ໂດຍຕອບສະໜອງຕາມຄຳເຊີນຂອງທ່ານນາງ ດີນາ   ໂບລູອາເຕ   ປະທານາທິບໍດີສາທາລະນະລັດເປຣູ, ທ່ານສີຈິ້ນຜິງ ປະທານປະເທດຈີນ ໄດ້ເດີນທາງໄປນະຄອນຫຼວງລີມາ ປະເທດເປຣູເພື່ອເຂົ້າຮ່ວມກອງປະຊຸມຜູ້ນຳເສດຖະກິດອົງການຮ່ວມມືເສດຖະກິດອາຊີປາຊີຟິກ ຫຼື APECຄັ້ງທີ 31 ພ້ອມທັງຢ້ຽມຢາມເປຣູທາງລັດຖະກິດລະຫວ່າງວັນທີ 13-17ພະຈິກ2024. 

ປີ1991, ຈີນໄດ້ເຂົ້າເປັນສະມາຊິກອົງການຮ່ວມມືເສດຖະກິດອາຊີປາຊີຟິກ ຫຼື APEC ຢ່າງເປັນທາງການ. ຕະຫຼອດໄລຍະ 33 ປີຜ່ານມາ, ຈີນໄດ້ເປີດກວ້າງການເປີດປະຕູສູ່ພາຍນອກຢ່າງບໍ່ຢຸດຢັ້ງ, ຈາກຜູ້ມີສ່ວນຮ່ວມໃນໄລຍະເບື້ອງຕົ້ນຂອງອົງການ APEC ຄ່ອຍໆເຕີບໂຕກາຍມາເປັນຜູ້ນຳພາ ແລະ ຜູ້ຊຸກຍູ້.

“ການເປີດປະຕູສູ່ພາຍນອກ ຄືເສັ້ນຊີວິດແຫ່ງການຮ່ວມມືອາຊີປາຊີຟິກ” ທ່ານ ສີຈິ້ນຜິງ ເຄີຍໃຊ້ຄຳນີ້ມາປຽບທຽບ ເພື່ອຊີ້ແຈງເຖິງຄວາມສຳຄັນຂອງການເປີດປະຕູສູ່ພາຍນອກທີ່ມີຕໍ່ການຮ່ວມມືອາຊີປາຊີຟິກ. ໃນນີ້ ຄຳວ່າ ເສັ້ນຊີວິດ ແມ່ນເປັນຂໍກຸນແຈສຳຄັນແຫ່ງການຮັບປະກັນການຄົງຕົວ ແລະ ການພັດທະນາຂອງສິ່ງທີ່ມີຊີວິດ, ເວລາໃດຖ້າເສັ້ນນີ້ຂາດສະບັ້ນໄປ, ຊີວິດກໍຈະຖືກຂົ່ມຂູ່ຢ່າງໜັກໜ່ວງ. ເຊັ່ນດຽວກັບການຮ່ວມມືອາຊີປາຊີຟິກ, ຖ້າຫາກວ່າ ການເປີດປະຕູສູ່ພາຍນອກບໍ່ກວ້າງພໍ, ການແລກປ່ຽນລະຫວ່າງບັນດາປະເທດໃນດ້ານເສດຖະກິດ ວັດທະນະທຳ ວິທະຍາສາດເຕັກໂນໂລຊີ ກໍຈະຖືກກີດຂວາງ, ພື້ນຖານ ແລະ ແຮງຂັບເຄື່ອນດ້ານການຮ່ວມມືກໍຈະຖືກບັ່ນທອນຢ່າງຫຼວງຫຼາຍ.

ການເປີດປະຕູສູ່ພາຍນອກ ເປັນຄຳສັບທີ່ປາກົດອອກຢູ່ເລື້ອຍໆໃນຄຳປາໄສຂອງທ່ານສີຈິ້ນຜິງ ຕໍ່ກອງປະຊຸມທີ່ກ່ຽວຂ້ອງຂອງອົງການ APEC. ໃນກອງປະຊຸມຜູ້ນຳເສດຖະກິດAPEC, ທ່ານສີຈິ້ນຜິງເຄີຍຊີ້ອອກຢ່າງຈະແຈ້ງວ່າ: “ບົດຮຽນການພັດທະນາອາຊີປາຊີຟິກເຮັດໃຫ້ພວກເຮົາຮັບຮູ້ວ່າ ຖ້າເປີດປະຕູສູ່ພາຍນອກ ຈະມີຄວາມຈະເລີນຮຸ່ງເຮືອງຂຶ້ນ, ຖ້າປິດປະຕູກໍຈະຊຸດໂຊມລົງ,” “ເສດຖະກິດຂອງບັນດາສະມາຊິກ, ຖ້າເປີດປະຕູສູ່ພາຍນອກກໍຈະມີຄວາມກ້າວໜ້າຮ່ວມກັນ, ຖ້າປິດປະຕູກໍຈະປິດກັ້ນຕົນເອງ.”

ໃນເວລາກ່າວຄຳປາໄສທາງລາຍລັກອັກສອນຕໍ່ກອງປະຊຸມສຸດຍອດອຸດສາຫະກຳການຄ້າອົງການ APEC 2023, ທ່ານສີຈິ້ນຜິງໄດ້ເນັ້ນໜັກອີກຄັ້ງໜຶ່ງວ່າ: ການພັດທະນາອາຊີປາຊີຟິກແມ່ນອີງໃສ່ການເປີດກວ້າງ ກວມລວມ, ຖອດຖອນແລະແລກປ່ຽນບົດຮຽນເຊິ່ງກັນແລະກັນ, ຊ່ວຍຊູຍູ້ໜູນກັນ ແຕ່ບໍ່ແມ່ນເປັນປໍລະປັກກັນ, ຖິ້ມຜົນຮ້າຍໃສ່ບ້ານໃກ້ເຮືອນຄຽງ ແລະ ສ້າງອຸປະສັກກີດຂວາງ.

ໃນຖານະເປັນກົນໄກຮ່ວມມືເສດຖະກິດທີ່ມີລະດັບສູງສຸດ, ກວມເອົາຂົງເຂດ ກວ້າງຂວາງທີ່ສຸດ ແລະ ມີຖານະບົດບາດສູງສຸດໃນພາກພື້ນອາຊີປາຊີຟິກ, ອົງການ APEC ນັບຕັ້ງແຕ່ສ້າງຕັ້ງຂຶ້ນເມື່ອປີ1989ເປັນຕົ້ນມາໄດ້ຍຶດໝັ້ນການສ້າງຖະກິດໂລກແບບເປີດກວ້າງ. ຕະຫຼອດໄລຍະ 30 ກວ່າປີຜ່ານມານີ້, ລາຍໄດ້ສະເລ່ຍຕໍ່ຫົວຄົນຂອງພາກພື້ນອາຊີປາຊີຟິກໄດ້ເພີ່ມຂຶ້ນຫຼາຍກວ່າ 3 ເທົ່າ, ປະຊາກອນຈຳນວນໜຶ່ງຕື້ຄົນໄດ້ຫຼຸດພົ້ນອອກຈາກຄວາມທຸກຍາກຢ່າງສຳເລັດຜົນ; ລະດັບພາສີສະເລ່ຍໄດ້ຫຼຸດລົງຈາກ 17% ເຫຼືອພຽງແຕ່ 5% ເທົ່ານັ້ນ ແລະ ໄດ້ປະກອບສ່ວນເຂົ້າໃນການເຕີບໂຕຂອງເສດຖະກິດໂລກບັນລຸເຖິງ 70%. ທຸກມື້ນີ້, ອາຊີປາຊີຟິກໄດ້ກາຍເປັນພາກພື້ນທີ່ມີຊີວິດຊີວາ ແລະ ມີກຳລັງແຮງບົ່ມຊ້ອນດ້ານການພັດທະນາຫຼາຍທີ່ສຸດຢູ່ໃນໂລກ.

ວັນທີ9ພະຈິກ2023 ງານແລກປ່ຽນ ແລະງານວາງສະແດງເຕັກນິກວິສາຫະກິດຂະໜາດກາງແລະນ້ອຍAPECຄັ້ງທີ12ໄດ້ຈັດຂຶ້ນຢູ່ ນະຄອນຊິງຕາວແຂວງຊ່ານຕົ່ງຈີນ ໂດຍໄດ້ດຶງດູດວິສາຫະກິດຈີນແລະຕ່າງປະເທດຫຼາຍກວ່າ1600ແຫ່ງເຂົ້າຮ່ວມ

ການພັດທະນາພາກພື້ນອາຊີປາຊີຟິກ ແມ່ນພົວພັນຢ່າງສະໜິດແໜ້ນກັບຜົນປະໂຫຍດຂອງທຸກສະມາຊິກອົງການ APEC.  ທ່ານສີຈິ້ນຜິງໄດ້ຊີ້ໃຫ້ເຫັນວ່າ: “ຈີນເປັນສະມາຊິກຂອງວົງຄະນາຍາດອາຊີປາຊີຟິກ, ການພັດທະນາຂອງຈີນແມ່ນເລີ່ມຕົ້ນຢູ່ອາຊີປາຊີຟິກ, ໄດ້ຮັບຜົນປະໂຫຍດຈາກອາຊີປາຊີຟິກ ແລະ ຈະສືບຕໍ່ຕັ້ງຈຸດຢືນຢູ່ອາຊີປາຊາຟິກ ກໍຄື ສ້າງຜົນປະໂຫຍດໃຫ້ແກ່ອາຊີປາຊີຟິກ.”

ປີ 2022, ຍອດມູນຄ່າການຄ້າລະຫວ່າງຈີນກັບບັນດາສະມາຊິກ APEC ແມ່ນບັນລຸເຖິງ 3,739 ຕື້ 80 ລ້ານໂດລາ, ກວມ 59,7% ຂອງຍອດມູນຄ່າການຄ້າກັບຕ່າງປະເທດຂອງຈີນ. ຈີນໄດ້ນຳໃຊ້ການລົງທຶນຈາກກຸ່ມເສດຖະກິດຂອງ APEC ກວມ 86,6% ຂອງຍອດມູນຄ່າການລົງທຶນຈາກຕ່າງປະເທດທີ່ຈີນນຳໃຊ້ຕົວຈິງ, ຂະນະທີ່ການລົງທຶນຕໍ່ຕ່າງປະເທດຂອງຈີນກວມເຖິງ 73,3% ແມ່ນລົງທຶນຕໍ່ກຸ່ມເສດຖະກິດອົງການ APEC.

ການຮ່ວມມືເສດຖະກິດອາຊີປາຊີຟິກໄດ້ສ້າງກາລະໂອກາດດ້ານການພັດທະນາຫຼາຍກວ່າເກົ່າໃຫ້ແກ່ຈີນ, ຂະນະດຽວກັນ, ຈີນແມ່ນໄດ້ຜ່ານຈາກການເປີດປະຕູສູ່ພາຍນອກຂອງປະເທດຕົນ ເພື່ອຊຸກຍູ້ການເປີດປະຕູສູ່ພາຍນອກຂອງທົ່ວພາກພື້ນ, ຊຸກຍູ້ການເຊື່ອມໂຍງເຊື່ອມຈອດກັນຂອງພາກພື້ນອາຊີປາຊີຟິກ.

ອີງຕາມບົດລາຍງານກ່ຽວກັບການເຊື່ອມໂຍງເສດຖະກິດອາຊີ 2023 ສະແດງໃຫ້ເຫັນວ່າ: ການຟື້ນຕົວຂອງເສດຖະກິດອາຊີປາຊີຟິກ, ສາເຫດສ່ວນໃຫຍ່ແມ່ນເປັນຍ້ອນປະເທດຈີນ, ຈີນໄດ້ປະກອບສ່ວນເຂົ້າໃນການເຕີບໂຕດ້ານເສດຖະກິດຂອງພາກພື້ນແຫ່ງນີ້ບັນລຸເຖິງ 64,2%. ນອກນີ້, ການເຕີບໂຕດ້ານການຄ້າສິນຄ້າທີ່ຈັບຕ້ອງໄດ້ກວມຈຳນວນ 37,6% ແລະ ການຄ້າການບໍລິການກວມ 44,6% ຂອງພາກພື້ນອາຊີປາຊີຟິກນັ້ນ ແມ່ນເປັນການປະກອບສ່ວນຈາກຈີນ.

   ດັ່ງທີ່ທ່ານສີຈິ້ນຜິງເຄີຍຍົກເອົາຄຳບູຮານຈີນມາກ່າວວ່າ: “ວາງແຜນງານທີ່ສອດຄ່ອງກັບສິນທຳ ກໍຈະບັນລຸຜົນເປັນຈິງໄດ້ແນ່ນອນ, ເຮັດສິ່ງທີ່ເປັນໄປຕາມຄວາມມຸ່ງມາດປາດຖະໜາຂອງປະຊາຊົນ ກໍຈະປະສົບຜົນສຳເລັດແນ່ນອນ.” ຜົນງານດ້ານການເປີດປະຕູສູ່ພາຍນອກໃນທີ່ສຸດຈະເຂົ້າເຖິງປະຊາຊົນບັນດາປະເທດ.

ວັນທີ 17 ທັນວາ2019 ຊາວກະສິກອນປາປົວນິວກີເນທີ່ເຂົ້າຮ່ວມໂຄງການຈີນຊ່ວຍເຫຼືອປາປົວນິວກີເນດ້ານການປູກເຂົ້າເນີນສູງເປັນຄັ້ງທຳອິດນັ້ນ ດີໃຈທີ່ໄດ້ເຫັນຕົ້ນເຂົ້າທີ່ເຕີບໂຕເປັນຢ່າງດີຂອງຕົນ

   ເນື່ອງຈາກໄດ້ຮັບຜົນປະໂຫຍດຈາກອົງການ APEC, ບຣູເບີຣີ（blueberry）ຂອງເປຣູ, ສະຕໍເບີຣີຂອງຈີເລ, ກຸ້ງມັງກອນຂອງອົດສະຕຣາລີທີ່ມີລາຄາຖືກກວ່າໄດ້ເຂົ້າເຖິງໂຕະອາຫານຂອງຜູ້ບໍລິໂພກໃນກຸ່ມເສດຖະກິດອື່ນໆໂດຍໃຊ້ເວລາສັ້ນກວ່າ. ປີ 2024, ມູນຄ່າການຄ້າລະຫວ່າງເປຣູກັບກຸ່ມເສດຖະກິດຂອງອົງການ APEC ຄາດວ່າຈະບັນລຸຫຼາຍກວ່າ 80 ຕື້ໂດລາ. ນັກທຸລະກິດທີ່ຖືໜັງສືເດີນທາງທຸລະກິດ APEC ຈາກບັນດາກຸ່ມເສດຖະກິດພາຍໃນຂອບເຂດ APEC ຈະສາມາດເດີນທາງໄປກັບລະຫວ່າງ 17 ກຸ່ມເສດຖະກິດຂອງອົງການ APEC ເຊິ່ງລວມທັງປະເທດຈີນໄດ້ຢ່າງເສລີ. ລົດໂດຍສານໄຟຟ້າຂອງຈີນໄດ້ແລ່ນຢູ່ຕາມຖະໜົນຫົນທາງຂອງປະເທດຈີເລ ເຊິ່ງໄດ້ປະກອບສ່ວນເຂົ້າໃນການປະຢັດພະລັງງານ ແລະ ຫຼຸດການລະບາຍກາກບອນ ກໍຄື ການສ້າງຕົວເມືອງທີ່ສະອາດກວ່າເກົ່າຂອງປະເທດນີ້. ຢູ່ປາປົວນີວກີເນ, ໂຄງການປູກຈວິ່ນສ້າວ(ເປັນຊື່ເອີ້ນລວມຂອງພືດຊະນິດຕ່າງໆທີ່ສາມາດໃຊ້ເປັນວັດຖຸດິບຜະລິດເຫດທີ່ເປັນອາຫານແລະຢາ) ແລະ ເຂົ້າເນີນສູງ, ໂຄງການກໍ່ສ້າງຖະໜົນເອກະລາດ ແລະ ໂຄງການອື່ນໆທີ່ຈີນຊ່ວຍເຫຼືອນັ້ນ ໄດ້ສ້າງຜົນປະໂຫຍດຕົວຈິງໃຫ້ແກ່ປະຊາຊົນປະເທດດັ່ງກ່າວ.

   ບາດກ້າວແຫ່ງການເປີດປະຕູສູ່ພາຍນອກຂອງຈີນ ບໍ່ເຄີຍຢຸດນິ້ງຈັກເທື່ອ. ຈາກການຈັດງານວາງສະແດງສິນຄ້ານຳເຂົ້າສາກົນຈີນມາເປັນເວລາຫຼາຍຄັ້ງລຽນຕິດ ຮອດການເລັ່ງສ້າງລະບົບນະໂຍບາຍ “1+N”, ຈາກການນຳໜ້າກ່ອນໝູ່ໃນການໃຫ້ສັດຕະຍາບັນສັນຍາການພົວພັນຄູ່ຮ່ວມເສດຖະກິດຮອບດ້ານໃນພາກພື້ນ ຫຼື RCEP ຮອດການຮ້ອງຂໍເຂົ້າເປັນສະມາຊິກ ສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ (CPTPP) ແລະ ສັນຍາການພົວພັນຄູ່ຮ່ວມເສດຖະກິດດີຈີຕອນ, ຈີນໄດ້ນຳໃຊ້ການກະທຳຕົວຈິງໃນການຍຶດໝັ້ນການຮ່ວມມື ແລະ ການເຊື່ອມໂຍງເຂົ້າກັນ ເພື່ອເຮັດໃຫ້ສີສັນພື້ນຖານດ້ານການເປີດປະຕູສູ່ພາຍນອກ ຂອງພາກພື້ນອາຊີປາຊີຟິກໂດດເດັ່ນກວ່າເກົ່າ.

   ປະຫວັດສາດ ແລະ ສະພາບຄວາມເປັນຈິງໄດ້ພິສູດໃຫ້ເຫັນວ່າ: ພາກພື້ນອາຊີປາຊີຟິກ ບໍ່ແມ່ນເຂດແດນໃນການແຂ່ງຂັນດ້ານພູມສາດການເມືອງ, ແຕ່ເປັນເຂດແດນທີ່ມີທ່າແຮງດຶງດູດຫຼາຍສຳລັບການຮ່ວມມືແບບເປີດກວ້າງ. ຄືດັ່ງທ່ານສີຈິ້ນຜິງໄດ້ຍົກເອົາ “ກຳປັ່ນ” ມາເປັນຄຳປຽບທຽບຫຼາຍເທື່ອວ່າ ຈີນຈະຮ່ວມກັບບັນດາສະມາຊິກອົງການ APEC ຮ່ວມກັນຜ່ານຜ່າຄວາມຫຍຸ້ງຍາກ ເພື່ອຊຸກຍູ້ອາຊີປາຊີຟິກທີ່ປຽບເໝືອນກຳປັ່ນໃຫຍ່ລຳນີ້ ເດີນທາງມຸ່ງໜ້າໄປສູ່ອະນາຄົດທີ່ສະຫວ່າງສະໄຫວແຫ່ງຄວາມຈະເລີນຮຸ່ງເຮືອງຢ່າງສະເໝີຕົ້ນສະເໝີປາຍ.