ວັນທີ 1 ພະຈິກນີ້, ກອງປະຊຸມເວທີເປິກສາຫາລືຈາກາຕາການພົວພັນຈີນ-ອາຊຽນໄດ້ຈັດຂຶ້ນຢູ່ນະຄອນຫຼວງຈາກາຕາປະເທດອິນໂດເນເຊຍ, ໂດຍມີທ່ານກາວກິມຮຸນ ເລຂາທິການໃຫຍ່ອາຊຽນ, ທ່ານນາງໂຫວຢ້ຽນສີ ເອກອັກຄະລັດຖະທູດຈີນປະຈຳອາຊຽນ, ທູຕານຸທູດຂອງບັນດາປະເທດປະຈຳອາຊຽນ ແລະຜູ້ຕາງໜ້າວົງການຕ່າງໆຫຼາຍກວ່າ 150 ທ່ານໄດ້ເຂົ້າຮ່ວມ.

   ໃນໂອກາດກ່າວປະກອບຄຳເຫັນ, ທ່ານນາງໂຫວຢ້ຽນສີ ໄດ້ເນັ້ນໜັກວ່າ: ມາດຕະການປະຕິຮູບສຳຄັນຕ່າງໆຂອງຈີນໄດ້ສະໜອງໂອກາດໃໝ່ໃຫ້ແກ່ການຮ່ວມມືລະຫວ່າງຈີນກັບອາຊຽນ ແລະການພັດທະນາຮ່ວມກັນຂອງພາກພື້ນ, ຫວັງວ່າສອງຝ່າຍຈະຊຸກຍູ້ການເຊື່ອມໂຍງເຊື່ອມຈອດກັນທີ່ມີລະດັບສູງ, ມີລັກສະນະກວມລວມ ແລະເຊື່ອມສານຈິດໃຈຕື່ມອີກ, ເພື່ອປະກອບສ່ວນເຂົ້າໃນການຍົກລະດັບສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນກັບອາຊຽນໃຫ້ສູງຂຶ້ນ.

    ບັນດາແຂກຜູ້ມີກຽດ ທີ່ເຂົ້າຮ່ວມກອງປະຊຸມໄດ້ຕີລາຄາຢ່າງຕັ້ງໜ້າຕໍ່ຜົນງານດ້ານການຮ່ວມມືໃນເຂດເຊື່ອມໂຍງເຊື່ອມຈອດກັນລະຫວ່າງຈີນກັບອາຊຽນ, ຄອງຄອຍຈີນ ແລະອາຊຽນຈະສືບຕໍ່ເພີ່ມທະວີການຮ່ວມມື, ຮ່ວມກັນຊຸກຍູ້ການພັດທະນາ ແລະ ຄວາມຈະເລີນຮຸ່ງເຮືອງຂອງພາກພື້ນ.

    ກອງປະຊຸມເວທີເປິກສາຫາລືຄັ້ງນີ້ໄດ້ມີຫົວຂໍ້ວ່າ “ເຊື່ອມໂຍງເຊື່ອມຈອດກັນ: ຂົວຕໍ່ ແລະສາຍຜູກພັນ, ເຊິ່ງໄດ້ຮ່ວມກັນຈັດຂຶ້ນໂດຍຄະນະທູດຈີນປະຈຳອາຊຽນ ແລະ ຄະນະທູດມາເລເຊຍຖາວອນປະຈຳອາຊຽນ.