ໂດຍຕອບສະໜອງຕາມຄຳເຊີນຂອງສະພາສູງອີຕາລີ, ທ່ານຫຼີຊີ່ ກຳມະການປະຈຳກົມການເມືອງສູນກາງພັກກອມມູນິດຈີນ ເລຂາທິການຄະນະກຳມະການກວດກາລະບຽບວິໄນສູນກາງພັກໄດ້ນຳພາຄະນະຜູ້ແທນພັກກອມມູນິດຈີນດຳເນີນການຢ້ຽມຢາມສັນທະວະໄມຕີຢ່າງເປັນທາງການຕໍ່ອີຕາລີລະຫວ່າງວັນທີ 30 ຕຸລາຫາວັນທີ 2 ພະຈິກນີ້, ຢູ່ນະຄອນຫຼວງໂຣມໄດ້ພົບປະກັບທ່ານອິກນາຊີວ ລາ ຣູຊາ ປະທານສະພາສູງອີຕາລີ, ທ່ານອັນໂຕນີໂອ ຕາຈາ ຮອງນາຍົກ ລັດຖະມົນຕີທັງເປັນລັດຖະມົນຕີກະຊວງການຕ່າງປະເທດອີຕາລີ.

ທ່ານຫຼີຊີ່ກ່າວວ່າ: ສອງຝ່າຍຕ້ອງຈັດຕັ້ງປະຕິບັດຄວາມຮັບຮູ້ທີ່ເປັນເອກະພາບກັນອັນສຳຄັນລະຫວ່າງຜູ້ນຳສອງປະເທດໃຫ້ດີ, ຊຸກຍູ້ການສ້າງການພົວພັນຄູ່ຮ່ວມຍຸດທະສາດຮອບດ້ານຈີນ-ອີຕາລີທີ່ສົມບູນແລະໝັ້ນທ່ຽງກວ່າເກົ່າ, ມີຜົນສຳເລັດຫຼາຍກວ່າເກົ່າ. ຍິນດີຮ່ວມກັບອີຕາລີບຸກເບີກການຮ່ວມມືແບບຕ່າງຝ່າຍຕ່າງໄດ້ຜົນປະໂຫຍດໃນຂົງເຂດດັ້ງເດີມ, ພະລັງງານສີຂຽວແລະຂົງເຂດຈະເລີນໃໝ່ອື່ນໆ, ຂະຫຍາຍການພົວພັນຈີນ-ອີຕາລິໃຫ້ດີກວ່າເກົ່າໃນຍຸກໃໝ່.

ທ່ານລາ ຣູຊາກ່າວວ່າ: ອີຕາລີຍິນດີຮ່ວມກັບຈີນເພີ່ມທະວີການສົນທະນາແລະການແລກປ່ຽນລະຫວ່າງອົງການນິຕິບັນຍັດແລະພັກການເມືອງ.

ທ່ານອັນໂຕນີໂອ ຕາຈາກ່າວວ່າ: ອີຕາລີຫວັງວ່າຈະຮ່ວມກັບຈີນຮັດແໜ້ນການໄປມາຫາສູ່ກັນດ້ານເສດຖະກິດການຄ້າແລະການຮ່ວມມືໄມຕີຈິດຕື່ມອີກ, ຊຸກຍູ້ໃຫ້ການພົວພັນລະຫວ່າງສອງຝ່າຍພັດທະນາໄປສູ່ທິດທາງທີ່ມີຄວາມສົມດຸນແລະສົມເຫດສົມຜົນ.