ຕອນຂ້ອນແຈ້ງວັນທີ 6 ພະຈິກນີ້, ທ່ານໂດໂນ ທຣຳ ຜູ້ສະໝັກຮັບເລືອກຕັ້ງປະທານາທິບໍດີອາເມຣິກາທີ່ສັງກັດພັກຣີພັບບລີກັນ, ອະດີດປະທານາທິບໍດີອາເມຣິກາໄດ້ປະກາດວ່າໄດ້ຮັບໄຊຊະນະໃນການເລືອກຕັ້ງປະທານາທິບໍດີປີ 2024.

ເມື່ອການເລືອກຕັ້ງປະທານາທິບໍດີຂອງອາເມຣິກາໄດ້ເລີ່ມຂຶ້ນທຸກຄັ້ງ, ການໂຕ້ແຍ້ງກັນລະຫວ່າງເງິນຄຳ ແລະ ສິດອຳນາດກໍໄດ້ເລີ່ມຂຶ້ນເຊັ່ນດຽວກັນ. ການເມືອງແບບເງິນຕາເປັນພະຍາດທີ່ຕິດມານານ ແລະ ປິ່ນປົວໄດ້ຍາກຂອງການເລືອກຕັ້ງປະທານາທິບໍດີອາເມຣິກາ, ສ່ວນປີ 2024 ແມ່ນຍັງຮຸນແຮງກວ່າທຸກຄັ້ງທີ່ຜ່ານມາອີກ. ມີນັກວິເຄາະເຫັນວ່າ: ການເລືອກຕັ້ງປະທານາທິບໍດີອາເມຣິກາໃນປີ 2024 ອາດຈະກາຍເປັນການເລືອກຕັ້ງຄັ້ງໜຶ່ງທີ່ສິ້ນເປືອງເງິນຫຼາຍທີ່ສຸດໃນປະຫວັດສາດສະໄໝໃໝ່, ພຽງແຕ່ໃນອາທິດສຸດທ້າຍ, ທ່ານນາງກາເມລາ ເຮຣີສ ແລະ ທ່ານໂດໂນ ທຣຳ ກໍໄດ້ສິ້ນເປືອງເງິນຫຼາຍກວ່າ 1 ຕື້ໂດລາ. ສ່ວນການເລືອກຕັ້ງປະທານາທິບໍດີອາເມຣິກາໃນຄັ້ງນີ້ໄດ້ສິ້ນເປືອງເງິນຫຼາຍກວ່າ 14,7 ຕື້ໂດລາແລ້ວ. ຄັນຊັ້ນ, ເງິນເຫຼົ່ານີ້ແມ່ນມາຈາກໃສ?

ການມີສ່ວນຮ່ວມໃນການເລືອກຕັ້ງປະທານາທິບໍດີອາເມຣິກາຂອງທ່ານເອລອນ ມາສກ໌ ມະຫາເສດຖີພັນລ້ານຊາວອາເມຣິກາໄດ້ດຶງດູດສາຍຕາຂອງຄົນທັງຫຼາຍກໍແມ່ນຍ້ອນວ່າ ທ່ານໄດ້ໃຫ້ການສະໜັບສະໜູນເປັນເງິນທຶນຈຳນວນມະຫາສານໃຫ້ແກ່ທ່ານໂດໂນ ທຣຳ ເພື່ອໃຊ້ຈ່າຍເຂົ້າໃນການແຂ່ງຂັນເລືອກຕັ້ງ. ຕາມຂ່າວແຈ້ງວ່າ: ນັບມາຮອດປັດຈຸບັນ, ທ່ານເອລອນ ມາສກ໌ໄດ້ທຸ່ມເທທຶນຮອນເກືອບ 177 ລ້ານໂດລາ ໂດຍຜ່ານ “ຄະນະກຳມະການເພື່ອການເຄື່ອນໄຫວທາງການເມືອງອາເມຣິກາ” ຫຼື America PAC ທີ່ທ່ານເປັນຜູ້ສ້າງຕັ້ງຂຶ້ນເອງ. ນອກນີ້, ທ່ານເອລອນ ມາສກ໌ຍັງໄດ້ສ້າງບັນຍາກາດໃນການດຶງຫາສຽງໃຫ້ແກ່ທ່ານໂດໂນ ທຣຳ ດ້ວຍສື່ X ທີ່ເປັນສື່ສັງຄົມອອນລາຍຕົນຄວບຄຸມ. ຕາມຂ່າວແຈ້ງວ່າ, ທ່ານເອລອນ ມາສກ໌ໃຫ້ຄຳໝັ້ນສັນຍາຢູ່ຕາມສື່ສັງຄົມອອນລາຍ X ວ່າ: ຈະໃຫ້ລາງວັນ 47 ໂດລາແກ່ຜູ້ມີສິດອອກສຽງເລືອກຕັ້ງ ທີ່ໄດ້ລົງລາຍເຊັນໃນໜັງສືຮ້ອງຮຽນຂອງຄະນະກຳມະການ ເພື່ອການເຄື່ອນໄຫວທາງການເມືອງ ຫຼື PAC ຂອງພັກຣີພັບບລີກັນ. ນອກນີ້, ນັບແຕ່ວັນທີ 21 ຕຸລາ 2024 ເປັນຕົ້ນມາ, ໄດ້ເລີ່ມຈັດໃຫ້ມີລາຍການຈົກສະຫຼາກ ໂດຍຈະປ່ອຍເງິນລາງວັນ 1 ລ້ານໂດລາໃຫ້ແກ່ຜູ້ມີສິດອອກສຽງເລືອກຕັ້ງ ທີ່ໄດ້ລົງລາຍເຊັນໃນໜັງສືຮ້ອງຮຽນໃນທຸກມື້.

ອີກຝ່າຍໜຶ່ງ, ມະຫາເສດຖີຫຼາຍທ່ານ ເຊັ່ນ: ທ່ານບິວ ເກັດ, ທ່ານວາເຣນ ບັຟເຟດ, ທ່ານມັກ ຊັກເກີເບີກ ແລະ ທ່ານອື່ນໆ ໄດ້ສະໜັບສະໜູນເງິນໃຫ້ແກ່ທ່ານນາງກາເມລາ ເຮຣີສເຊັ່ນດຽວກັນ. ນັບມາຮອດທ້າຍເດືອນຕຸລາຜ່ານມາ, ຊ່ອງທາງລະດົມທຶນຂອງພັກເດໂມເກຣຕິກໄດ້ມີຫຼາຍກວ່າ 1 ຕື້ໂດລາກ່ອນພັກຣີພັບບລີກັນ.

ການທຸ່ມເທທຶນຮອນເປັນຈຳນວນມະຫາສານເຫຼົ່ານີ້ ຈະສາມາດແລກໄດ້ມາ ເຊິ່ງຄວາມມີສິດມີສຽງ ແລະ ຜົນປະໂຫຍດໃນຂົງເຂດການເມືອງ. ຜົນປະໂຫຍດດ້ານເສດຖະກິດຂອງຜູ້ໃຫ້ທຶນ ຈະມີສາຍພົວພັນທີ່ຕັດຂາດບໍ່ໄດ້ກັບຜູ້ເຂົ້າຮ່ວມການແຂ່ງຂັນເລືອກຕັ້ງ, ການສົມຮູ້ຮ່ວມຄິດທັງທາງດ້ານເສດຖະກິດແລະການເມືອງແບບນີ້ຈະເຮັດໃຫ້ການເລືອກຕັ້ງປະທານາທິບໍດີອາເມຣິກາເສຍຄວາມທ່ຽງທຳ.

ໃນສາຍຕາຂອງຄົນທັງຫຼາຍ, ການເລືອກຕັ້ງປະທານາທິບໍດີອາເມຣິກາຈະເປັນການໂຕ້ແຍ້ງກັນດ້ານເງິນຄຳຫຼາຍກວ່າການແຂ່ງຂັນຢ່າງມີປະຊາທິປະໄຕ. ໃນຈຳນວນປະທານາທິບໍດີ 13 ຊຸດຂອງອາເມຣິກາພາຍຫຼັງສົງຄາມໂລກຄັ້ງທີ 2, ນອກຈາກທ່ານເຮຣີ ທຣູແມນແລ້ວ, ເກືອບໝົດທຸກທ່ານກໍເປັນເສດຖີຮ້ອຍລ້ານຈົນກະທັ້ງພັນລ້ານ, ຊັບສິນໄດ້ກາຍເປັນຂັ້ນໄດທີ່ກ້າວໄປສູ່ທຳນຽບປະທານາທິບໍດີອາເມຣິກາ. ແຕ່ວ່າ, ຊັບສິນກໍບໍ່ແມ່ນປັດໄຈສຳຄັນພຽງໜຶ່ງດຽວ. ເມື່ອທຽບໃສ່ການເຂົ້າຮ່ວມການແຂ່ງຂັນເລືອກຕັ້ງດ້ວຍຕົນເອງແລ້ວ, ມະຫາເສດຖີທັງຫຼາຍຂອງອາເມຣິກາເປັນຜູ້ຢູ່ເບື້ອງຫຼັງຄວບຄຸມການແຂ່ງຂັນເລືອກຕັ້ງປະທານາທິບໍດີຫຼາຍກວ່າ.

ຄັນຊັ້ນ, ເງິນເຫຼົ່ານີ້ຈະສິ້ນເປືອງຢູ່ບ່ອນໃດແດ່? ມະຫາເສດຖີທີ່ເຂົ້າຮ່ວມການແຂ່ງຂັນເລືອກຕັ້ງປະທານາທິບໍດີອາເມຣິການັບມື້ນັບຫຼາຍຂຶ້ນ, ການໂຄສະນາຫາສຽງໃນການແຂ່ງຂັນເລືອກຕັ້ງກໍນັບມື້ນັບຫຼາຍຂຶ້ນ. ການກ່າວປາຖະກະຖາທາງອອຟລາຍ, ການໂຄສະນາທາງອອນລາຍ ແລະ ການໂຄສະນາຫາສຽງເປັນຕົ້ນ ຈະຕ້ອງເສຍເງິນເປັນຈຳນວນຫຼວງຫຼາຍ. ນອກນີ້, ການຢຽບຢ່ຳຄູ່ແຂ່ງ ແລະ ການຫຼິ້ນເລ່ລຽມຢູ່ເບື້ອງຫຼັງເປັນຕົ້ນ ກໍໄດ້ເກີດຂຶ້ນເລື້ອຍໆໃນການແຂ່ງຂັນເລືອກຕັ້ງຂອງອາເມຣິກາ.

ອາດເວົ້າໄດ້ວ່າ, ຢູ່ເບື້ອງຫຼັງຂອງປະທານາທິບໍດີອາເມຣິກາທຸກຄົນຕ່າງກໍມີການສົມຮູ້ຮ່ວມຄິດລະຫ່ວາງເງິນຄຳ ແລະ ອຳນາດ. ພາຍໃຕ້ສະພາບການດັ່ງກ່າວ, ສຽງຂອງປະຊາຊົນທົ່ວໄປຈະຖືກປິດບັງໄປໝົດ. ວາລະສານ “ການວິເຄາະການເມືອງຮາເວີດ” ລະບຸວ່າ: ການເມືອງແບບເງິນຕາໄດ້ຮັບປະກັນໃຫ້ຊົນຊັ້ນສ່ວນໜ້ອຍມີສິດເສລີຫຼາຍກວ່າຄົນທັງປວງ, ຄວາມເສລີແບບນີ້ຈະບໍ່ເອົາຫົວຊາຕໍ່ສິດຂອງປະຊາຊົນທຳມະດາ. ເມື່ອຄວາມບໍ່ສະເໝີພາບດ້ານເສດຖະກິດຫັນປ່ຽນເປັນຄວາມບໍ່ສະເໝີພາບດ້ານການເມືອງແລ້ວ, ຄວາມທ່ຽງທຳຂອງການແຂ່ງຂັນເລືອກຕັ້ງປະທານາທິບໍດີອາເມຣິກາກໍກາຍເປັນເລື່ອງຕະຫຼົກຢ່າງສຸດກົກສຸດປາຍ. ພາຍໃຕ້ສະພາບການດັ່ງກ່າວ, ພວກເຮົາຢາກຖາມວ່າ: ຖ້າຜູ້ໃດກໍບໍ່ສາມາດມີສິດສະເໝີພາບທີ່ມອບໝາຍໂດຍລັດຖະທຳມະນູນແລ້ວ, ການແຂ່ງຂັນເລືອກຕັ້ງປະທານາທິບໍດີຂອງອາເມຣິກາຍັງຈະສາມາດຖືກເອີ້ນວ່າເປັນການເລືອກຕັ້ງທີ່ເສລີພາບ ແລະ ທ່ຽງທຳບໍ?