ຄຳວ່າ ບຣິກສ (BRICS) ແມ່ນຫຍໍ້ມາຈາກຕົວອັກສອນນຳໜ້າຊື່ພາສາອັງກິດຂອງ5ປະເທດສະມາຊິກອົງການນີ້ຄື ບຣາຊີນ ຣັດເຊຍ ອິນເດຍ ຈີນ ແລະ ອາຟຣິກກາໃຕ້. ໃນເບື້ອງຕົ້ນ, ອົງການນີ້ເອີ້ນວ່າ BRIC ຕໍ່ມາໃນປີ2011, ອາຟຣິກາໃຕ້ເຂົ້າມາເປັນສະມາຊິກຂອງອົງການນີ້, ຈາກນີ້ຈຶ່ງໄດ້ຕັ້ງຊື່ວ່າ BRICS ຢ່າງເປັນທາງການ. ປີ2009, ກອງປະຊຸມສຸດຍອດຄັ້ງທຳອິດຂອງອົງການນີ້ໄດ້ຈັດຂຶ້ນຢູ່ຣັດເຊຍ ເຊິ່ງເປັນການເປີດກົນໄກຮ່ວມມືລະຫວ່າງປະເທດສະມາຊິກບຣິກຢ່າງເປັນທາງການ. ໃນຖານະເປັນແບບຢ່າງແຫ່ງການຮ່ວມມືເພື່ອການພັດທະນາຂອງກຸ່ມເສດຖະກິດຈະເລີນໃໝ່, ກົນໄກດັ່ງກ່າວໄດ້ຕັ້ງໜ້າປະຕິບັດຕາມຈິດໃຈ “ເປີດກວ້າງ ກວມລວມ, ການຮ່ວມມື ແລະຕ່າງຝ່າຍຕ່າງໄດ້ຮັບຜົນປະໂຫຍດ” ໂດຍໄດ້ດຳເນີນການຮ່ວມມືໃນຫຼາຍສິບຂົງເຂດລວມທັງເສດຖະກິດການຄ້າ, ວິທະຍາສາດເຕັກໂນໂລຊີ, ກະສິກຳ, ວັດທະນະທຳ, ການສຶກສາເປັນຕົ້ນ, ໄດ້ກາຍເປັນກຳລັງແຮງທີ່ສ້າງສັນໃນການຊຸກຍູ້ການເຕີບໂຕດ້ານເສດຖະກິດໂລກ,ປັບປຸງການບໍລິຫານໂລກໃຫ້ສົມບູນຂຶ້ນ ແລະຊຸກຍູ້ການພົວພັນສາກົນໃຫ້ຫັນເປັນປະຊາທິປະໄຕ. ໄປຄຽງຄູ່ກັບ 5 ປະເທດຄື ອາຣັບບີຊາອຸດິດ, ເອຢິບ, ສະຫະລັດອາຣັບເອມີເຣດ, ອີຣານ ແລະ ເອທີໂອປີ ໄດ້ເຂົ້າເປັນສະມາຊິກອົງການບຣິກສຢ່າງເປັນທາງການໃນເດືອນມັງກອນປີ2024, ປະເທດສະມາຊິກ ອົງການນີ້ໄດ້ເພີ່ມຂຶ້ນເປັນ 10 ປະເທດ ແລະ ມີອີກ40ກວ່າປະເທດ ທີ່ສະແດງເຈດຈຳນົງສະໝັກເຂົ້າຮ່ວມອົງການດັ່ງກ່າວ.

ວັນທີ 23 ຕຸລາ2024, ກອງປະຊຸມສຸດຍອດບຣິກສຄັ້ງທີ 16 ໄດ້ຈັດຂຶ້ນຢູ່ນະຄອນກາຊານ ປະເທດຣັດເຊຍ. ທ່ານສີຈິ້ນຜິງ ປະທານປະເທດຈີນໄດ້ກ່າວຄຳປາໄສສຳຄັນໂດຍສົ່ງເສີມໃຫ້ຮ່ວມກັນຂຽນປະຫວັດສາດໜ້າໃໝ່ແຫ່ງການຮ່ວມມືບຣິກສທີ່ພັດທະນາຢ່າງມີຄຸນນະພາບສູງ, ສ້າງບຣິກສສີຂຽວ, ເປັນຜູ້ປະຕິບັດຕົວຈິງໃນການພັດທະນາແບບຍືນຍົງ.

ທ່ານສີຈິ້ນຜິງໄດ້ເນັ້ນໜັກວ່າ: ຈີນຍິນດີຮ່ວມກັບປະເທດສະມາຊິກບຣິກສເປີດກວ້າງການຮ່ວມມືດ້ານອຸດສາຫະກຳສີຂຽວ, ພະລັງງານສະອາດ ກໍຄືບໍ່ແຮ່ສີຂຽວ, ຊຸກຍູ້ການພັດທະນາຕ່ອງໂສ້ອຸດສາຫະກຳຄົບວົງຈອນຕາມທິດສີຂຽວ, ເພີ່ມອັດຕາສ່ວນສີຂຽວຂອງການຮ່ວມມື, ຍົກສູງຄຸນນະພາບການພັດທະນາ.

ສີຂຽວເປັນສີສັນພື້ນຖານແຫ່ງການພັດທະນາໃນຍຸກປັດຈຸບັນ. ໃນເວລາກ່າວຄຳປາໄສ, ທ່ານສີຈິ້ນຜິງໄດ້ຊີ້ແຈງຄວາມຈຳເປັນ ແລະ ຄວາມເລັ່ງດ່ວນຂອງການສ້າງບຣິສສີຂຽວ ແລະ ການຊຸກຍູ້ການພັດທະນາແບບຍືນຍົງ, ພ້ອມທັງຊີ້ໃຫ້ເຫັນວ່າ: ປະເທດສະມາຊິກບຣິກສຄວນເຊື່ອມໂຍງເຂົ້າໃນຂະບວນການອັນຍິ່ງໃຫຍ່ແຫ່ງການຫັນປ່ຽນແບບສີຂຽວແລະກາກບອນຕ່ຳຂອງໂລກ, ເຊິ່ງໄດ້ວາງແຜນອັນຈະແຈ້ງກ່ຽວກັບການຮ່ວມມືບຣິກສທີ່ພັດທະນາຢ່າງມີຄຸນນະພາບສູງ.

ໃນນີ້, ການເພີ່ມອັດຕາສ່ວນສີຂຽວຂອງການຮ່ວມມື, ກັບການຍົກສູງຄຸນນະພາບການພັດທະນາເປັນການພົວພັນທີ່ມີຄວາມເປັນເອກະພາບກັນແບບສັດຈະວິພາກ, ເຊິ່ງການພົວພັນຄູ່ນີ້ໄດ້ສ່ອງແສງໃຫ້ເຫັນເຖິງການເຄື່ອນໄຫວຂອງປະເທດສະມາຊິກບຣິກສແຫ່ງການຊຸກຍູ້ການພັດທະນາແບບສີຂຽວ ແລະ ເປົ້າໝາຍເພື່ອບັນລຸການພັດທະນາທີ່ມີຄຸນນະພາບສູງແມ່ນເພີ່ມແຮງຊຸກຍູ້ ແລະ ຕໍ່ເຕີມເສີມສ້າງໃຫ້ແກ່ກັນ.

ດ້ານໜຶ່ງ, ການເພີ່ມອັດຕາສ່ວນສີຂຽວຂອງການຮ່ວມມືເປັນສິ່ງຄ້ຳຊູທີ່ສຳຄັນຂອງການຍົກສູງຄຸນນະພາບການພັດທະນາ. ກອງປະຊຸມສຸດຍອດບຣິກສຄັ້ງນີ້ເປັນໂອກາດທີ່ດີສຳລັບການສ້າງສະພາບການໃໝ່ແຫ່ງການຮ່ວມມືບຣິກສທີ່ພັດທະນາຢ່າງມີຄຸນນະພາບສູງ, ສ່ວນການຫັນປ່ຽນຮູບການພັດທະນາເສດຖະກິດເປັນທາງເລືອກອັນຈຳເປັນເພື່ອບັນລຸການພັດທະນາທີ່ມີຄຸນນະພາບສູງ.

ດັ່ງທີ່ທ່ານສີຈິ້ນຜິງໄດ້ກ່າວວ່າ: ມີພຽງແຕ່ສ້າງພື້ນຖານການພັດທະນາແບບສີຂຽວໃຫ້ດີເທົ່ານັ້ນຈຶ່ງຈະມີການພັດທະນາຢ່າງວ່ອງໄວໃນອະນາຄົດ.

ປັດຈຸບັນ, ຂະບວນການຫັນເປັນອຸດສາຫະກຳໄດ້ທຳລາຍສິ່ງແວດລ້ອມທຳມະຊາດຂອງໜ່ວຍໂລກ ເຊິ່ງຍາກທີ່ຈະຟື້ນຟູຄືນໄດ້. ມະນຸດໃນຍຸກປັດຈຸບັນພວມປະເຊີນກັບບັນຫາການປ່ຽນແປງຂອງດິນຟ້າອາກາດເຊິ່ງເປັນໜຶ່ງໃນບັນດາໄພຂົ່ມຂູ່ໃຫຍ່ທີ່ສຸດເປັນປະຫວັດສາດ ແລະພວມຢືນຢູ່ທາງສີ່ແຍກແຫ່ງການພັດທະນາແບບຍືນຍົງ.

ອົງການບຣິກສ ໃນຖານະເປັນໜ່ວຍປະຕິບັດຕົວຈິງ ທີ່ຄວາມຮັບຮູ້ກັບການກະທຳເປັນເອກະພາບກັນນັ້ນຄວນຜ່ານຈາກການຊຸກຍູ້ການພັດທະນາຕ່ອງໂສ້ອຸດສາຫະກຳຄົບວົງຈອນຕາມທິດສີຂຽວ, ກ້າວເດີນໄປຕາມເສັ້ນທາງການພັດທະນາທີ່ນຳພາໂດຍວິທະຍາສາດເຕັກໂນໂລຊີ, ປະຢັດຊັບພະຍາກອນ ແລະ ມີຄວາມສິວິໄລດ້ານນິເວດ. ການເພີ່ມອັດຕາສ່ວນສີຂຽວຂອງການຮ່ວມມື ຈະມີຜົນດີຕໍ່ການຊຸກຍູ້ຮູບການພັດທະນາຂອງວົງຄະນາຍາດບຣິກສຫັນເປັນແບບສີຂຽວແລະກາກບອນຕ່ຳ, ສ້າງໃຫ້ເປັນຈຸດເຕີບໂຕໃໝ່ແຫ່ງການພັດທະນາເສດຖະກິດ-ສັງຄົມ, ເຊິ່ງມີຄວາມໝາຍຄວາມສຳຄັນຕໍ່ການສົ່ງເສີມການພັດທະນາແບບຍືນຍົງຂອງຕົນເອງກໍຄືຂອງໂລກ.

ອີກດ້ານໜຶ່ງ, ການຍົກສູງຄຸນນະພາບການພັດທະນາເປັນຜົນງານອັນຈຳເປັນຂອງການເພີ່ມອັດຕາສ່ວນສີຂຽວຂອງການຮ່ວມມື. ການພັດທະນາແບບສີຂຽວເປັນຮູບການພັດທະນາທີ່ໃຊ້ຊັບພະຍາກອນສີ່ງແວດລ້ອມໜ້ອຍທີ່ສຸດເພື່ອສ້າງປະສິດທິຜົນດ້ານເສດຖະກິດ-ສັງຄົມໃຫ້ໄດ້ຫຼາຍທີ່ສຸດ, ເຊິ່ງໄດ້ກາຍເປັນພະລັງແຮງອັນສຳຄັນໃນການຂັບເຄື່ອນການເຕີບໂຕຂອງເສດຖະກິດໂລກ.

ໄປຄຽງຄູ່ກັບປະເທດທີ່ມີຊັບພະຍາກອນພະລັງງານອຸດົມສົມບູນເຊັ່ນ: ອາຣັບບີຊາອຸດິດ ສະຫະລັດອາຣັບເອມີເຣດເປັນຕົ້ນເຂົ້າເປັນສະມາຊິກວົງຄະນາຍາດບຣິກສ, ປະລິມານການຜະລິດແລະປະລິມານສະສົມນ້ຳມັນເຊື້ອໄຟຂອງ10ປະເທດສະມາຊິກບຣິກສຈະກວມເອົາພະລັງງານໃນທົ່ວໂລກປະມານ40%. ການຊຸກຍູ້ພະລັງງານດັ້ງເດີມຫັນປ່ຽນຕາມທິດສີຂຽວແລະກາກບອນຕ່ຳ ຈະສາມາດເພີ່ມແຮງຂັບເຄື່ອນສີຂຽວໃຫ້ແກ່ການພັດທະນາເສດຖະກິດທີ່ມີຄຸນນະພາບສູງຂອງປະເທດສະມາຊິກບຣິກສຢ່າງບໍ່ຢຸດຢັ້ງ.

ທ່ານສີຈິ້ນຜິງໄດ້ສະເໜີອອກມາວ່າ: ຈີນຍິນດີຮ່ວມກັບປະເທດສະມາຊິກບຣິກສເປີດກວ້າງການຮ່ວມມືດ້ານອຸດສາຫະກຳສີຂຽວ, ພະລັງງານສະອາດ ກໍຄືບໍ່ແຮ່ສີຂຽວ ເຊິ່ງບໍ່ພຽງແຕ່ຈະນຳເອົາໂອກາດດ້ານການລົງທຶນສີຂຽວແລະການຄ້າສີຂຽວເປັນຈຳນວນຫຼວງຫຼາຍມາສູ່ຈີນເອງກໍຄືປະເທດສະມາຊິກອື່ນໆຂອງບຣິກສເທົ່ານັ້ນ, ຍັງຈະສ້າງໂອກາດສຳຄັນໃຫ້ແກ່ການພັດທະນາເສດຖະກິດໂລກນຳອີກ.

ເມື່ອເວົ້າຄຳໃດອອກມາກໍຕ້ອງມີຄວາມໜ້າເຊື່ອຖື ແລະ ເວົ້າແລ້ວຕ້ອງເຮັດ ໄດ້ຢ່າງແນ່ນອນ. ປະເທດສະມາຊິກບຣິກສດຳເນີນການປະສານງານບຣິກສເພື່ອຮ່ວມກັນຮັບມືກັບການປ່ຽນແປງຂອງດິນຟ້າອາກາດ, ເຊິ່ງຍ່ອມຈະສາມາດ ເພີ່ມອັດຕາສ່ວນສີຂຽວຂອງການຮ່ວມມື, ຍົກສູງຄຸນນະພາບການພັດທະນາຢ່າງບໍ່ຢຸດຢັ້ງເພື່ອເຕົ້າໂຮມກຳລັງແຮງສັງລວມແລະສ້າງຄວາມເຂັ້ມແຂງໃຫ້ແກ່ການຮ່ວມມືບຣິກສແນ່ນອນ.

ເດືອນກໍລະກົດປີ2024, ກອງປະຊຸມລັດຖະມົນຕີເສດຖະກິດການຄ້າອົງການບຣິກສຄັ້ງທີ14ໄດ້ຮັບຮອງເອົາຖະແຫຼງການວ່າດ້ວຍມາດຕະການການຄ້າກ່ຽວກັບສິ່ງແວດລ້ອມແລະດິນຟ້າອາກາດຂອງອົງການບຣິກສ, ເຊິ່ງໄດ້ສ້າງພື້ນຖານອັນສຳຄັນໃຫ້ແກ່ປະເທດສະມາຊິກບຣິກສເພື່ອເພີ່ມທະວີການເຊື່ອມຕໍ່ດ້ານມາດຕະຖານຜະລິດຕະພັນຕ່າງໆເຊັ່ນລົດພະລັງງານໃໝ່,  ແບັດເຕີຣີລີທຽມ, ແບັດເຕີຣີພະລັງງານແສງຕາເວັນເປັນຕົ້ນກໍຄືການຮ່ວມມືທີ່ກ່ຽວຂ້ອງຕື່ມອີກ.

ໃນຖານະເປັນໂຄງການສັນຍາລັກແຫ່ງການຮ່ວມມືບຣິກສທີ່ທ່ານສີຈິ້ນຜິງໄດ້ເອົາໃຈໃສ່ຢ່າງໃກ້ຊິດແລະຊຸກຍູ້ດ້ວຍຕົນເອງນັ້ນ, ທະນາຄານພັດທະນາໃໝ່ບຣິກສ ແລະ ທະນາຄານພັດທະນາຫຼາຍຝ່າຍອີກ 9 ແຫ່ງໄດ້ປະກາດໃນເດືອນກັນຍາປີ2024ວ່າ, ປີ2023ຜ່ານມາ, ທະນາຄານເຫຼົ່ານີ້ໄດ້ສະໜັບສະໜູນການລະດົມທຶນບັນລຸເຖິງ 125 ຕື້ໂດລາໃຫ້ກັບການເຄື່ອນໄຫວຮັບມືກັບການປ່ຽນແປງຂອງດິນຟ້າອາກາດໃນທົ່ວໂລກ.

ຢູ່ອາຟຣິກກາໃຕ້, ໂຄງການພະລັງງານໄຟຟ້າແສງຕາເວັນpedstoneທີ່ຮັບເໝົາກໍ່ສ້າງໂດຍວິສາຫະກິດຈີນໄດ້ເປີດນຳໃຊ້ຢ່າງຮອບດ້ານແລ້ວ, ແຕ່ລະປີຈະສະໜອງພະລັງງານໄຟຟ້າສະອາດປະມານ480ກິກກາວັດໂມງ（1ກິກກາວັດໂມງເທົ່າກັບ1000ເມກາວັດໂມງ）ໃຫ້ແກ່ຕາຂ່າຍໄຟຟ້າອາຟຣິກກາໃຕ້, ໂດຍສາມາດຕອບສະໜອງ ຄວາມຮຽກຮ້ອງຕ້ອງການຊົມໃຊ້ໄຟຟ້າຂອງປະຊາຊົນ 200.000 ກວ່າຄອບຄົວ. ໃນຂະນະທີ່ຫຼຸດຜ່ອນສະພາບຂາດແຄນໄຟຟ້າຂອງອາຟຣິກກາໃຕ້ນັ້ນ, ໂຄງການດັ່ງກ່າວຍັງໄດ້ເຮັດໃຫ້ປະເທດນີ້ຫຼຸດຜ່ອນການເພິ່ງພາອາໄສພະລັງງານຟໍຊິວເຊັ່ນ: ຖ່ານຫີນ, ນ້ຳມັນເຊື້ອໄຟເປັນຕົ້ນ. ຢູ່ບຣາຊີນ, ໂຄງການໄຟຟ້າພະລັງງານລົມກາເມເລລາທີ່ວິສາຫະກິດຈີນກໍ່ສ້າງນັ້ນໄດ້ບຸກເບີກພື້ນທີ່ສີຂຽວດ້ານພະລັງງານໝູນວຽນຢູ່ກາງທະເລຊາຍໃນຊານເມືອງ, ແຕ່ລະປີສາມາດສະໜອງພະລັງງານໄຟຟ້າສະອາດປະມານ360ລ້ານກິໂລວັດໂມງ ເທົ່າກັບໄດ້ປະຢັດຖ່ານຫີນມາດຕະຖານປະມານ129.600 ໂຕນ, ຫຼຸດການລະບາຍກາກບອນ 358.900 ໂຕນ, ເຊິ່ງໄດ້ສ້າງວຽກເຮັດງານທຳ 2000 ກວ່າຕຳແໜ່ງໃຫ້ແກ່ທ້ອງຖິ່ນດັ່ງກ່າວ.

ການເພີ່ມອັດຕາສ່ວນສີຂຽວຂອງການຮ່ວມມື, ຍົກສູງຄຸນນະພາບການພັດທະນາ ເປັນສິ່ງສຳຄັນທີ່ສ່ອງແສງໃຫ້ເຫັນເຖິງປະເທດສະມາຊິກບຣິກສກ້າວເດີນໄປຕາມທ່າອ່ຽງລວມແຫ່ງການພັດທະນາຂອງໂລກບົນພື້ນຖານທີ່ຮ່ວມກັນສະແຫວງຫາເປົ້າໝາຍດຽວກັນ.

ດັ່ງທີ່ທ່ານສີຈິ້ນຜິງໄດ້ກ່າວວ່າ: “ຂໍພຽງແຕ່ພວກເຮົາຮ່ວມແຮງຮ່ວມໃຈກັນ, ການຮ່ວມມືບຣິກສຈະສາມາດສ້າງຜົນງານອັນໃຫຍ່ຫຼວງໄດ້, ບຣິກສຈະມີອະນາຄົດທີ່ໜ້າຄອງຄອຍໄດ້.”