ພິທີເປີດສັບປະດາການຮ່ວມມືສື່ມວນຊົນພາຍໃຕ້ຫົວຂໍ້ "ຄູ່ຮ່ວມອາຊຽນ" 2024 ໄດ້ຈັດຂຶ້ນຢູ່ນະຄອນກຸ້ຍລິນ ເຂດປົກຄອງຕົວເອງເຜົ່າຈວ້າງກວາງຊີຈີນໃນວັນທີ 8 ພະຈິກນີ້. ທ່ານນາງ ສີວັນໄຊ ສີພັນຄໍາ ຮອງຜູ້ອໍານວຍການໃຫຍ່ສໍານັກຂ່າວສານປະເທດລາວ ຕົວແທນສື່ມວນຊົນລາວທີ່ເຂົ້າຮ່ວມງານຄັ້ງນີ້ໄດ້ໃຫ້ສໍາພາດຕໍ່ນັກຂ່າວວິທະຍຸໂທລະພາບສູນກາງຈີນ ຫຼື CMG ວ່າ: ຫວັງວ່າຜ່ານການເຂົ້າຮ່ວມງານ ກໍຄືຮ່ວມກັນເກັບກໍາຂ່າວຢູ່ທ້ອງຖິ່ນຕ່າງໆໃນເຂດກວາງຊີຄັ້ງນີ້, ຈະເພີ່ມທະວີມິດຕະພາບ ແລະ ການຮ່ວມມືລະຫວ່າງສື່ມວນຊົນຈີນ-ອາຊຽນຕື່ມອີກໃຫ້ກ້າວເຂົ້າສູ່ຄຸນນະພາບໃໝ່. 

  ສັບປະດາການຮ່ວມມືສື່ມວນຊົນພາຍໃຕ້ຫົວຂໍ້ "ຄູ່ຮ່ວມອາຊຽນ" 2024 ຄັ້ງນີ້, CMG ແລະ ອົງການປົກຄອງເຂດປົກຄອງຕົນເອງເຜົ່າຈວ້າງກວາງຊີຈີນໄດ້ຮ່ວມກັນເປັນເຈົ້າພາບຈັດຂຶ້ນ ໂດຍມີເຈົ້າໜ້າທີ່ລັດຖະບານ ຜູ້ຊ່ຽວຊານ ນັກວິຊາການພ້ອມດ້ວຍສື່ມວນຊົນຈີນ ແລະ ປະເທດສະມາຊິກອາຊຽນ 200 ກວ່າຄົນໄດ້ດໍາເນີນການແລກປ່ຽນ ແລະ ສົນທະນາກັນຢ່າງເລິກເຊິ່ງ ເພື່ອເສີມຂະຫຍາຍບົດບາດຂອງສື່ມວຊົນເຂົ້າໃນການຊຸກຍູ້ການສ້າງຄູ່ຮ່ວມຊາຕາກໍາຈີນ-ອາຊຽນໃຫ້ແໜ້າແຟ້ນກວ່າເກົ່າ.

  ທ່ານນາງ ສີວັນໄຊ ແຈ້ງໃຫ້ຮູ້ຕື່ມວ່າ: ງານຄັ້ງນີ້ໄດ້ສະແດງໃຫ້ເຫັນວ່າ, ຈີນມີຄວາມມຸ່ງໝັ້ນໃນການຮັດແໜ້ນສາຍພົວພັນ ແລະ ການຮ່ວມມືໃນຂົງເຂດສື່ມວນຊົນລະຫວ່າງຈີນ-ອາຊຽນ, ທັງໄດ້ສະແດງໃຫ້ເຫັນເຖິງຄວາມຕັ້ງໜ້າຂອງຈີນໃນການຍົກສູງບົດບາດອັນສໍາຄັນຂອງສື່ມວນຊົນ.

   ທ່ານນາງ ສີວັນໄຊ ແຈ້ງໃຫ້ນັກຂ່າວຮູ້ຕື່ມວ່າ: ຕົນເອງມີຄວາມປະທັບໃຈຕໍ່ການພັດທະນາຂອງຈີນໂດຍສະເພາະແມ່ນການສ້າງຄວາມທັນສະໄໝແບບຈີນທີ່ມີເອກະລັກພິເສດ5ຂໍ້ ເຊັ່ນ: ການຫັນເປັນທັນສະໄໝທີ່ມີປະຊາກອນຈຳນວນມະຫາສານ, ການຫັນເປັນທັນສະໄໝທີ່ປະຊາຊົນສ້າງຄວາມຮັ່ງມີຮ່ວມກັນ, ການຫັນເປັນທັນສະໄໝທີ່ຄວາມສີວິໄລດ້ານວັດຖຸ ແລະ ຈິດໃຈຂອງປະຊາຊົນປະສານສົມທົບກັນ, ການຫັນເປັນທັນສະໄໝທີ່ມະນຸດກັບທຳມະຊາດຢູ່ຮ່ວມກັນຢ່າງກົມກຽວ, ການຫັນເປັນທັນສະໄໝທີ່ເດີນຕາມເສັ້ນທາງພັດທະນາໂດຍສັນຕິ. ສຳລັບຕົນເອງແລ້ວ ແມ່ນຫວັງຢາກຜ່ານຈາກການເຂົ້າຮ່ວມງານຄັ້ງນີ້, ໄປສໍາຜັດຕົວຈິງກັບສະພາບການສ້າງຄວາມທັນສະໄໝແບບຈີນໃນມູມມອງຂອງສື່ມວນຊົນ.