ວັນທີ 10 ພະຈິກນີ້, ເວທີເປິກສາຫາລືອຸດສາຫະກຳການຄ້າຈີນ-ອິນໂດເນເຊຍໄດ້ຈັດຂຶ້ນຢູ່ນະຄອນຫຼວງປັກກິ່ງ. ຜູ້ຕາງໜ້າພາກສ່ວນອຸດສາຫະກຳ ແລະ ການຄ້າຂອງສອງປະເທດໄດ້ເຊັນສັນຍາການຮ່ວມມືໃນຂົງເຂດຕ່າງໆ ເຊັ່ນ:ອາຫານ,ພະລັງງານໃໝ່,ວິທະຍາສາດເຕັກໂນໂລຊີດີຈີຕອນ ແລະ ອຸດສາຫະກຳຊີວະພາບເປັນຕົ້ນ.

    ທ່ານປຣາໂບໂວ ຊູບຽນໂຕ ປະທານາທິບໍດີອິນໂດເນເຊຍທີ່ພວມຢ້ຽມຢາມຈີນທາງລັດຖະກິດໄດ້ເຂົ້າຮ່ວມເວທີເປິກສາຫາລື ແລະ ກ່າວຄຳປາໄສ.ທ່ານກ່າວວ່າ, ອິນໂດເນເຊຍຍິນດີສືບຕໍ່ເກາະແຂນກັນກັບຈີນ, ເພີ່ມທະວີການຮ່ວມມືໃນຂົງເຂດຕ່າງໆ, ພ້ອມກັນເປັນສັກຂີພິຍານໃຫ້ແກ່ຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ.

    ປັດຈຸບັນ, ຈີນເປັນຄູ່ຄ້າໃຫຍ່ທີ່ສຸດຂອງອິນໂດເນເຊຍ.ລະຫວ່າງເດືອນມັງກອນ ຫາ ເດືອນສິງຫາປີ 2024, ຍອດມູນຄ່າການຄ້າລະຫວ່າງສອງປະເທດໄດ້ບັນລຸເຖິງ 92 ຕື້ 790 ລ້ານໂດລາ, ເພີ່ມຂຶ້ນ 1,5% ເມື່ອທຽບກັບໄລຍະດຽວກັນປີກາຍ. ຈີນເປັນປະເທດນຳເຂົ້າສິນຄ້າອັນດັບໜຶ່ງຂອງອິນໂດເນເຊຍເປັນເວລາ 13 ປີລຽນຕິດ,ເປັນປະເທດປາຍທາງສົ່ງອອກສິນຄ້າອັນດັບໜຶ່ງຂອງອິນໂດເນເຊຍເປັນເວລາ 7 ປີລຽນຕິດ. ການຮ່ວມມືດ້ານການຄ້າ ແລະ ການລົງທຶນລະຫວ່າງສອງປະເທດຈີນ-ອິນໂດເນເຊຍໄດ້ຮັບຜົນງານໃໝ່ຢ່າງບໍ່ຢຸດຢັ້ງ,ໄດ້ກາຍເປັນແບບຢ່າງແບບຕ່າງຝ່າຍຕ່າງໄດ້ຮັບຜົນປະໂຫຍດຂອງປະເທດພວມພັດທະນາ, ແບບຢ່າງດ້ານການພ້ອມກັນພັດທະນາແລະ ແບບຢ່າງຂອງການຮ່ວມມືໃຕ້ໃຕ້.