ອີງຕາມສື່ມວນຊົນລາຍງານຂ່າວໃນວັນທີ 18 ພະຈິກນີ້ໃຫ້ຮູ້ວ່າ: ຕອນບ່າຍວັນທີ 19 ພະຈິກນີ້, ສະພາຄວາມໝັ້ນຄົງອົງການສະຫະປະຊາຊາດຈະລົງຄະແນນສຽງຕໍ່ຮ່າງມະຕິກ່ຽວກັບການບັນລຸການຢຸດຍິງຢູ່ເຂດກາຊາທີ່ຮ່ວມກັນສະເໜີໂດຍ 10 ປະເທດສະມາຊິກບໍ່ຖາວອນຂອງສະພາຄວາມໝັ້ນຄົງອົງການສະຫະປະຊາຊາດ.

   ຕາມຂ່າວແຈ້ງໃຫ້ຮູ້ວ່າ: ຮ່າງມະຕິສະບັບດັ່ງກ່າວສືບຕໍ່ມີເນື້ອໃນຮຽກຮ້ອງໃຫ້ບັນລຸການຢຸດຍິງແບບບໍ່ມີເງື່ອນໄຂໃນທັນທີ ແລະ ປ່ອຍຕົວປະກັນ. ພ້ອມທັງໄດ້ເນັ້ນໜັກເຖິງຄວາມສໍາຄັນຍິ່ງຂອງສໍານັກງານບັນເທົາທຸກ ແລະ ຈັດຫາງານຂອງອົງການສະຫະປະຊາຊາດສໍາລັບຜູ້ລີ້ໄພຊາວປາແລັດສະຕິນໃນຕາເວັນອອກໃກ້.