ວັນທີ 9 ພະຈິກນີ້, ທ່ານວາລະດີເມຍ ປູຕີນ ປະທານາທິບໍດີຣັດເຊຍໄດ້ລົງນາມຮັບຮອງເອົາກົດໝາຍສະຫະພັນ ກ່ຽວກັບ “ອະນຸມັດສົນທິສັນຍາການພົວພັນຄູ່ຮ່ວມຍຸດທະສາດຮອບດ້ານຣັດເຊຍ-ສາທາລະນະລັດປະຊາຊົນປະຊາທິປະໄຕເກົາຫຼີ”.

ສົນທິສັນຍາດັ່ງກ່າວໄດ້ກຳນົດວ່າ: ສອງຝ່າຍຈະຮັກສາແລະພັດທະນາການພົວພັນຄູ່ຮ່ວມຍຸດທະສາດຮອບດ້ານໃນໄລຍະຍາວ ບົນພື້ນຖານຫຼກການກົດໝາຍສາກົນຕ່າງໆ ເຊັ່ນ: ບໍ່ລ່ວງລ້ຳອະທິປະໄຕແລະຜືນແຜ່ນດິນອັນຄົບຖ້ວນຂອງກັນ, ບໍ່ແຊກແຊງວຽກພາຍໃນຂອງກັນ, ສະເໝີພາບກັນ ແລະຕາມຫຼັກການຂອງກົດໝາຍສາກົນທີ່ກ່ຽວຂ້ອງກັບໄມຕີຈິດມິດຕະພາບແລະການພົວພັນແຫ່ງການຮ່ວມມືລະຫວ່າງປະເທດຕ່າງໆ ໂດຍອີງຕາມກົດໝາຍຂອງປະເທດຕົນ ແລະພັນທະສາກົນ. ນອກນັ້ນ, ສົນທິສັນຍາດັ່ງກ່າວຍັງໄດ້ກຳນົດວ່າ: ສອງຝ່າຍຈະດຳເນີນການຮ່ວມມືໃນຂົງເຂດປາບປາມລັດທິກໍ່ການຮ້າຍສາກົນແລະຄວາມປອດໄພດ້ານຂໍ້ມູນຂອງສາກົນ.