ວັນທີ 1 ພະຈິກນີ້, ທ່ານສີຈິ້ນຜິງ ປະທານປະເທດຈີນ ແລະທ່ານໂມຮຳມັດ ບິນ ຊາເຢັດ ອັນ ນາຣ໌ຢານ ປະທານາທິບໍດີສະຫະລັດອາຣັບເອມີເຣດໄດ້ສົ່ງສານຊົມເຊີຍເຊິ່ງກັນແລະກັນເນື່ອງໃນໂອກາດສອງປະເທດສ້າງຕັ້ງສາຍພົວພັນທາງການທູດຄົບຮອບ 40 ປີ.

ເນື້ອໃນສານຊົມເຊີຍຂອງທ່ານສີຈິ້ນຜິງ ລະບຸວ່າ: ພາຍຫຼັງສ້າງຕັ້ງສາຍພົວພັນທາງການທູດເປັນເວລາ 40 ປີມານີ້, ການພົວພັນລະຫວ່າງຈີນກັບສະຫະລັດອາຣັບເອມີເຣດໄດ້ຂະຫຍາຍຕົວຢ່າງປອດໃສ ແລະ ໝັ້ນທ່ຽງ. ຂ້າພະເຈົ້າເອົາໃຈໃສ່ເປັນຢ່າງສູງຕໍ່ການຂະຫຍາຍສາຍພົວພັນລະຫວ່າງສອງປະເທດ, ຍິນດີຮ່ວມກັບທ່ານປະທານາທິບໍດີ, ຖືເອົາໂອກາດສອງປະເທດສ້າງຕັ້ງສາຍພົວພັນທາງການທູດຄົບຮອບ 40 ປີເປັນຈຸດເລີ່ມຕົ້ນໃໝ່, ຊຸກຍູ້ໃຫ້ສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນກັບສະຫະລັດອາຣັບເອມີເຣດກ້າວຂຶ້ນສູ່ລະດັບສູງກວ່າເກົ່າ ແລະ ປະກອບສ່ວນຫຼາຍກວ່າເກົ່າເຂົ້າໃນສັນຕິພາບ ແລະສະຖຽນລະພາບຂອງພາກພື້ນກໍຄືຂອງໂລກ ໃນຂະນະທີ່ສ້າງຄວາມສຸກໃຫ້ແກ່ປະຊາຊົນທັງສອງຊາດ.

ເນື້ອໃນສານຊົມເຊີຍຂອງທ່ານໂມຮຳມັດ ບິນ ຊາເຢັດ ອັນ ນາຣ໌ຢານ ກ່າວວ່າ: ເນື່ອງໃນໂອກາດສະຫະລັດອາຣັບເອມີເຣດ ແລະ ຈີນສ້າງຕັ້ງສາຍພົວພັນທາງການທູດຄົບຮອບ40 ປີ, ຂ້າພະເຈົ້າຂໍສະແດງຄວາມຊົມເຊີຍອັນຈິງໃຈ ແລະ ພອນໄຊອັນປະເສີດທີ່ສຸດມາຍັງທ່ານປະທານສີຈິ້ນຜິງ, ອວຍພອຍໃຫ້ສອງປະເທດຈົ່ງມີການພັດທະນາ ແລະມີຄວາມຈະເລີນຮຸ່ງເຮືອງຢ່າງບໍ່ຢຸດຢັ້ງ ກໍຄື ດຳເນີນການຮ່ວມມືຫຼາຍກວ່າເກົ່າໃນຂົງເຂດຕ່າງໆ. ສະຫະລັດອາຣັບເອມີເຣດໄດ້ສຸມກຳລັງເຂົ້າໃນການປັບປຸງ ແລະເສີມຂະຫຍາຍສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດນັບແຕ່ຕົ້ນຕະຫຼອດປາຍ, ເພື່ອສ້າງຄວາມສຸກໃຫ້ແກ່ປະຊາຊົນສອງຊາດ.