ໂດຍຕອບສະໜອງຕາມຄໍາເຊີນຂອງທ່ານ ລູອິສ ອິນາຊີໂອ ລູລາ ດາ ຊິນວາ ປະທານາທິບໍດີເບຣຊິນ, ຕອນບ່າຍວັນທີ 17 ພະຈິກນີ້, ທ່ານ ສີຈິ້ນຜິງ ປະທານປະເທດຈີນໄດ້ເດີນທາງໄປຮອດນະຄອນຣີໂອເດີຈາເນໂຣຂອງເບຣຊິນດ້ວຍເຮືອບິນພິເສດ ເພື່ອເຂົ້າຮ່ວມກອງປະຊຸມສຸດຍອດກຸ່ມ G20 ຄັ້ງທີ 19 ແລະ ຢ້ຽມຢາມເບຣຊິນທາງລັດຖະກິດ.

   ໃນໂອກາດນີ້, ທ່ານ ສີຈິ້ນຜິງ ໄດ້ກ່າວຄໍາປາໄສທາງລາຍລັກອັກສອນຢູ່ສະໜາມບິນ ເພື່ອສະແດງຄວາມຢື້ຢາມຖາວຂ່າວຢ່າງຈິງໃຈ ແລະ ອວຍພອນໄຊອັນປະເສີດມາຍັງລັດຖະບານ ແລະ ປະຊາຊົນເບຣຊິນ.

   ເນື້ອໃນບົດປາໃສຂອງທ່ານ ສີຈິ້ນຜິງ ຊີ້ໃຫ້ເຫັນວ່າ: ປີນີ້ ສອງປະເທດຈີນ-ເບຣຊິນໄດ້ສະເຫຼີມສະຫຼອງວັນສ້າງຕັ້ງສາຍພົວພັນທາງການທູດຄົບຮອບ 50 ປີຢ່າງສະຫງ່າຜ່າເຜີຍ. ຂ້າພະເຈົ້າຄອງຄອຍສຸມຄວາມພະຍາຍາມຮ່ວມກັບທ່ານປະທານາທິບໍດີລູລາ, ແລກປ່ຽນຄໍາເຫັນຢ່າງເລິກເຊິ່ງກ່ຽວກັບການຍົກລະດັບສາຍພົວພັນລະຫວ່າງຈີນ-ເບຣຊິນຕື່ມອີກ, ເພີ່ມທະວີການເຊື່ອມຕໍ່ລະຫວ່າງຍຸດທະສາດການພັດທະນາລະຫວ່າງສອງປະເທດ ກໍຄືບັນຫາພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນ. ເຊື່ອໝັ້ນວ່າການຢ້ຽມຢາມເທື່ອນີ້ຈະເພີ່ມທະວີຄວາມໄວ້ເນື້ອເຊື່ອໃຈກັນດ້ານການເມືອງລະຫວ່າງສອງປະເທດຕື່ມອີກ, ລົງເລິກການແລກປ່ຽນ ແລະ ການຮ່ວມມືໃນຂົງເຂດຕ່າງໆລະຫວ່າງສອງຝ່າຍ ເພື່ອນໍາພາສາຍພົວພັນລະຫວ່າງຈີນ-ເບຣຊິນໄຂສັງກາດ “5 ທົດສະວັດຄໍາ” ຕໍ່ໜ້າ. ນອກນີ້, ຂ້າພະເຈົ້າຄອງຄອຍເຂົ້າຮ່ວມກອງປະຊຸມສຸດຍອດກຸ່ມ G20 ຄັ້ງທີ 19 ເພື່ອສຸມຄວາມພະຍາຍາມຮ່ວມກັບຝ່າຍຕ່າງໆ, ເປິກສາຫາລືເພື່ອສະແຫວງຫາການພັດທະນາຮ່ວມກັນ, ຮ່ວມກັນສົ່ງເສີມການຫັນເປັນຫຼາຍຂົ້ວຂອງໂລກທີ່ມີຄວາມສະເໝີພາບ ແລະ ເປັນລະບຽບ ກໍຄືເສດຖະກິດໂລກາພິວັດທີ່ໃຫ້ຜົນປະໂຫຍດຢ່າງທົ່ວເຖິງ ແລະ ກວມລວມ ເພື່ອຊຸກຍູ້ໃຫ້ກຸ່ມ G20 ໃນຖານະເປັນເວທີອັນສໍາຄັນແຫ່ງການຮ່ວມມືດ້ານເສດຖະກິດສາກົນ ສືບຕໍ່ເສີມຂະຫຍາຍບົດບາດອັນໃຫຍ່ຫຼວງກວ່າເກົ່າ.