ວັນທີ 5 ພະຈິກນີ້, ງານວາງສະແດງສິນຄ້ານຳເຂົ້າສາກົນຈີນຄັ້ງທີ7ໄດ້ໄຂຂຶ້ນຢູ່ກຳແພງນະຄອນຊຽງໄຮ້ຂອງຈີນ ໂດຍໄດ້ດຶງດູດວິສາຫະກິດ 3.496 ແຫ່ງຈາກ 129 ປະເທດ ແລະ ເຂດແຄວ້ນມາເຂົ້າຮ່ວມງານ, ເຊິ່ງຈຳນວນປະເທດແລະເຂດແຄວ້ນ ກໍຄືຈຳນວນວິສາຫະກິດທີ່ເຂົ້າຮ່ວມງານລ້ວນແຕ່ໄດ້ລື່ນກາຍຄັ້ງຜ່ານມາ.

ຄູ່ຮ່ວມມືຂອງງານວາງສະແດງສິນຄ້ານຳເຂົ້າສາກົນຈີນໄດ້ເພີ່ມຂຶ້ນຢ່າງຕໍ່ເນື່ອງ

ເດືອນພຶດສະພາປີ2017, ທ່ານສີຈິ້ນຜິງ ປະທານປະເທດຈີນໄດ້ປະກາດວ່າ: ຈີນຈະຈັດງານວາງສະແດງສິນຄ້ານຳເຂົ້າສາກົນຈີນເລີ່ມແຕ່ປີ2018ເປັນຕົ້ນໄປ. ໃນເວລາກ່າວຄຳປາໄສໃນພິທີເປີດງານວາງສະແດງສິນຄ້ານຳເຂົ້າສາກົນຈີນຄັ້ງທຳອິດ, ທ່ານສີຈິ້ນຜິງໄດ້ຊີ້ແຈງເຖິງຈຸດປະສົງໃນເບື້ອງຕົ້ນຂອງຕົນ: ການຈັດງານວາງສະແດງສິນຄ້ານຳເຂົ້າສາກົນຈີນ ເປັນນະໂຍບາຍສຳຄັນຮອບໃໝ່ທີ່ຈີນວາງອອກເພື່ອສຸມໃສ່ຊຸກຍູ້ການເປີດປະຕູສູ່ພາຍນອກໃນລະດັບສູງ, ເປັນມາດຕະການສຳຄັນຂອງຈີນໃນການເປັນເຈົ້າການເປີດຕະຫຼາດສູ່ໂລກ.

ຕະຫຼອດໄລຍະ7ປີຜ່ານມານີ້, ຄູ່ຮ່ວມມືຂອງງານວາງສະແດງສິນຄ້ານຳເຂົ້າສາກົນຈີນໄດ້ເພີ່ມຂຶ້ນຢ່າງຕໍ່ເນື່ອງ, ໄດ້ຮັບຜົນງານພົ້ນເດັ່ນຫຼາຍຂຶ້ນ. ງານວາງສະແດງສິນຄ້ານຳເຂົ້າສາກົນຈີນໃນ6ຄັ້ງຜ່ານມາໄດ້ວາງສະແດງຜະລິດຕະພັນໃໝ່, ເຕັກນິກໃໝ່ ແລະການບໍລິການໃໝ່ທີ່ມີລັກສະນະຕົວແທນ ນຳສະເໜີອອກສູ່ສາຍຕາຊາວໂລກເປັນຄັ້ງທຳອິດຈຳນວນເກືອບ 2.500 ຢ່າງ, ນັບລວມແລ້ວມີຍອດມູນຄ່າທີ່ມີເຈດຈຳນົງຈະເຊັນສັນຍາຊື້ຂາຍກັນບັນລຸເຖິງ 420 ຕື້ໂດລາ.

ຄຳໝັ້ນສັນຍາທີ່ຈີນໃຫ້ໄວ້ກັບໂລກບໍ່ເຄີຍມີການປ່ຽນແປງຈັກເທື່ອ

ທ່ານສີຈິ້ນຜິງເຄີຍກ່າວຢືນຢັນມາຫຼາຍເທື່ອແລ້ວວ່າ: “ການເປີດປະຕູສູ່ພາຍນອກເປັນສັນຍາລັກພົ້ນເດັ່ນຂອງຈີນໃນຍຸກປັດຈຸບັນ.” ເພິ່ນໄດ້ກ່າວຄຳປາໄສໃນພິທີເປີດງານວາງສະແດງສິນຄ້ານຳເຂົ້າສາກົນຈີນເປັນ5ຄັ້ງລຽນຕິດ, ໃນບົດປາໄສຂອງເພິ່ນແມ່ນປາກົດມີຄຳວ່າ “ການເປີດປະຕູສູ່ພາຍນອກ” ຫຼາຍກວ່າຮ້ອຍເທື່ອ.

ຕະຫຼອດໄລຍະ7ປີຜ່ານມານີ້, ມາດຕະການປະຕິຮູບຕ່າງໆທີ່ທ່ານສີຈິ້ນຜິງສະເໜີອອກໃນງານວາງສະແດງສິນຄ້ານຳເຂົ້າສາກົນຈີນເຊັ່ນ: ການສ້າງຕັ້ງເຂດໃໝ່ລິນກາງເຂດທົດລອງການຄ້າເສລີຊຽງໄຮ້, ຍົກເລີກມາດຕະການຈຳກັດການລົງທຶນຂອງນັກທຸລະກິດຕ່າງປະເທດໃນຂົງເຂດອຸດສາຫະກຳການຜະລິດຢ່າງຮອບດ້ານ, ເປີດກວ້າງການອະນຸມັດເຂົ້າເຖິງຕະຫຼາດຂອງສິນຄ້າຕ່າງໆເຊັ່ນ ຜະລິດຕະພັນດິຈີຕອນເປັນຕົ້ນ ແລະອື່ນໆ ລ້ວນແຕ່ກຳລັງກາຍເປັນຈິງເທື່ອລະກ້າວ.

ງານວາງສະແດງສິນຄ້ານຳເຂົ້າສາກົນຈີນທັງ7ຄັ້ງໄດ້ເປັນທີ່ເຫັນໄດ້ຢ່າງປະຈັກຕາຂອງຊາວໂລກຢ່າງຫຼວງຫຼາຍ ສາເຫດກໍແມ່ນຍ້ອນວ່າ ຢູ່ບົນເວທີໃຫຍ່ແຫ່ງນີ້, ຈີນໄດ້ສະແດງໃຫ້ເຫັນເຖິງຄວາມໝັ້ນໃຈຢ່າງເດັດດ່ຽວ ແລະ ການກະທຳທີ່ຕິດແທດຕົວຈິງຄື “ຈັບມືກັນ” ແຕ່ບໍ່ແມ່ນ “ປ່ອຍມືກັນ”, “ມ້າງກຳແພງກີດຂວາງ”  ແຕ່ບໍ່ແມ່ນ “ສ້າງກຳແພງກີດຂວາງ”, ເຊິ່ງໄດ້ກະຕຸ້ນກະແສການພັດທະນາພາຍໃນປະເທດຢ່າງມີຊີວິດຊີວາ ທັງໄດ້ກະຕຸ້ນການພັດທະນາເສດຖະກິດໂລກໃຫ້ມີຊີວິດຊີວາເຊັ່ນດຽວກັນ.