ວັນທີ 16 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານໂຈ ໄບເດັນ ປະທານາທິບໍດີອາເມຣິກາຢູ່ທີ່ນະຄອນຫຼວງລີມາປະເທດເປຣູ. ປະມຸກລັດສອງປະເທດໄດ້ແລກປ່ຽນຄວາມຄິດເຫັນຢ່າງກົງໄປກົງມາ ເລິກເຊິ່ງ ແລະມີລັກສະນະສ້າງສັນກ່ຽວກັບສາຍພົວພັນຈີນ-ອາເມຣິກາ, ບັນຫາສາກົນ ແລະ ພາກພື້ນ. ທ່ານສີຈິ້ນຜິງໄດ້ສະຫຼຸບບົດຮຽນ 7 ຂໍ້ກ່ຽວກັບການຂະຫຍາຍສາຍພົວພັນຈີນ-ອາເມຣິກາໃນ 4 ປີຜ່ານມາ. ໃນການພົບປະກັນຄັ້ງນີ້, ສອງຝ່າຍກໍບໍ່ໄດ້ຫຼົບຫຼີກຄວາມເຫັນທີ່ຂັດແຍ້ງກັນ. ທ່ານສີຈິ້ນຜິງໄດ້ບັນຍາຍຫຼັກການ ແລະ ຫຼັກໝັ້ນຂອງຈີນໃນບັນຫາທີ່ສຳຄັນຢ່າງເລິກເຊິ່ງ. ທ່ານໂຈ ໄບເດັນໄດ້ກ່າວຢ້່ຳເຖິງຄຳໝັ້ນສັນຍາດ້ານການເມືອງຕ່າງໆ ເຊັ່ນ: ອາເມຣິກາຈະບໍ່ສະແຫວງຫາ “ສົງຄາມເຢັນຄັ້ງໃໝ່” ຕໍ່ຈີນ, ບໍ່ສະໜັບສະໜູນ “ໄຕ້ຫວັນເປັນເອກະລາດ” ແລະອື່ນໆ.

ໃນການພົບປະຄັ້ງນີ້, ທ່ານສີຈິ້ນຜິງໄດ້ສະຫຼຸບບົດຮຽນ ແລະ ແນວຄິດບັນດານໃຈ 7 ຂໍ້ຢ່າງລະອຽດ ແລະ ເລິກເຊິ່ງ ຄື: ຕ້ອງມີຄວາມຮັບຮູ້ດ້ານຍຸດທະສາດທີ່ຖືກຕ້ອງ, ເວົ້າແລ້ວຕ້ອງປະຕິບັດ ປະຕິບັດແລ້ວກໍຕ້ອງໃຫ້ໄດ້ຮັບຜົນຕາມແຜນການ, ຕ້ອງປະຕິບັດຕໍ່ກັນຢ່າງສະເໝີພາບກັນ, ບໍ່ຄວນທ້າທາຍຕໍ່ເສັ້ນແດງ ແລະ ເສັ້ນພື້ນຖານ, ຄວນດຳເນີນການສົນທະນາ ແລະ ການຮ່ວມມືໃຫ້ຫຼາຍ, ຄວນຕອບສະໜອງກັບຄວາມປາດຖະໜາຂອງປະຊາຊົນ, ຄວນສະແດງໃຫ້ເຫັນຄວາມຮັບຜິດຊອບຂອງການເປັນປະເທດໃຫຍ່. ສິ່ງເຫຼົ່ານີ້ໄດ້ເປັນຜົນສະຫຼຸບຈາກການສ້າງຕັ້ງສາຍພົວພັນທາງການທູດລະຫວ່າງຈີນ-ອາເມຣິກາຕະຫຼອດໄລຍະ 45 ປີຜ່ານມາ, ໄດ້ພົວພັນເຖິງບັນຫາສຳຄັນຕ່າງໆ ເຊັ່ນ: ອາເມຣິກາຄວນປະຕິບັດຕໍ່ຈີນແນວໃດ, ໄປມາຫາສູ່ກັນຢ່າງສະເໝີພາບກັນແນວໃດ, ຄວບຄຸມ-ຄຸ້ມຄອງຄວາມເຫັນທີ່ຂັດແຍ້ງກັນແນວໃດ, ຮ່ວມກັນແບກຫາບຄວາມຮັບຜິດຊອບຂອງໂລກ ແລະອື່ນໆ ເຊິ່ງໄດ້ຊີ້ທິດເຍືອງທາງໃຫ້ແກ່ການຂະຫຍາຍສາຍພົວພັນຈີນ-ອາເມຣິກາ.

  ອີກ 2 ເດືອນປາຍ, ລັດຖະບານຊຸດໃໝ່ຂອງອາເມຣິກາກໍຈະຂຶ້ນກຳອຳນາດ. ຫວັງວ່າສອງຝ່າຍຈະປະຕິບັດຕາມຫຼັກການທີ່ເຄົາລົບນັບຖືເຊິ່ງກັນແລະກັນ, ຢູ່ຮ່ວມກັນໂດຍສັນຕິ ແລະ ຮ່ວມມືກັນແບບຕ່າງຝ່າຍຕ່າງໄດ້ຮັບຜົນປະໂຫຍດ, ຖືກເອົາບົດຮຽນ 7 ຂໍ້ທີ່ສະເໜີໂດຍທ່ານສີຈິ້ນຜິງໃນການພົບປະກັນຄັ້ງນີ້ເປັນທິດຊີ້ນຳ, ເຮັດໃຫ້ສາຍພົວພັນຈີນ-ອາເມຣິກາຂ້າມຜ່ານຢ່າງໝັ້ນທ່ຽງ, ບຸກເບີກເສັ້ນທາງແຫ່ງການຢູ່ຮ່ວມກັນຢ່າງຖືກຕ້ອງລະຫວ່າງຈີນ ແລະ ອາເມຣິກາໃນໄລຍະໃໝ່, ສ້າງຜົນປະໂຫຍດໃຫ້ແກ່ສອງປະເທດ ກໍຄືທົ່ວໂລກ.