໂຣດຣິເກສ ລັດຖະມົນຕີກະຊວງການຕ່າງປະເທດກູບາໄດ້ຢືນຢັນໃນມື້ດຽວກັນວ່າ: ການປິດລ້ອມຕໍ່ກູບາເປັນສົງຄາມດ້ານເສດຖະກິດ, ການເງິນ ແລະ ການຄ້າຈົນສາມາດຂ້າລ້າງເຜົ່າພັນໄດ້. ທ່ານ ໂຣດຣິເກສ ຍັງໄດ້ກ່າວປະນາມນະໂຍບາຍຂອງອາເມຣິກາທີ່ເຈຕະນາເຮັດໃຫ້ປະຊາຊົນກູບາມີຄວາມເຈັບປວດຮຸນແຮງຂຶ້ນຕື່ມອີກ ເພື່ອບັງຄັບໃຫ້ລັດຖະບານກູບາດໍາເນີນການປ່ຽນແປງ.