ວັນທີ 5 ພະຈິກນີ້, ພິທີສາຍຮູບເງົາຮອບປະຖົມມະເລີກຂອງເທດສະການຮູບເງົາດີເດັ່ນ ລາວ-ຈີນ 2024 ທີ່ຮ່ວມຈັດຂຶ້ນໂດຍ ວິທະຍຸໂທລະພາບສູນກາງຈີນ ຫຼື CMG ປະຈຳລາວ, ກົມຮູບເງົາ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວລາວ ແລະ ບໍລິສັດຕາຂ່າຍໄຟຟ້າພາກໃຕ້ຈີນຈໍາກັດ ໄດ້ຈັດຂຶ້ນຢູ່ຫໍວັດທະນະທຳແຫ່ງຊາດລາວ ທີ່ນະຄອນຫຼວງວຽງຈັນ.

    ທ່ານ  ສິນລະວົງ ຄຸດໄພທູດ ປະທານສູນກາງແນວລາວສ້າງຊາດ, ທ່ານນາງ ຟ່າງຮົງ ເອກອັກຄະລັດຖະທູດຈີນປະຈຳລາວ, ພ້ອມດ້ວຍຜູ້ຕາງໜ້າຈາກກະຊວງທະບວງກົມຂອງລາວ, ບຸກຄົນໃນວົງການຕ່າງໆຂອງລາວ, ຜູ້ຕາງໜ້າຂອງບໍລິສັດຈີນປະຈຳລາວ ແລະ ຊາວເຊື້ອສາຍຈີນທັງໝົດເກືອບ 800 ຄົນໄດ້ເຂົ້າຮ່ວມພິທີໄຂ, ທັງໄດ້ຮ່ວມຊົມຮູບເງົາເລື່ອງ “ສິງໜຸ່ມໄວໄຟ” ທີ່ແປ ແລະ ພາກເປັນພາສາລາວ.

    ທ່ານນາງ ຟ່າງຮົງ ໄດ້ຕີລາຄາສູງຕໍ່ເທດສະການຮູບເງົາດີເດັ່ນລາວ-ຈີນທີ່ໄດ້ປະກອບສ່ວນເຂົ້າໃນການແລກປ່ຽນວັດທະນະທຳຈີນ-ລາວໃນຫຼາຍປີຜ່ານມາ ໂດຍກ່າວວ່າ: ຮູບເງົາແມ່ນສິລະປະແຫ່ງແສງ ແລະ ເງົາ ເຊິ່ງໄດ້ຮັບຄວາມນິຍົມຊົມຊອບຈາກປະຊາຊົນ ແລະ ໄດ້ເສີມຂະຫຍາຍບົດບາດທີ່ສຳຄັນເຂົ້າໃນການແລກປ່ຽນ ແລະ ຖອດຖອນບົດຮຽນເຊິ່ງກັນແລະກັນ ລະຫວ່າງອະລິຍະທຳທີ່ແຕກຕ່າງກັນ. ການແລກປ່ຽນດ້ານຮູບເງົາ ເປັນພາກສ່ວນໜຶ່ງຂອງການເພີ່ມທະວີການແລກປ່ຽນດ້ານວັດທະນະທຳລະຫວ່າງ ຈີນ-ລາວ. ຫວັງວ່າ ກິດຈະກຳແລກປ່ຽນດ້ານວັດທະນະທຳທີ່ມີ “ເທດສະການຮູບເງົາດີເດັ່ນ” ເປັນຕົວແທນນັ້ນ ຈະສາມາດເພີ່ມທະວີມິດຕະພາບ ແລະ ຄວາມເຂົ້າໃຈເຊິ່ງກັນແລະກັນລະຫວ່າງປະຊາຊົນສອງຊາດ, ຊຸກຍູ້ການແລກປ່ຽນ ແລະ ຖອດຖອນບົດຮຽນເຊິ່ງກັນແລະກັນໃນດ້ານວັດທະນະທຳ ພ້ອມທັງສ້າງບັນຍາກາດດ້ານວັດທະນະທຳທີ່ດີໃຫ້ແກ່ການສ້າງຄູ່ຮ່ວມຊາຕາກຳ ຈີນ-ລາວ.

    ທ່ານ ວັນສີ ກົ່ວມົວ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວລາວ ກ່າວວ່າ: ເທດສະການຄັ້ງນີ້ເປັນຂີດໝາຍອັນສໍາຄັນຂອງສາຍພົວພັນມິດຕະພາບ ລາວ-ຈີນ ທີ່ມີການຮ່ວມມື ແລະ ຊ່ວຍເຫຼືອກັນມາຍາວນານ ແລະ ນັບມື້ນັບເຕີບໃຫຍ່ຂະຫຍາຍຕົວ. ຜ່ານການຮ່ວມມືອັນດີລະຫວ່າງ ວິທະຍຸໂທລະພາບສູນກາງຈີນ (CMG) ແລະ ກົມຮູບເງົາ ລາວ ຕະຫຼອດ 7 ປີທີ່ຜ່ານມາ, ພວກເຮົາໄດ້ນໍາເອົາຮູບເງົາດີເດັ່ນຂອງຈີນຫຼາກຫຼາຍປະເພດ ທັງເລື່ອງຕະຫຼົກ, ກັງຟູ, ກາຕູນ ແລະ ສາລະຄະດີ ໄປສູ່ປະຊາຊົນລາວໃນທົ່ວທຸກພາກຂອງປະເທດ. ທຸກເລື່ອງລ້ວນໄດ້ຮັບການແປເປັນພາສາລາວຢ່າງປະນີດ, ສ້າງຄວາມມ່ວນຊື່ນ ແລະ ເປີດໂລກະທັດໃຫ້ຜູ້ຊົມ. ນີ້ເປັນຂົວຕໍ່ທາງຈິດໃຈອັນແໜ້ນແຟ້ນລະຫວ່າງປະຊາຊົນສອງຊາດ. ປີ 2024 ນີ້ ເປັນປີເລີ່ມຕົ້ນຂອງແຜນແມ່ບົດການສ້າງຄູ່ຮ່ວມຊາຕາກໍາ ລາວ-ຈີນ (2024-2028). ຂ້າພະເຈົ້າເຊື່ອໝັ້ນວ່າ ເທດສະການຄັ້ງນີ້ຈະເປັນຈຸດເດັ່ນພິເສດຂອງປີ.

    ນັບແຕ່ວັນທີ 6 ພະຈິກ 2024 ເປັນຕົ້ນໄປ, ເທດສະການຮູບເງົາດີເດັ່ນລາວ-ຈີນ ຈະນໍາເອົາຮູບເງົາຈີນເລື່ອງເດັ່ນເລື່ອງດັງຫຼາກຫຼາຍສີສັນທີ່ພາກສຽງເປັນພາສາລາວໄປລາດຕະເວນສາຍຢູ່ທົ່ວປະເທດລາວ, ຈະສົ່ງກິດຈະກຳວັດທະນະທຳໄປແຫ່ງຕ່າງໆໃນທົ່ວປະເທດລາວ,  ເຮັດໃຫ້ປະຊາຊົນລາວຫຼາຍກວ່າເກົ່າສາມາດສຳຜັດໄດ້ກັບມົນສະເໜ່ຂອງຮູບເງົາຢູ່ໜ້າເຮືອນ.