“ຈາກນະຄອນຈັນໄກຫານະຄອນຊຽງໄຮ້, ພວກເຮົາບໍ່ພຽງແຕ່ໄດ້ເປັນສັກຂີພິຍານໃຫ້ແກ່ການຮ່ວມກັນສ້າງ ໜຶ່ງແລວໜຶ່ງເສັ້ນທາງ ໄດ້ແຕກດອກອອກຜົນຢູ່ເປຣູເທົ່ານັ້ນ, ຫາກຍັງໄດ້ເປັນສັກຂີພິຍານໃຫ້ແກ່ການກຳເນີດຂອງຊ່ອງທາງໃໝ່ທາງບົກແລະທາງທະເລລະຫວ່າງອາຊີ-ອາເມຣິກາລາຕິນໃນຍຸກໃໝ່ອີກດ້ວຍ.” ຕອນຄ່ຳວັນທີ 14 ພະຈິກນີ້, ທ່ານສີຈິ້ນຜິງ ປະທານປະເທດຈີນ ແລະ ທ່ານນາງດີນາ ໂບລູອາເຕ ປະທານາທິບໍດີເປຣູໄດ້ຮ່ວມກັນເຂົ້າຮ່ວມພິທີເປີດທ່າກ່ຳປັ່ນຈັນໄກຢູ່ທຳນຽບປະທານາທິບໍດີທີ່ນະຄອນຫຼວງລີມາ ໂດຍຜ່ານທາງວິດີໂອ. ທ່ານສີຈິ້ນຜິງກ່າວວ່າ: ທ່າກ່ຳປັ່ນຈັນໄກໃນປັດຈຸບັນ ພວມກາຍເປັນຈຸດເລີ່ມຕົ້ນໃໝ່ຂອງ “ເສັ້ນທາງບູຮານອິນກາໃນຍຸກໃໝ່”.

ເມື່ອ 500 ກວ່າປີກ່ອນ, ຊາວອິນກາ ທີ່ເປັນບັນພະບຸລຸດຂອງຊາວເປຣູໄດ້ສ້າງເສັ້ນທາງບູຮານອິນກາ ທີ່ຜ່ານສາຍພູອັນເດສແຕ່ເໜືອຕະຫຼອດໃຕ້. ປັດຈຸບັນ, ໃນຖານະເປັນໂຄງການສັນຍະລັກຂອງການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ລະຫວ່າງຈີນກັບເປຣູ, ທ່າກ່ຳປັ່ນຈັນໄກໄດ້ເຮັດໃຫ້ເສັ້ນທາງບູຮານສາຍນີ້ມີຊີວິດຊີວາຂຶ້ນອີກ ເຊິ່ງຈະຊຸກຍູ້ໃຫ້ເປຣູສ້າງຄວາມຈະເລີນຮຸ່ງເຮືອງໂດຍອີງໃສ່ທະເລ.

ທ່າກ່ຳປັ່ນຈັນໄກຫ່າງຈາກນະຄອນຫຼວງລີມາຂອງເປຣູໄປທາງທິດເໜືອປະມານ 80 ກິໂລແມັດ, ໂຄງການໄລຍະໜຶ່ງໄດ້ເລີ່ມລົງມືກໍ່ສ້າງເມື່ອປີ 2021, ກຳປັ່ນຂະໜາດໃຫຍ່ພິເສດທີ່ສາມາດບັນທຸກຕູ້ຄອນເທນເນີໄດ້ເຖິງ 18.000 ຕູ້ມາດຕະຖານຈະສາມາດເຂົ້າທຽບທ່າຈັນໄກໄດ້, ປີໜຶ່ງສາມາດຂົນຖ່າຍຕູ້ຄອນເທນເນີໄດ້ເຖິງ 1 ລ້ານຕູ້ຕໍ່ປີ ແລະ ໃນໄລຍະໄກຈະສາມາດຂົນຖ່າຍຕູ້ຄອນເທນເນີໄດ້ເຖິງ 1,5 ລ້ານຕູ້ຕໍ່ປີ, ຈະສາມາດປັບປຸງຖານະຂອງເປຣູທີ່ເປັນຈຸດເຊື່ອມຕໍ່ທາງບົກ-ທາງທະເລ ແລະ ເຊື່ອມຕໍ່ອາຊີ-ອາເມຣິກາລາຕິນ.