ວັນທີ 4 ພະຈິກນີ້, ທ່ານຫວາງຢີ້ ກຳມະການກົມການເມືອງສູນກາງພັກ ຫົວໜ້າຫ້ອງວ່າການຄະນະກຳມະການວຽກງານການຕ່າງປະເທດສູນກາງພັກກອມມູນິດຈີນກັບທ່ານຕາເຄໂອ ອາຣີບາ ທີ່ເປິກສາພິເສດຂອງຄະນະລັດຖະບານຍີ່ປຸ່ນ ຫົວໜ້າກົມປ້ອງກັນຄວາມສະຫງົບແຫ່ງຊາດຍີ່ປຸ່ນໄດ້ຈັດການເປິກສາຫາລືກົນໄກການສົນທະນາດ້ານການເມືອງລະດັບສູງລະຫວ່າງຈີນ-ຍີ່ປຸ່ນຢູ່ນະຄອນຫຼວງປັກກິ່ງຂອງຈີນ.

ທ່ານຫວາງຢີ້ກ່າວວ່າ: ຈີນແລະຍີ່ປຸ່ນຄວນອີງໃສ່ຄວາມຮັບຮູ້ທີ່ເປັນເອກະພາບກັນຂອງຜູ້ນຳສອງປະເທດ, ສ້າງການພົວພັນລະຫວ່າງຈີນ-ຍີ່ປຸ່ນທີ່ສອດຄ່ອງກັບຄວາມຕ້ອງການຂອງຍຸກໃໝ່ຢ່າງມີລັກສະນະສ້າງສັນແລະໝັ້ນທ່ຽງ. ຍີ່ປຸ່ນຄວນສ້າງຄວາມຮັບຮູ້ຕໍ່ຈີນຢ່າງມີເຫດຜົນແລະພາວະວິໄສ, ເຄົາລົບຕາມຄຳໝັ້ນສັນຍາດ້ານການເມືອງທີ່ໃຫ້ໄວ້ກ່ຽວກັບບັນຫາໄຕ້ຫວັນ, ປົກປັກຮັກສາພື້ນຖານດ້ານການເມືອງຂອງການພົວພັນລະຫວ່າງຈີນ-ຍີ່ປຸ່ນຢ່າງແທ້ຈິງ, ຜັນຂະຫຍາຍຄວາມຮັບຮູ້ທີ່ເປັນເອກະພາບກັນອັນສຳຄັນຂອງການ “ເປັນຄູ່ຮ່ວມມືກັນ, ບໍ່ເປັນໄພຂົ່ມຂູ່ຂອງກັນແລະກັນ” ດ້ວຍການກະທຳຕົວຈິງ, ຊຸກຍູ້ໃຫ້ການພົວພັນລະຫວ່າງສອງຝ່າຍກ້າວເດີນໄປຂ້າງໜ້າຢ່າງຍາວໄກແລະໝັ້ນທ່ຽງ.