ຕາມຂ່າວຈາກກົມໃຫຍ່ເສນາທິການຮ່ວມຂອງ ສເກົາຫຼີ(JCS)ລາຍງານໃຫ້ຮູ້ໃນວັນທີ 3 ພະຈິກນີ້ວ່າ: ສເກົາຫຼີ ອາເມຣິກາແລະຍີ່ປຸ່ນໄດ້ຈັດການຊ້ອມຮົບຮ່ວມທາງອາກາດໃນມື້ດຽວກັນ, ເຮືອບິນຖິ້ມລະເບີດທາງຍຸດທະສາດ B-1B ຂອງອາເມຣິກາໄດ້ເຂົ້າຮ່ວມການຊ້ອມຮົບຄັ້ງນີ້.

ຕາມຂ່າວຈາກກົມໃຫຍ່ເສນາທິການຮ່ວມຂອງ ສເກົາຫຼີ(JCS)ລາຍງານວ່າ: ການຊ້ອມຮົບໄດ້ຈັດຂຶ້ນຢູ່ເຂດທັບຊ້ອນເຂດປ້ອງກັນທາງອາກາດລະຫວ່າງສເກົາຫຼີແລະຍີ່ປຸ່ນທາງພາກຕາເວັນອອກເກາະເຈຈູ ຂອງສເກົາຫຼີ, ເຮືອບິນສູ້ຮົບ F-15K, KF-16 ຂອງກອງທັບອາກາດ ສເກົາຫຼີ, ເຮືອບິນສູ້ຮົບ F-16 ຂອງກອງທັບອາກາດອາເມຣິກາ, ເຮືອບິນ F-2 ຂອງກອງທັບອາກາດກຳລັງປ້ອງກັນຕົນເອງຂອງຍີ່ປຸ່ນໄດ້ເຂົ້າຮ່ວມການຊ້ອມຮົບຄັ້ງນີ້.

ກົມໃຫຍ່ເສນາທິການຮ່ວມຂອງ ສເກົາຫຼີ (JCS)ແຈ້ງໃຫ້ຮູ້ວ່າ: ການຊ້ອມຮົບຮ່ວມທາງອາກາດຄັ້ງນີ້ແມ່ນເພື່ອຕອບໂຕ້ການທົດລອງຍິງສົ່ງລູກສອນໄຟນຳວິຖີຂ້າມທະວີບແບບໃໝ່ຂອງ ສປປ ເກົາຫຼີໃນວັນທີ 31 ຕຸລາແລ້ວນີ້.