ຫວ່າງມໍ່ໆມານີ້, ໂທລະພາບສາກົນຈີນຫຼື CGTN ຂອງວິທະຍຸໂທລະພາບສູນກາງຈີນຫຼື CMG ໄດ້ແຈກຢາຍແບບສອບຖາມໃຫ້ຊາວເນັດທົ່ວໂລກເພື່ອສຳຫຼວດຄວາມຄິດເຫັນກ່ຽວກັບກອງປະຊຸມສຸດຍອດກຸ່ມG20 ເຊິ່ງຜົນການສຳຫຼວດສະແດງໃຫ້ເຫັນວ່າ: ຜູ້ຕອບແບບສອບຖາມໄດ້ຕີລາຄາສູງຕໍ່ຈີນທີ່ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການເຕີບໂຕດ້ານເສດຖະກິດໂລກ, ປັບປຸງການບໍລິຫານເສດຖະກິດໂລກໃຫ້ສົມບູນຂຶ້ນ.

ຜົນການສຳຫຼວດຄວາມຄິດເຫັນສະແດງໃຫ້ເຫັນວ່າ: ມີຜູ້ຕອບແບບສອບຖາມ 80,9% ເຫັນວ່າ ກຸ່ມ G20 ເປັນເວທີສຳລັບບັນດາຝ່າຍເພີ່ມທະວີການຮ່ວມມືຫຼາຍຝ່າຍ ແລະຮ່ວມກັນແບ່ງປັນໂອກາດການພັດທະນາ, ບັນດາຝ່າຍຄວນຮ່ວມມືກັນຮັບມືກັບຄວາມບໍ່ແນ່ນອນແລະສິ່ງທ້າທາຍໃນປະຊາຄົມໂລກ; ນອກນີ້, ມີຜູ້ຕອບແບບສອບຖາມ 73,4% ຄອງຄອຍສະມາຊິກກຸ່ມ G20ຕັ້ງໜ້າຊຸກຍູ້ການຮ່ວມມືສາກົນໃນການແກ້ໄຂບັນຫາດ້ານດິນຟ້າອາກາດ ເຊິ່ງເປັນບັນຫາທີ່ປະເທດເຂດໂລກໃຕ້ມີຄວາມສົນໃຈຮ່ວມກັນໂດຍທົ່ວໄປ ເພື່ອຊຸກຍູ້ໃຫ້ເສດຖະກິດໂລກຫັນປ່ຽນໄປຕາມທິດສີຂຽວ.

ຜົນການສຳຫຼວດຄວາມຄິດເຫັນຍັງສະແດງໃຫ້ເຫັນວ່າ: ມີຜູ້ຕອບແບບສອບຖາມກວມເຖິງ 92,8% ເຫັນວ່າ ຈີນໄດ້ປະກອບສ່ວນຢ່າງໃຫຍ່ຫຼວງເຂົ້າໃນການຍົກສູງລັກສະນະຕົວແທນແລະສິດປະກອບຄຳເຫັນຂອງປະເທດເຂດໂລກໃຕ້ຢູ່ໃນການບໍລິຫານໂລກ. ນອກນີ້, ມີຜູ້ຕອບແບບສອບຖາມ 91,4%ເຫັນວ່າ: ຈີນເປັນກຳລັງແກ່ນສານໃນການຊຸກຍູ້ປະເທດເຂດໂລກໃຕ້ພັດທະນາ ແລະມີຄວາມຈະເລີນຮຸ່ງເຮືອງຮ່ວມກັນ

 ແບບສອບຖາມການສຳຫຼວດຄວາມຄິດເຫັນຄັ້ງນີ້ໄດ້ແຈກຢາຍຜ່ານເວທີ 5 ພາສາຂອງ CGTN ຄືພາສາອັງກິດ, ແອັດສະປາຍ, ຝຣັ່ງ, ອາຣັບ ແລະ ຣັດເຊຍ, ພາຍໃນເວລາ 24 ຊົ່ວໂມງມີຊາວເນັດຫຼາຍກວ່າ 7.469 ຄົນເຂົ້າມາຕອບແບບສອບຖາມ ແລະ ສະແດງຄວາມຄິດເຫັນ.