ວັນທີ 3 ພະຈິກນີ້, ອົງການສົ່ງອອກນ້ຳມັນເຊື້ອໄຟ ຫຼື ໂອເປັກ ໄດ້ອອກຖະແຫຼງການວ່າ: ປະເທດຜະລິດນ້ຳມັນເຊື້ອໄຟໃນໂອເປັກແລະນອກໂອເປັກທັງໝົດ 8 ປະເທດໄດ້ຕົກລົງຈະແກ່ຍາວເວລານຳໃຊ້ມາດຕະການສະໝັກໃຈຫຼຸດປະລິມານການຜະລິດນ້ຳມັນຈຳນວນ 2,2 ລ້ານບາເຣວຕໍ່ມື້ຕາມແຜນທີ່ຈະໝົດອາຍຸນຳໃຊ້ໃນທ້າຍເດືອນພະຈິກນີ້ ຈົນຮອດທ້າຍເດືອນທັນວາໜ້ານີ້.

     ຖະແຫຼງການລະບຸວ່າ: 8 ປະເທດພາຄີຂອງ“ໂອເປັກ+”ຄື: ອາຣັບບີ ຊາອູດິດ, ຣັດເຊຍ, ອີຣັກ, ສະຫະລັດອາຣັບ ເອເມເຣດ, ກູເວດ, ກາຊັກສະຖານ, ອານເຊຣີ ແລະ ໂອມັນ ຕົກລົງແກ່ຍາວເວລານຳໃຊ້ມາດຕະການຫຼຸດປະລິມານການຜະລິດແບບສະໝັກໃຈ. ແຕ່ຖະແຫຼງການດັ່ງກ່າວບໍ່ໄດ້ລະບຸວ່າ: 8 ປະເທດດັ່ງກ່າວຈະຍົກເລີກມາດຕະການຫຼຸດປະລິມານການຜະລິດດັ່ງກ່າວນັບແຕ່ເດືອນມັງກອນປີ 2025 ຫຼືບໍ່.